عثى فينا جهاز الدش .. بث وعرض وإستقبال=محاقين الردى لا بارك الله في محاقـنها
بدا وقت الفتن يطلع عسى الله يصلح الأحوال=ولا نقدر نقول إلا عسى ربي يزينها
طلع جيل يشيـّب بالرضيع ويذهل العقــّـــال=بعض ناس ذكرها المصطفى شفنا عواينها
لقينا الكاسيات العاريات الوصف والأشكال=عليها لبس .. لكن لبسها يبرز مفاتـنها
تميل عن الطريق المستقيم ومن تبعها مال=خبيثة شكل .. ظاهرها يمثل خبث باطنها
ترحـّـلها إبليس وانجلى عنها الحيا وانجال=ولو قامت تلملم .. من يصدقها ويامنها
تستر لين تدخل راسها في المشغل الشغــال=وعلى الشغال بالمشغل مذارعها تبيـّــنها
غدت ماعاد تجفل من عيال الهند والبنغال=تغنـّــج له إلين يهزّ رأسه ثم يديـّــنها
على ذا الحال يمكن تفتن الصاحي مع البطـّـال=مادام إنها تغنـّــج له وكلمتها تليـــنها
تجرد عن لباس المسلمين وتلبس البنطـــال=مع قل الحلا .. تلبس لها لبس يشينها
يقولون الرجال " إن الفرس في دبرة الخيال "=ورى الخايب يخلي الخايبة تبرز محاسنها
ولا يؤدب ولا ينصح ولا ينظر لها في حال=يعاملها بهيمة ... بس مابه إلا يسمـّـــنها
وبعضهم لو يبي يؤدب وينصح زوجته ما حتال=ولا ينكر عليها شيء وإن زعلت يســاكنها
خذت منه القوامة وأصبح الحرمة وهي رجال=تخلي الثوب نصف الساق وثيابه يطمـّـــنها
ولا جا الليل .. كل راح له سائق وله جوال=إلى من جات .. ما تلقاه ... وإن جاء ما يعيـّــنها
تحدد نسلها تبغى الرشاقة .. ما تريد عيال=مع عدوان دين الحق .. معلنة تضامنها
وظيفتها عساها البعد بين الناس ــ قيل وقال ــ=تجيب الهرج وتودّيه .. والفتنة تكوّنها
ولا أعمم لأن الخير في بعض البشر لازال=وكم مصيونة في بيتها والرب صــاينها
ولا يمكن يضحـّــي بالشرف والدين بنت رجال=لأن الطيّبة .. يحمي شرفها .. طيب معدنها
عطاها الرب عقل ودين .. مافيها جهل وخبال=نتيجة قوة التيار ما تخلف توازنها
على زلة زوجها .. لو يكررها وسيعة بــــال=تحدث في المحاسن ... والعلوم القشر تدفنها
لها في مهجته منزل .. وله في قلبها منزال=تبادله الغلاء .. ماهيب خاينته وخاينها
ولا ننسى شباب إبتلن به طيبات الفال=تبي العفــّــة وستر الحال والداشر يجننها
مريض وناقص عقله .. خفيف وتشعفه الأزوال=ومنيحه من ردى حظه .. ومن خبثه يحينها
نهاره نوم .. وإن جا الليل يسهر في ردى وهبال=ولا جاء الفجر جاك يسحـّــب رجيله مطيـّـــنها
من آثار المخدّر .. كنّ في جوفه مرض سلال=من التدخين كنّ شفاه .. بالنيلة يلوّنـــــها
ومنهم من تميــّـــز بالنعومة .. والظفور طوال=وذيك القذلة اللي من دهون أخته يدهنها
تحلى بالإنوثة مابقى إلا يلبس الخلخال=يشوف إخته تجـمــّـل للعريس وغايرٍ منها
إلى منه هرج في المجتمع .. جات الهروج هزااااال=يدوّر للرخـــامة ... والمراجل ما يواطنها
يضايقه الآذان ... ويطرب الداشر مع الموّال=قضى ليلة مع الشلـّــة .. وبنت الناس هاينها
ولا أعمم لأن المجتمع لازال فيه أبطـــال=وترى الدنيا من أهل الطيب ماخليت مخازنها
رجال تلتزم نهج الرسول وللحمول جمال=ولا يخرج حديهم كلمته .. يا كود وازنها
ولا ننسى قضية من مسكها لاجل حب المال=لاجل المال .. وصلت بنته الخمسين راهنها
يبيع ويشتري فيها .. كما السلعة مع الدلال=يبي ينظر من اللي يدفع أكثر من زباينها
ترى هذا ومثله في المجالس عدّه الفنجال=جزى اللي علشان الطمع .. بنته يخزّنها
إلى جوه رجال طيبين الدين والأفعـــال=يحوّلهم على أم البنت والخايب ملقـّــنها
تقول : أبغى المهر اللحين نقد ريال فوق ريال=نبي فوق الـميـة من غير حاجات تأمنها
تحته لين يبقى راس ماله غترة وعقال=يدوّر الدداسن في المعارض ويتدينها
ألا وآشيب راسي شاخت النسوان والأنذال=ولا يعتـزّ جيل .. شيـّــخ الحرمة ومكـّــنها
أنا مانيب شامت .. بس أبيـّـن واضرب الأمثال=لعل أهل العقول الطيبة .. تردع مجننها
أبحاول علاج عصر الدش والأهوال=وناس ماتبي تسمع كلامي ما عليّ منها
يقوله واحد يخطي مع التفريط والإهمال=ولكن في رجا الرحمن لا صعبت يهوّنها
إلى منا هوينا في المقابر والحمول ثقال=وبدينا في حياة الآخرة وأول مساكنها
وجاء يوم عبوس قمطرير يشيب الأطفال=نهار فيه ناس يفرحون وناس يحزنها
ورود النار هذا شيء ثابت ماعليه إشكال=ولكن النجاة اللي تبي .. ما حد بضامنها
تسمـّــع يا وسيع العرف لاتجهل مع الجهـّال=أبعرض النصيحة وانت ياجعلك تثمنها
تخيل يوم ينقطع النفس وتضيـّـع الآمال=ونفسك عن هجوم الموت ما تقدر تحصـّــنها
ولا ينفع ولدك ولا ولد عمك ولا إبن الخال=مسجـّــى والمكفن عند جثمانك يكفنها
ألا يا الله يا اللي بيدك الأرزاق و الآجال=ولا للناس غيرك .. رب يرحمها ويأمنها
تجاوز عن خطايانا إلى من عرضت الأعمال=نهار فيه نفس العبد ما يجدي تغابنها
عراة ما علينا لبس .. وحفاة بدون نعال=نهار فيه يجمع ظالم الأمة ومحسنها
الشـــاعر الشيخ / راجح العجمي
الملقب بــ ( شاعر التوحيد )
04-08-2004, 01:17 PM
العرض العادي
