لاتزيدين المواجع في خفوقي واتركيني=اتركيني دام سجّات الهوى عندك جريمه
كنت أحسبك بنت تلعب بالمشاعر صدقيني=ماهقيت ان لي بقلبك ذرة أخلاص ٍ وقيمه
قلت أجرب حبل قلبي وأفتله بينك وبيني=أثر قلبك مايغشمر بالمحبه ياغشيمه
تل قلبي من صميمه وأنهكه قدام عيني=أشهد ان القلب يوجع يوم تلّه من صميمه
جيت أوضح لك شعوري مارضيتي تفهميني=جيت أبيُن لك غروري وأشعرك انك عديمه
من خلقت وكل شي بخاطري...ياصل يديني=ماعرفت الانسحاب ولاتعودت الهزيمه
المواقف ثابته فيني وطبع الصدق فيني=ماتعلمت الوشايه والدعايه والنميمه
وان نويتي بالمواقف عند وجهك جربيني=صامل ٍ ماأروغ عن حقك ولي نيّه سليمه
ان نويت الموت الاحمر مايردن لو يجيني=وان بغيت آخذ خذيت بطيب نفس وعز شيمه
عزتي هي راس مالي..وان نويتي تكسريني=ماأنكسر فيني شموخ ولا أنثنت فيني عزيمه
لي طموح ... ولك طموح.. ولاقدرتي تاصليني=وان وصلتي ربع ماأطمح له حسبته لك غنيمه
وانتي أبعد من وصول اللي تطاول له جبيني=دام رجليني بالأرض وهامتي في عرض غيمه
مايوطيها سوى رب ٍ خلق صلصال طيني=ومايعليها سوى نفس ٍ خلقها الله كريمه
أبعدي عن جرح قلبي ماهقيتك تقدريني=ماكسبتي غير ذنب لنفس مخلوقه لئيمه
جنبي كل الدروب ولو قدرتي جنبيني=وان نويتي تظلميني ماأعدك لي خصيمه
ودام سجّات الهوى عندك جريمه عاقبيني=عاقبيني في خطاي وبارتكابي للجريمه
شعر/ خالد عثمان المخيدش
02-11-2008, 01:11 PM
العرض العادي
