بيض الأعلام

[صعب]

بسم الله الرحمن الرحيم

هذه الأبيات
من الشاعر / عبدالله بن عبيان اليامي في الشيخ بندر بن علي بن مجحود آل رزق


هب النسيم ورفرفت بيض الأعلام
وبرق الحيا يبرق وعيني تخيله

من فوق جوده راعده له تزرجام
يسقي مرابع شمخ النيب سيله

ديار شيخٍ فزعته تأتي شمام
ماهيب فزعة من يمن بقليله

يا ابو علي يامسندي يا ذخر يام
مواقفك تشفي الكبود العليله

لو دور المحتاج في الشدة حزام
انا أشهد انك ترتكي للثقيله

عادات ربعك من قديمات الأعوام
مواقف الرزقي تنوش الطويله

من قبل أعرفك قلت والسبعة أنعام
صيتك ظهر في كل فج وقبيله

جيتك يجاذبني هوى الصقر لا حام
والحر عاداته يجيب الجزيله

نفخر بفعل ٍطوق النجم بوسام
ونشوش من دبك الحصان وصهيله

والصيت نفرح به على طول الأيام
لا قالوا العربان من ينتمي له

شيخٍ على شيخٍ على المجد عزام
لا ثار بارود ام تاج الطويله

من طيب راسك تحتمي وانت مقدام
ومن طيبنا دونك ندوس المليله

ياعون من حظه مع الوقت ما قام
يا درع ابن عمك ورمحه وخيله

برقك برق في نجد واسقى هل الشام
من بعد دار اهل الجنابي الصقيله