قصيدة .... (( طعنة صدوق )) .... أحد كتاباتي .!

[فـ ـالـ ـح]

السلام عليكم

حاب أشارك معكم في أحد قصائدي وأتمنى أن تحوز على رضا الجميع .

خلاص برحل دام هذا اختيارك
دامك تبي لا ارسل ولا اتصل فيك
/
ماني مصدق كيف تكوي بنارك
وانا اللي اخذ من همومك و اواسيك
/
نسيتي طيبي يعنبو جد دارك ؟
نسيتي منهو عاشق(ن) كان يغليك ؟
/
نسيتي شخص(ن) يعشقك في وقارك ؟
نسيتي منهو يالوفيه يسميك ؟
/
نسيتي خل(ن) صادق(ن) يوم زارك ؟
يوم المطر عند (التجاري) ألاقيك ؟
/
قاطع طريق الموت شفق لسمارك
يا مرحبا بالموت يومه في عينيك
/
قاصد لشوفك مانيب عجل(ن) ومارك
خاتم جوازي وأقرا (الكويت) تحييك
/
كنت إتمنى قربي لوني جارك
كنت إتمنى اصير ظل(ن) يباريك
/
أسهرك طيفي لين يقبل نهارك
حتى قصيدي عن صلاتك يلهيك
/
وأنا أحمد الله يوم بانت أسرارك
سهله عليك - طعنة صدوق(ن) - يصافيك
/
يا قو قلبك يوم بنيتي جدارك
خسرتي اللي للجروح كان يداويك
/
عفتي شجاع(ن) ما انحرف من مسارك
يومه على درب الشرف كان يماشيك
/
مره طلبتك اكشفي عن خمارك
وهزتني الغيره شرف وانا ابغيك
/
لو ابن عمي ذابحك قمت بثارك
كنتي عظيمه يا غلا من يساويك
/
جف الغلا يا بنت ما تفيد امطارك
ما عاد لي قلب(ن) يفز لأجل طاريك
/
وما عاد لك حر(ن) يجول في مدارك
وما عاد لك قرم(ن) لا ضقتي يسليك
/
ماني بميت لا قطعتني اخبارك
شوفيني ( عادي ) يوم قلتي بخليك
/
لأني رجل(ن) شامخ(ن) من كبارك
ضاري على جزل العطا يوم انا اعطيك
/
لوني ضامي قريب من انهارك ؟
اموت ولا اشرب من صفا بيض اياديك
/
هاك الهدايا وخط فاين تذكارك
يالله عسى من نار فرقاي ينجيك
/
يالله عسى عمري بدونك يتبارك
اسكت و وفر لا تكثر رجاويك
/
برحل وعارف فراقي مهوب سارك
رحله بلا رجعه عسى يالله يجازيك
/
ما عاد يهم ( الهاجري ) كبر أعذارك
من عقب منتي نجمه ألحين أوطيك
/
هذا قراري دام هذا قرارك
دامك تبي لا ارسل ولا اتصل فيك



وسلامتكم

[بحوور]

فـ ـالـ ـح


يالله حيــــه

صـــــح كـــــلك مليـــــــوون

ولاهنـــــــــت ،،





أختــــــــكـ

[مزيونة]

صح لسانك والله كلمات جميله

[فـ ـالـ ـح]

المشاركة الأصلية كتبت بواسطة بحوور

فـ ـالـ ـح


يالله حيــــه

صـــــح كـــــلك مليـــــــوون

ولاهنـــــــــت ،،





أختــــــــكـ

والبقا

وصح بدنتس اختي
ولانتي

ومشكوره على المرور نورتي الصفحه كأول الواصلين

[فـ ـالـ ـح]

المشاركة الأصلية كتبت بواسطة مزيونة

صح لسانك والله كلمات جميله

صــحـ بــدنــتــسـ

حـضـورتـسـ الأ جـمـلـ

[منصور بن منيخر]

فالح لا هنت جزل وبيوت لها معني وتستحق الاطراء لا هنت مره اخري

[فـ ـالـ ـح]

المشاركة الأصلية كتبت بواسطة alsufran

فالح لا هنت جزل وبيوت لها معني وتستحق الاطراء لا هنت مره اخري

ولا هنت طال عمرك

مرورك هنا أثلج صدري وأسعدني كثير

ومرورك عز وفخر ولا تحرمنا ( طلاتك )

تقبل خالص احترامي وتقديري
فالح بن ناصر

[فلاح بن ملبز]

صح السانك يا فالح على القصيده الممتازه

[فـ ـالـ ـح]

المشاركة الأصلية كتبت بواسطة فــلاح آل مــلــبــز

صح السانك يا فالح على القصيده الممتازه

مرحبا بك تراحيب المطر

صح بدنك طال عمرك

واسعدني حضورك

[العبرةالحائـرة]

وأنـا أحمـد الله يـوم بانـت أســرارك
سهله عليك - طعنة صدوق(ن) - يصافيك


صح لسانك ياخوي ... ابدعت