متعب حمود الرشيد _ تعريف وقصيده

[شمريه]

السلام عليكم ورحمه الله وبركاته

* هو الامير متعب الحمود العبيد العلي الرشيد اما عن خواله فهم الجبر الرشيد وهذه الروايه الراجحه وان كان بعض الرواه يذكرون ان عائلة السبهان هم خواله ولاكن الروايات الشفهيه تذكر ان زوجته كانت بنت ابن سبهان وليست امه

وفاته: اتفقت اغلب المصادر ان وفاته كانت اثناء حصار الدلم - مدينه جنوب غرب مدينة الرياض- فقد اصيب بمرض ما اثناء الحصار المذكور ودفن في تلك المنطقه والتاريخ الدقيق للوفاة لا اعلمه شخصيا

مع الاسف الشديد ان اغلب قصايد الامير متعب لم تصلنا فلقد ضاعت اغلب قصايده وغيرها من قصيد الرشيد وكثير من رواة القصيد يثنون على قوة قصيد متعب
واعتقد شخصيا ان بعض المخطوطات الشعريه النادره- التي لم ترى النور بعد- الغير متداوله بين الناس يوجد بها الكثير من القصيد النادر ولاكن الكثير يتحفظ عليها لاسباب لا معنى لها

هذه بعض ما عندي من قصيد الامير متعب

قال

اهـب يـــا وقـــت مـن الـخـيـر مـسلـوب = وقـت بـه الـعـاقـل خطـيــر يــنــابــي
وهبيـت عـمـر عن هــوى الـنـفـس مـحـجـوب = حقّـه من اللـذات عد الـوجـابي
بـاح الـعـزا مـنـي وسجـلـت مـكـتـوب = وابــديـت بــه سري وغــايــة جــوابـــي
وكـزيـت مـنـدوب يــصلـه لمحـبــوب =عــني ويـخـبـر صـاحـبـي فـي جــوابـــي
وقـلـه تــــرن مـن ضـيــم الأيـام مـركـوب =ألا ولا يــخفـاك لــحـق الــقـصـابـي
ذكـرت بــيــت الـلي بـالأفـكـار مـتـعـوب =عــز الله إنه قــال بــيــت وأصــــــابي
الـلـي بـصـوب وعـيـلتـه عنـه فـي صـوب =هذاك مـثلـي بـالعنــا والـــعــــذابي
ومـن بـعـد ذا قـله تــرى الـرد مـاجـوب =بـخـط لـعل الـخـط يـبــري صـوابــي

ورد عليه الامير ضاري الفهيد العبيد الرشيد بقصيده مطلعها يقول :

دنيـاك هذي تقـل دولاب دالـوب=تفنـي عمار الـنـاس بالاقـتـلابي
نوب تزين وحادث الدهر مرهـوب=طبعت على التفريق بيـن الحبابـي

وقال متعب يرد على الشيخ راكان ابن حثلين :

الحرب يا راكان تـو ه جديـدي=تركض به القرح وتغدي فلاهـا
أما مشيت لنا على مـانريـدي=تاطاك درجات الرمك في حذاها
وعشيقك اللي مثل عين الفريدي=دوك الدويش مقيل في حشاهـا

ولمتعب قصيده غزليه هذا ما احفظ منها:

يـوم التوينـا ودعنـا خـرايـد=عفايـفٍ ماجـن دروب المناقيـد
ماجد* مروي مرهفـات الحدايـد =فرز الوغى نطاح وجه البواريد

ماجد: ماجد الحمود العبيد العلي الرشيد الاخ غير الشقيق لمتعب

واخيرا رحم الله متعب الحمود واموات المسلمين وجمعنا الله واياهم في جنات النعيم000000


ولي نداء عبر هذا الموضوع لكل من يملك قصيده للامير متعب غير ماطرحت اعلاه ان يضيفها على الموضوع او يرسلها لي000000





تحيااااااتي للجميييييع




أخـــــتـــــكـــم
((الــــشـــــمــــريـــــه))

[راعي العليا]

الاخت الشمريه الله يعطيك العافيه,,, بس أنا قد سمعت ان ابو متعب قال قصيده في زوجته اللي هي بنت خاله الامير على شمر وقتها... عند ماهرب من جماعته اللي كانو يبون ذبحه لشدت خوف امير شمر ان ياخذ الاماره منه .... ولدت زوجته متعب وهم في سفرهم وكانت حذائها اعز الله القارئين ممزق فقال والد متعب قصيده جميله في زوجته خشية أن تتجرح قدميها من الارض...... اتمنى سماع هذه القصيده اللي ذكرته على انها من أجمل الغزليات في وقتها.....ولك كل الشكر.....ويمكن اتعبتك بطلباتي بس لاتلوميني بدون مجامله احب شمر

[راكان اليامي]

اشكرش على الموضوع يالشمريه

وتقبلي تحياتي

[واثق]

الأخت شمرية: شخصيا لا أعرف عن متعب هذا إلا أنه قتل مع أخويه ماجد والآخر أعتقد أن اسمه فيصل. أقول قتلوا أبناء عبد العزيز بن متعب بن رشيد الثلاثة بعد مقتله في معركة روضة مهنا على يد جند الملك عبد العزيز.
الأخ راعي العليا: الذي هرب من حائل وقال قصيدته المشهورة في زوجته وبدايتها: يا حسين والله ما لها سبت رجلين
كان عبد الله بن رشيد وهو مؤسس حكم آل رشيد وأبناءه هم طلال ومحمد ومتعب, وهو أيضا جد قتيل روضة مهنا.
أما متعب المذكور في مشاركة الشمرية فهو متعب بن حمود العبيد آل رشيد.

[هادي]

لا أذكر من من الرشيد قالها ولكنه أنشد يخاطب خادمه المسمى حسين وقال:

إرم النعل لمغيزل العين يــــاحسين=واقطع لها من ردن ثوبك ليانه
ياحسين واللــــه مالها سبت رجلين=ياحسين شيب بالضمير هكعانه
وان شلتها ياحسين ترمي بها شين=حيث الخوي ياحسين مثل الأمانه
ما يستشك ياحسين كـــود الرديين=ولا ترى الطيب وسيع(ن) بطانه

هكعانه=عرجتها من حر الرمضا

[جالس بن مبارك]

شكرا لش يا الشمريه على الموضوع

[الخريصي]

السلام عليكم اخواني

وانا راح اكمل لكم القصيده الجميله لعبدالله الرشيد بزوجته


طش النعول لداعج العين ياحسين
وشلق لها من ردن ثوبك ليـــــانـــه

لابد ماحنا عن الضلع مقفيـــــــــن
ولابد ماناطا النفود وليــــــــــانــــه

نجب حثاث القاع وضرب لها اللين
وقصر خطـــارجليك ومش مشيانه

ياحسين والله مالها سبت رجلين
ياحسين شيب بالضمير هكعانه

لو تنقله نقلٍ ترى مابها شيــــن
ترى الخوي ياحسين مثل الامانه

ياحسين مايشتك كود الردييـــن
وألا ترى الطيّب وسيعٍ بطـــانــه

الخد قرطاسٍ قروه المصليـــــــن
شفته مع اللي يقبلون الديانــــه

اوزبد شفته له ببيضا من اللين
قطن مع اللي يندفونه بعانــــــه

سميها اللي يلبسون الغلاميــن
مايلبّس الا نهــــــار الكيــــانـــه

ماقلت من باقي العذاريب به شين
عذروبها ياحسين قل حصلانــــــــه



وتقبلوا تحيات اخوكم الخريصي

[مـحمـد]

السلام عليكم ورحمة الله وبركاته

الله يعطيكم العافيه على ذكر هذه النبذه عن هذا البطل .

[مطير ابن غطفان]

لاهنتِ يالشمريه

والله يعطيك العافيه

[عقيد آل وعيل]

ونعم بمتعب الرشيد

اشهر من نار على علم

الله يرحمه ويرحم اموات المسلمين