فعل الدواسر

[الناشب]

انزل موضوع الدواسر يوم زبنو بداح بن مطرف العجمي ( رحمه الله وعفا عنه وعن موتى المسلمين )

( القصه كامله الادله والاثباتات)

هذه المعركة من اضخم معارك الدواسر ضد حاكم الحجاز وفيها انتصرت قبيلة الدواسر .. ويعود سبب هذه المعركة إلى رجل اسمه بداح بن مطرّف السليماني العجمي كان خوي لشريف الحجاز، وقد فعل فعلاً أغضب الشريف وقال له الشريف انه اصم ، أعمى لن يسمع ولن يرى لأي قبيلة تأويه . واقسم أن يدمر كل قبيلة تأوية تدميراً، وقد آوته بعض القبائل لمدة شهرين وهي المدة التي حددها الشريف لبقاءه عند كل قبيلة حفاظاً على ماء الوجه ، ولكنها بعد المدة كانت تطرده ، ويقال أن والدته نصحته بأن يذهب للدواسر، وكان أول من زبنه الشيخ : محمد بن فادر من الغييثات ، وعندما علم الشريف بذلك غضب غضباً شديد وأمر بتحريك جيوشه لناحية وادي الدواسر ، عندها اجتمعوا باقي الدواسر مع الغييثات واستعدوا لمواجهة هذا السيل الجارف .. فما أن بدأت المعركة حتى سقط ابن الشريف قتيلاً على يد المقينع بن الفدير من الغييثات ، وبهذا تخلخل الجيش وبدأ بالإنهزام حتى سقط الشريف نفسه أسيراً في يد الدواسر ، وكما هي عادة النبلاء حين يسقط عزيز قوم في ايديهم اسيراً فأنه لا يقتل .. وقد اطلق سراحه بإتفاقيه عقدت بين الإشراف والدواسر وهي :

الدوسري يدخل مكة دون دفع ضريبة (إذ كان يفرض الأشراف ضريبة لمن اراد الحج أو العمره ، وقد ألغاها الملك عبدالعزيز بعد فتح الحجاز).
دخيل الدواسر آمن ولا يلاحقه الشريف ، وما ضاع للدواسر في حمى الأشراف يرد لهم .

فقبلوا بها الإشراف وبهذا تم إطلاق سراح الشريف


وهذ ي قصايد العجمان يشهدون بالسالفه ( مصدر محايد )

ويقول احد شعراء يام وهو شاعر يام الشاعر علي بن بلال اليامي في قصيدة يمدح بها الدواسر يوضح بها مساومة الدواسر بالشريف

أهل مثلوثه وأهل خيل يوم الحرب شـاع=جارها يركض وراها الشريـف وتمنعـه
ودون هيبتهم انطلوا هيبته طليـة وداع=(الدواسر) من على سرج حجلا تجدعـه
ساومت سلطان (الأشراف) في سوق المباع=والحرايـب نارهـا وارثـه ومولـعـة

وهذي قصيدة ابن مطرف العجمي يمدح فيها الدواسر عندما زبنوه من الشريف

جليت وجلاني (الشريـف) ابـن هاشـم=وسواة من من جلاه الشريـف يخـاف
جلينـا ونصيـنـا هيـلـة عتيـبـة=وقلوبهـم يـم الشريـف صـخـاف
وزبنا على غلبا سبيـع بـن عامـر=يدوسـون الأريـا والعـزوم ضعـاف
وزبـنــا عــلــى البقوم والشلاوي= كنهـم قــرودٍ تتـقـي بإطـفـاف
وزبـنـا عـلـى قحطان وخلـطـهـم=الهـرج واجـد والعـقـول خـفـاف
وزبنت علـى لمـا رجـال آل زايـد=أطــوال القـنـا بـيـن اعـسـاف
ومن قبل ذا قـد زبنـوا اللـي قبلنـا=وداوو عمى مـن لا يشـوف وشـاف
وترى عزوتي منهم رجـال آل فـادر=غشاهـم مـن البيضـا ذرا والحـاف
وترى معرفتي منهم الفـارس محمـد=عليـه مـن جديـد الجـوخ لحـاف
أفيا نعـم ياولـد الفديـر مقينـع =وسيفه علا من راس الشريف انـزاف
ويانعـم يـا ولـد المبيعيـج ناصـر=جـواده فـي العـج اتغبـا وتشـاف
أو عمري الصطا من شبا السيف حاظر=جـواده منهـا السابقـات تـخـاف
عسى الحيـا يحيـي لديـار آل زايـد=وعسى دارهم عقب الخريـف تصـاف
ما زبّـن اللـي مثلنـا كـون مثلهـم=اكسـروا عساكـر دولـة الأشـراف
يوم اصفقوا القوم في القـوم ارتكـوا=أرزان المواقف هـم ذرا مـن خـاف

شهادة شيخ قبيلة آل محيي اليامية بأن الدواسر هم من اصقط مناصب دولة الأشراف
في قصيدة طويلة للشيخ علي بن سعيد بن بلال اليامي شيخ قبيلة آل محيي

بني زايد اللي تنطح الضد فـي الميعـاد=دواسر تمكـن فـي عداهـا مضاربهـا
هل العرف واهل السيف والمنسف المعتاد=واهل جيرة ياسم عصا الجار صاحبهـا
لهم هيبة أثقـل مـن العـارض المنقـاد=تحامت على (ابن مطرف) يـوم لاذ بهـا
بغاه الشريف ولا حصل للشريف مـراد=برزلـه طحاطيـح تفتـل شواربـهـا
تعلوا ظهور الخيل دون الدخيـل عماد=ولهم دولة الاشراف طاحـت مناصبهـا
هذا والقصيدة في عريب الجـدود تعـاد=من اقصى حقيقة كلمـة الحـق نكتبهـا
ابيها الى مـرت علـى واحـد حسـاد=يقنع بهـا نفـس الـردى لـو يغضبهـا
وابيها الى مـرت علـى واحـد جحاد=يعـرف الثنـا ويـرد للنـاس واجبهـا
وابيها الى مرت علـى مجلـس النقـاد=يقولـون مـا فيهـا كـلام يعذربـهـا

وقصيدة مانع بن زريق العجمي ايضا يشهد للدواسر ويثني عليهم

تغنيت باسم اعجيم جدي وجـدي يـام=ومن ديرة الدامر بسـوق القـدم يمـه
الى وادي العود الفحل دوسر الضرغـام=راع الوادي المسمى مهو وادي الرّمـه
ظنا زايد وتغلب اتحط العلـوم اقسـام=كلام عليـه الحلـف والنـذر والذمـه
تعنا (الشريف) لدارهـم معتليـه اعـرام=وردت عزاويـه بعـد جورهـم ياامـه
تعدا القبايـل ساكنـه يبتحـص قـدام=وبعد ماوصلهم قصوا اشنابـه وكمـه
فهم مزبن الساطي وهم ملتجا المنضام=وهم فزعة المضهود هم نقـوة الامـه
وهم ملتقا الهاشل وهم نصرة الاسـلام=وهم مدت المحتاج هـم للخـوي دمـه
وهم حكمة المجلس وهم عزوة الزهـام=وهم ضحكة الحجان هم للعـدو غمـه
وصاة الرسول ابجارهم طبقت باحكـام=وكنه يخص الدوسـري خيـرة الامـه
يسوقون جار البيت لو صابته الاسهام=ويدله غريب الـدار معهـم ولا همـه
ووسم العصا ما احدٍ سبقهم عليه اشمام=اهنا الفرق يااللي تحفظ العلم واتضمـه
هل البل حماة الغرس لو ركزت الاعلام=حما دارهـم لوجّـرت الضـد ملتمـه
أبمدح الدواسر شرهتي تلحـق الاقـلام=وحبرك أبمدح الدوسري ياقلـم شمـه
يفوح العطر بكتابتك مع صبا الانسـام=هل المدح لهم المدح واللاش له ذّمـه
سلامي لديرتهم واهلهـا سـلام اهيـام=تحيات مشتاق اللقـاء طـاوي العّمـه

بعض قصايد الدواسر في المعركه ويحق لهم ان يفتخرون بفعل اشاد لهم به الجميع

وهذي قصدة بداح المصارير

حنا هل الجمع الرزين الراسـي
دواسر نعطي العيون ذرورهـاا
اليا وزانا مـن ترهـي طالبـه
في ضفنا يرقي بعالـي قورهـا
يشهد لنا (ابن مطرف) يوم ابتلـي
جرناه وانجيناه من مصطورهـا
جانا الشريف بدولته وجرودهـا
ومعصب ماعاد يسمع شورهـا
وعين رجال مايداس لها الحمي
وشلف يروي حدهـا مرورهـا
ابصر بعد عمياه والجيش اندمر
ضاقت عليه افجوجها وبحورها
وعود بقومه والجموع مشتتـه
تشكي الوني من ضربنا بنحورها

وهذي قصدة شلعان بن ظافر

واذكر (ابن مطرف) راعي الجنيـه
يوم عدته القبايل من حماهـا
جاء وحطيناها بحصـون ذريـه
يستريح ابها الزبين اللي نصاها
خايـف مـن ضربـات ادوميـه
الشريف ضربتـه محـد قواهـا
بيرقه يطـرخ وساقتـه المنيـه
رايته صبيـان زايـد اكسراهـا
كن طرق الخيل حالوب ابرديـه
لقبلت هـذي وهاذيـك تحداهـا
لين ضاقت بالشريـف الجندليـه
وحولوبه من ظهرهـا وقلعاهـا
والفخر قوز الشريف اصبح سميه
تربيـة صبيـان زايـد رسمهـا

وانا اضع القصايد وخاصه من راعي السالفه بن مطرف وشهادة رجال يام العجمان فيها
وهم محايدون ويذكرون فعل الدواسر واشادو فيه ووثقوها بقصيدهم
وانا في منتدى العجمان وفي وسط العجمان



ولكن اعلم من سياتي ويشكك لكن الجبل ما يهزه ريح

وتكفيني قصايد العجمان ولا اظن احد يشكك فيهم وذكرهم الحقيقه

لكن اقول من يطلب مصدر فا المصدر القصيد من ناس محايدين ومعروفين ولهم ثقلهم ووزنهم ومن يشكك فيها فهو يشكك بهم

[فيصل بن حجرف]

حياك الله اخي الكريم الناشب ولاهنت على هذه المشاركه الرائعه
ولو اني لست ملم بالتاريخ حتى لاتتهمني بأني اشكك بالموضوع كما قلت
ولكن ماهو الداعي لكي تقول انك تعرف ان هناك من سيأتي ويشكك به؟ فأنت بذلك تفتح المجال للتشكيك حتى من خلال سردك للموضوع وبقولك ان هذا مصدر محايد وهذه شهاده من فلان ومن فلان.

الاد زايد افعالهم معروفه من قبل هذه القصه ومن بعدها ومهما كتبنا عنهم او مدحناهم فلن نوفيهم حقهم وموافقهم مع العجمان كثيره ولاهي غريبه عليهم

[الناشب]

المشاركة الأصلية كتبت بواسطة فيصل بن حجرف

حياك الله اخي الكريم الناشب ولاهنت على هذه المشاركه الرائعه
ولو اني لست ملم بالتاريخ حتى لاتتهمني بأني اشكك بالموضوع كما قلت
ولكن ماهو الداعي لكي تقول انك تعرف ان هناك من سيأتي ويشكك به؟ فأنت بذلك تفتح المجال للتشكيك حتى من خلال سردك للموضوع وبقولك ان هذا مصدر محايد وهذه شهاده من فلان ومن فلان.

الاد زايد افعالهم معروفه من قبل هذه القصه ومن بعدها ومهما كتبنا عنهم او مدحناهم فلن نوفيهم حقهم وموافقهم مع العجمان كثيره ولاهي غريبه عليهم

طويل العمر فيصل بن حجرف

لا هنت على المرور ووجهك ابيض

واقول عداك العيب ونعم بك وبربعنا العجمان

وياخوك عشان محد ينط علينا ويقول مفبركه ولا يقول بدون اثبات
وعشان كذا حطيت قصيد العجمان بساميهم اللي وثقو السالفه قبل قصيد الدواسر عشان محد يقول مركبين القصيده والقصه
لكن طال عمرك السالفه هذي معروفه
وبارك الله فيك وشهادتك نعتز فيها

[>< ابن جريس ><]

هذي فعولنا ماهي غريبه يا الناشب

حنا الدواسر ممنة كل خايف حنا ودينا جارنا من جداره


يابن الحلال علومنا وعلوم العجمان دايما طيبه وهذي السالفة تثبت لكم مدى العلاقه الوطيده بيننا .

والله لا يهينك على الموضوووع الرائع

[فيصل بن حجرف]

للأسف ان هناك بعض الأخوان لايقنهم اي شي
ويعتقدون ان كل تاريخ هذه القبائل موثق بالكتب ولكن في الحقيقه اكثر مايستند عليه ابناء القبائل في نقل تاريخهم هو الشعر

لكن الشي المحزن هو مانراه من بعض الاخوان في ردودهم من التعصب الجاهلي لأمور مضى عليها عشرات او مئات السنين وللاسف انهم يستخدمون اسلوب غير لائق للنشر يظطرنا كإدارة ان نقوم بحذفه وبحذف بعض ردود الاخوان اللي ردو عليهم

لذلك كلي رجاء من الاخوان ان يتقيدو بقوانين المنتدى والا سنقوم بحذف هذه المشاركات وفي حال تكرار الامر سيتم وقف الاشتراك
نتمنى ان يكون النقاش بدون تعصب فالهدف مه منتديات ومواقع القبائل هو حفظ تاريخ هذه القبائل ولكن في نفس الوقت لا نريد ان نخلق جوا مشحون بالكراهيه بين ابناء هذه القبائل من خلال بعض المواضيع اللتي يكون اسلوب النقاش اقل مايقال عنه غير لائق

[تركي بن خالد]

مشاركة

للأمانه رغم أن هذه القصة قد تكون غير معروفه لدى القبائل ومنها العجمان

الا اني سأشارك بما يفرضه على منهجي

أولا سمعت مفردا شيء يدل على هذه القصه من شخص عتيبي منذ سنوات عديده يذكرها في الحجاز وهو لم يذكر القصة كامله كما أتوا بها الأخوان هنا .. بل ذكر لي عن عجمي كان صديقا مقربا لشريف الحجاز (( قبّل )) أو اشتم به الشريف رائحة عطر زوجته .. فكتم ذلك وأراد قتله فشعر العجمي بذلك فهرب ولجأ نجد عند الدواسر!

وسياقها غريب .. فما دخل العجمي هذا بالحجاز فليست أرضه ..

ولكن بداح بن مطرف .. عرفت أنه من شيوخ آل حبيش عاش في زمن بعيد قبل آل حثلين وقبل ابن جلبان .. ربما لهذا السبب هي غير معروفه لأنها قديمه جدا قبل قرون عديده أو ربما دخلت عليها آفات الحديث وهي رواتها .. فكل الاحتمالات وارده

وهذا ما أحببت ان أوضحه .

[خيال العبية]

اخوي الناشب الله لا يهينك على إيراد القصة المعروفة لدى الجميع


و لا عدمناك يالغالي و ننتظر جديدك .


تقبل تحياتي / خــــــيـــــال الــــــــعــــــــبــــــــــيـــــــــــة ,,,,,,,,,,,,,,

[الناشب]

اشكر الجميع على المرور

والله لا يهينكم

وما قصر اخوي تركي بن خالد

لكن طال عمرك اذا فيه قصيد يثبت فهي شهاده بالوقعه

وخاصه اذا كان في القصيد من ناس محايدين ومعروفين

ولكم جزيل الشكر

[صالح الشمري]

ونعم والله بالدواسر قول وفعل ونعم بالعجمان مانقلل من قدرهم فهم غالين بعد 000

واشكر اخوي الناشب على الموضوع 000

اخوكم : الشمـــــري

[الدوســــري]

بداح بن مطرف العجمي اللـه يـرحمـه , كفـووووو , يستاهل العجمان ربعنا وفدوتن لهم



الناشب اخوي بارك الله فيك , على النقل الرائع واستمتعنا فيه من القراء وعلى قولت الاخ العزيز: فيصل بن حجرف , الاستدلال عند القدماء بالاشعار وانت مقصرت اتسدلين بالاثنين .


لكـن يخوك والله مالومك بلي قلته لحد يشكك , كلن من عنده ذا النت ومن وراء شاشاه يدخل ويشكك بعلوم القبايل , لكن الاخوان هنا منصفين كما هو عادتهم وعادت المسلمين .


واشكرك مره اخرى عزيزي وصح لسان الشعار العجمان والياميه , والله يرحم جميع الاموات .