مدح وإلا شتيمه

[ريــــــانـه العــــود]

السلام عليكم


وانا اتصفح ايميلاتي قريت قصيده اعجبتني وضحكتني بنفس الوقت

وقلت اخليكم تقرونها هي طويله شوي بس حلوة مرة

وبصراحه مو مكتورب اسم الشاعر

البارحة جاني مـن الحـب مرسـال =من عقب ما بينـي وبينـه خصيمـة



وانا ترى في الحـب مانيـب فعّـال =ولا بعـد ولّـع بقلبـي هشيـمـه



ولا بعد غنّيت فـي ساعـة وصـال =ولا بعد ذقـت الفـراق وجحيمـه



ولا جرى دمعي على الخـد همّـال =ولابعـد جربـت مــرّ الهزيـمـة



حتى وردنـي تالـي الليـل جـوال =وانا على شاهي وبسكـوت ديمـة



الرقم بايخ لكـن الصـوت قتـال =كنه مثل صـوت المذيعـة حليمـة



قالت مساء الخير يـا طيّـب الفـال =قلـت ارحبـي ترحيبـةٍ مستديمـة



بالعود والصفـري ودلـة وفنجـال =واجبك يا بنت الأصـول الكريمـة



ردت بضحكة ثم قالت وش الحـال؟ =قلت اشهد إن الحال عقبك سقيمـة



قالت وهي تضحك بعد مثل الأطفال =وانـا بعـد كنـي بدونـك يتيمـة



من يـوم قالتهـا تزلزلـت زلـزال =من فجعتي كنـي مسـوي جريمـة



قلت ارفعي صوتك ترى مابه ارسال =كـذاب لكـنّ المصيبـة عظيمـة



قالت أقول اسمع ترى هرجنـا طـال =ممكـن تصاحبنـي ترانـي وسيمـة



واسمي الحقيقي أول حروفـه الـدال =لكـن يسمّونـي البنـات الزعيمـة



صحيح أحب الفخفخة واعشق المال =لكـن ترانـي طاهـرة مستقيـمـة



ما عندي امغازل ولا (لعب يهّـال) =ما عندي إلا في الشرف والحشيمـة



بس الصراحة قلبي لشوفتـك مـال =واصبحت وحدك جالسٍ في صميمه



فكّر بعقلك واترك القيـل والقـال =واحذر تطيع اهل العقـول العقيمـة



وارسل علي الحين خمس ميـة ريـال =أشحن بهـا جـوال أختـي غنيمـة



أو طقم غالي فيه خاتـم وسلسـال =أروح بـه فـي عـرس ولاّ عزيمـة



قلت الحقيقة مانيب رجـل أعمـال =ولانـي بتاجـر والمـوارد عديـمـة



أنا الصراحة شبـه عطّـال بطّـال =وعلاقتـي بالفقـر جـداً حميـمـة



والراتب الله يرحم الحـال مـا زال =محـدود والمصـروف ربـي عليمـه



والدين بـالآلاف والبنـك شغّـال =ياكـل فلوسـي بالربـا والظليمـة



والسوق طايح والغلا ضيّـق البـال =والموت والله صايـر اكبـر غنيمـة



قالت تحمّل بـس والحمـل ينشـال =خلك شديد الباس صلـب العزيمـة



ياخي تصرّف جعلك اتصيـر نشّـال =أهـم شـي إن النوايـا سليـمـة



لابد تفهمني علـى كـل الأحـوال =ما دمت من أهل العقـول الفهيمـة



قلت إيه والله فاهم اللي على البـال =لكن تـرى هـذي علينـا قديمـة



يا بنت هـذا صايـر اليـوم مـوال =للي تبي تلعب علـى ابـن اللئيمـة



يا بنت ما تدرين كـم فيـه محتـال =يلعب على الحبلين وانتـي غشيمـة



يا بنت كم من جاهلة دمعها سـال =من عقب ما جات العواقب وخيمـة



والبنت لا اقفى عرضها بيد الأنـذال =والله مـا يبقـى لهـا أي قيـمـة



قالت تبي ولاّ فخلّك علـى جـال =مهوب ناقصـي نصايـح حكيمـة



عز الله إنك للأسف منـت رجّـال =وانك قليل الذوق ما فيـك شيمـة



يا لعنبو اللي مـا يسطّـرك بنعـال =حتـى يعلمـك الغـزل يـا بهيمـة



( تفو ) عليك وصكّت الخط في الحال=مدري ( تفو ) هي مدح وإلاّ شتيمـة

أختكم
ريـــــــــــانه العــــــود

[مـحـمـد بـن فـهـد]

وعليكم السلام ورحمة الله وبركاته

خوش قصيده

ورائعه جدا

لاهنتي على النقل ياريانه

[فهد بن مطلق]

ريانه لاهنتي على النقل



صح السان شاعرها وتسلم يمين ناقلها

كل الود والمحبه

[دوسري يحب العجمان]

وعليكم السلام ورحمة الله وبركاته

ريانه يامال العافيه

ابيات جميله ورائعه واختيار موفق ودمتي في ابداع

وتقبلي تحياتي...

[الجامحه!]

صــح ـح قــلبــتس ونــقــلتس ..!

وصـــح لــسان شــاعــرها .قصـــيده روووعــــه ..

يعطيتس العــافيـــه ..!

[صـــبـــــــــا]

هههههههههههههه
كلمات رووووعه وقصيده تجنن
ريانه لاهنتي عليها نقل مميز
يعطيك العافيه دمتي مبدعه

[ريف الضعيف]

يا بنت ما تدرين كـم فيـه محتـال
يلعب على الحبلين وانتـي غشيمـة



لاهنتي يا ريانة العود
قصيده جميله تحكي الواقع
تقبلي مروري وتحياتي

[بنت الوطن]

قصيده راائعه

صح لسان شااعرها


وتسلم يد ناقلها

[ريــــــانـه العــــود]

المشاركة الأصلية كتبت بواسطة ¶ الـقـصـيـد ¶

وعليكم السلام ورحمة الله وبركاته

خوش قصيده

ورائعه جدا

لاهنتي على النقل ياريانه

ولاانت اخوي القصيد

ومشكووور على المرور الطييييب

[ريــــــانـه العــــود]

المشاركة الأصلية كتبت بواسطة العود

ريانه لاهنتي على النقل



صح السان شاعرها وتسلم يمين ناقلها

كل الود والمحبه

الله يسلمك

ومشكووور على المرور الطييييب