ارجـوك بعـض المشاعـر لاتهزهزهـا
تـرى المشـاعـر تـألـم عـنـد راعيـهـا
وترى النفـوس العـزاز الهـا حواجزهـا
وحواجز النفـس ستـرٍ مـن خوافيهـا
لا تقول لـك كلمـةٍ تحسبـك تحرزهـا
وتطيـح لاقمـت منهـا مـنـت قاويـهـا
وان قلـت لـك كلمـةٍ حـاول تركـزهـا
ولا تـرى الصمـت خيـرٍ مـن حكاويهـا
ودعـواك لاصــار مــا تـقـدر تنجـزهـا
ازبـن علـى واحــدٍ سـاعـه وينهيـهـا
ولا تـجــود عـلــى صـبــرٍ يـعـجـزهـا
وتجيك فـي وسـط بيتـك مـا تناديهـا
وكـم واحـدٍ حاجتهـا بالصـدر يكنـزهـا
من قـل مـن يستمعلـه يـوم يبديهـا
يخشـى مـن اللـي يهمزهـا يلمزهـا
يضحك بعض ناس لاكن ناس يبكيهـا
وشكـواك لابـن الـردي حـذرٍ تعنزهـا
يفضحـك وتـروح فيهـا وانـت كاميـهـا
وعـلـيـك تـكـبـر ولا تـقــدر تمـيـزهـا
وتضيـع فـي طوشـةٍ تبلـش بتاليهـا
والسالـفـه يـقــدر الـواحــد يلـفـزهـا
ويقدر على ناس من شكله يمشيها
ولاتشغلـك حرمـةٍ مـنـت متجـوزهـا
تطـرد وراهـا وغـيـرك يهتـنـي فيـهـا
ولا يفرحك شوف الارنـب لـو تنقزهـا
مــادام مــا شفتـهـا بالـنـار شاويـهـا
ولاتحسـبٍ الـذهـب بــاي يــد يـزهـا
تـرى الذهـب مـا يغيـر لــون اياديـهـا
والنفس حـاول بحـد اقصـى تعززهـا
نـفـسٍ بــلا عـزهـا مـانـي مـداريـهـا
والـنـاس لاتـقـوم بعيـونـك تـخـززهـا
احمد على العافيه واسلك مماشيها
ومن طاوع النفس تشقيـه بغرايزهـا
ومن طاوع العقل يسلم مـن بلاويهـا
والمرجـلـه ماتـحـب الـلـي يهـاوزهـا
تـبـي لـهـا واحـــدٍ دايـــم يحاضـيـهـا
واللـي عيونـه مـع الظلـمـا يغمـزهـا
ماحـدٍ درى عـن عيـونـه لــو يعنيـهـا
ونفيستـك وانـت فـانـي لاتغزغـزهـا
المقـبـره بأنتـظـارك وانــت ناسـيـهـا
والـنـاس دورات قـادرهــا بعـاجـزهـا
ماخـلـق جـنـه ونــار وزعـــوا فـيـهـا
وناسٍ مع الله ونـاس ابليـس ناغزهـا
سبحان من ظل ناس وناس هاديهـا
ونـــاسٍ تـعـلـت وعلـتـهـا مـراكـزهـا
وناسٍ تبي الطيب مير الطيب فاحيها
ونــاسٍ تـحـفـز ومـعــروفٍ تحـفـزهـا
ونـاسٍ تبـي مـن يشيمهـا ويعطيـهـا
ونـاسٍ تلعـوز وتسلـم مـن تلعـوزهـا
ونـاسٍ مـع اللـعـوزه تبـطـي لياليـهـا
وناسٍ تبـي نبـز نـاس ونـاس تنبزهـا
نـابـز ومنـبـوز لـيـن الـمـوت يفنـيـهـا
ونـاسٍ عجـز رزقهـا يكمـل عوايـزهـا
لاهــي فـقـارا وهــي مالله مغنيـهـا
حتـى العجايـز تبـي نــاسٍ تهمـزهـا
العـافـيـه والـظـنـا مـاهــو مكفـيـهـا
وان قمـت اعانـد تفاكيـري وابـارزهـا
صـارت حجـاوي وانـا مانـي محجيهـا
29-06-2009, 02:27 AM
رجـوك بعـض المشاعـر لاتهزهزهـا
العرض الشجري