إليكم قصيدة للشاعر / محمد بن عون الشريف ، عليه رحمة الله
وهو غني عن التعريف
وهذه القصيده الخالدة والتي لابد لأي منكم قد سمع او قرأ من أبياتها الخالده
وكل بيت منها يساوي قصيده
وأترككم مع القصيدة :-
=====================
يالله ياللـي كـل حـي ٍ يسـالك ... يـا واحـد ٍ كل ٍ يخافك ويرجيك
يا قاسم انـوال الملا مـن نـوالك ... وقبـضة نواصي الخلق كله بياديك
تـفك عقـد حبـال عبد ٍ شكالك ... مستبـرم ٍ حبلـه بعقد الشرابيك
بعيد ٍ عن الدانـي دعـا والتجا لك ... يـا مـن هو المالك وحنا المماليك
أرمـي بـحالاتـي لذيك التهالك ... تفـرج عن القلب الذي فيه تشكيك
مالـه من الحرفـات إلا الدعا لك ... والـحيل قصّـر والايادي مفاليك
فإلى انقضى عسري بحسن الرضا لك ... فاجعل لنا صبر ٍعلى العسر يرضيك
ناشدت داعـي البـين مالي ومالك ... مـن كل صوب ٍ كاثرات ٍ دعاويك
قـال إن هـذا الأمـر لا لي ولا لك ... أمـر ٍ قضـاه إلهك اللي مسويّك
لا تعترض أمر القدر فـي جدالك ... ولا تحسب أن اللي مصيبك بيخطيك
قسمة حظوظ الخلق قسـم السوا لك ... ومكتوب حظك يا الفتى في نواصيك
جـف القلـم باللـوح فيما ينالك ... إمـا سعيـد الحـظ والا مشقيّك
وانا اشهد أن اللي قد كتب لك ينالك ... يالعبد ربـك باسم حظك يناديك
كـلٍ بتقديـر الولـي طاب فالك ... إصبـر علـى مـا قدّر الله ياتيك
ولا تلـوم النفس فيما جـرى لك ... تبـور غالـي سلعتك بـين اياديك
ويلومك اللي مـا درى عن حوالك ... ولا درا ويـش الدهر محدث ٍ فيك
محد ٍ درى ويش الذي صاب حـالك ... ومـا جرى لك مع صديق ٍ معاديك
بـمكايدة يبلـّن الايـام حـالك ... وعـن الموارد قـاصرات ٍ مداليك
ما شام بك عن ديرتك عن عيـالك ... وما جنبك درب الخطر والتهاليك
وين انت والأقدار يـوم ارتـحالك ... فـي وسط غبّات ٍ بها الموج عاليك
مـرة يـمين ومـرة ٍ عن شمـالك ... والعُـرب والأتـراك تاخـذ بياديك
إن قيـل رد الجيـش واربط حبالك ... ضـاقت علـى أحرارها والمماليك
فاعـزم وشـم ولا تضيق المسالك ... ولا تسـوّي يا فتـى شومـة الديك
وافهم نبا ما اقول لك طـاب فالك ... سعـد الفتى بالحظ من غير تشكيك
إن جاد حظك باع لك واشتـرى لك ... فـوايده مـن كـل الابـواب تاتيك
وان بـاربك دلاّ يـهـزّل حـلالك ... بـاردى ثـمن يبدا يبيعك ويشـريك
وان جـاد حظك بالمجالـس حكالك ... وصدق مقالك كل من لك يـحاكيـك
وان بـاربك كلٍ يـكذب مـقالك ... وتـصيـر كذبات العرب كلهن فيـك
وان جـاد حظك بالمنازل بـنـالك ... بـيـتٍ رفيعٍ شامخ الطول يـذريـك
وان بـاربك خـلاك تـنقـل عيالك ... مـن دار إلـى دار ٍ ودارٍ تـجلـيـّك
وان جاد حظك كل شـيءٍ صفـالك ... وقـرايب الـخـلان كلـن يـصافيك
وان بـاربك بيـن جـميع العدا لك ... وصـار المـحب اعدا عدوٍ يـعاديـك
وان جـاد حظك كل شيءٍ عنـالك ... ويـباشـرك عنـد المـوده ويعطيـك
وان بـاربك ظـليت مـحدٍ بـحالك ... ولا بـفنـجالٍ مـن الـبـن يسقيـك
وان جـاد حظك قـام واطلـق عقالك ... ومشى معك فـي كل درب يـبـاريك
وان بـاربك جـوّد متـيـن الثـنالك ... وعـن كـل دربٍ يعقلك ثـم يثـنيك
وان جاد حظك كـل شـيء زهـالك ... حـلياه بارواح المـجالس تـزهيـّك
وان بـاربك شـيّن حـلايـا خـيالك ... لااقبلت تغضـي كـل عيـنٍ تـراعيك
وان جـاد حظك كـل شـيء أضالك ... يـشبه فـم القنديل نوره يـقـديّك
وان بـاربك عـزي لحالـي وحـالك ... أرذل رذيـلٍ هـافـي الجـد يـوذيك
يا العبد لـو كثـّرت حَث ارتـحالك ... وعرّضتـها درب الخطـر والتهاليـك
تـازي بـلا حـظ ٍ بعـيد ٍ محـالك ... وقلـوص عـزمك بالمهامـه تـخليك
تسعيـن عـام ٍ يا فـى مـا بدى لك ... أو لاح فـي بـالك لـزوم ٍ يصافيـك
قل :ول يا حظي علـى مـا جرى لك ... لـيـا قَـلّ عونك ما اجتهادك بيغنيك
إكتب مكاتيـب الشقـا والعنـا لك ... قـل: ول يـا حظ الشقا اتعبت راعيك
يـا حـظ لـو ذيـب المفالي عوى لك ... فـي مـجلس ٍ حاويه صوت ٍ يعاويك
بقـول لـو حظك سعيد ٍ نـمـا لك ... لـو عشـرة أولادك عضيد ٍ يكـفيك
واليوم لا تـامـن يـمينك شـمالك ... يـخونك أصـدق من صديق ٍ يماليك
ولا يغـرك إن لـقـاك وحكـى لك ... ولـو عطـا لك المـواثـيق يرضيك
خذ الحذر كل الحـذر لـو صفـالك ... عيب ٍ على انك تامن الخصـم ياليك
تحصّن بسوّ الظن وابصـر بـحـالك ... واحـذر جـليس ٍ ضايع الراي يعميك
من سو طبعه إن حكى بك حكـى لك ... يـرضي عـدوك بالنميمة ويرضيك
راعي المكر والكـذب والبـوق سالك ... وراعي الثـنا ضاقـت عليه المساليك
يـمشي ورايـه ضايـع ٍ بالمـهـالك ... لا شـاف من دونه على الوكر عاليك
مـا تنظـر الأقـدار فيمـا جرى لك ... شيـوخ القبايـل يتـبعـون المماليك
فـاعـزم بعـون الله علـى ما بدالك ... واقصـد إلـه العـرش حسبك ويكفيك
يا قلب هيّـد عـن تذكّـر حـوالك ... واصبـر عـسى رب الملا يعتـني فيك
إصبر عسى تعطى خَلـَف مـا غدالك ... رجـل ٍ إلـى سامتـك الايام يشريك
يا رب تجـبر واحـد ٍ قـد رجـالك ... عنـد الشدايـد مزبـن اللـي يواليك
فـي يـوم مـا تعطي يمينك شـمالك ... مثقـال حبـة خردل ٍ من حسانـيك
تعيـن مقصـودي وانـا اللي أسالك ... يا سـامع ٍ مـن جـا بـبابك يناديك
والختـم صلـوا عـد مـا قيل فالك ... علـى النبـي المختار ما روجع الديك
واختـام ملفـوظـي لنا فـي مقـالك ... أزكـى صـلاة لهادي الرشد هاديك
=================================
اللهم صلي وسلم على نبينا محمد وعلى آله وصحبه ومن تبعهم بأحسانٍ الى يوم الدين
وسلامتكم
وتقبلوا تحياتي ,,,,
05-06-2008, 10:09 PM
العرض العادي
