الى صاحبي......؟

[ثواب بن زيد الحارثي]

الى صاحبي

.................................................

ليش صارت نظرتك صاحبي نظرة عيوف=وفي حياتي صاحبي ما طعنتك فـي قفـاك

كيف تسمع هرج واشي وهـذارٍ زهـوف=وانت ما شافت عيونك ولا لمسـت يـداك

كنت أحسبك مسندي يوم تشتـد الظـروف=بس يا ذيب الخلا وش ورا جـرة عـواك

أعرف أنك لا بغيت العشا تقـدر تحـوف=وانتبه يا ذيب يوجعك بطنك مـن عشـاك

جيت أدور حق مبغـا شفاعـه ومعـروف=جيت أوضح ما حصل من خطا هـذا وذاك

قلت شوف الحق واضع وكنك ما تشـوف=مير أنا مدري علامك ولا دري وش بـلاك

وين ضحكات الثنايـا وصفقـات الكفـوف=يوم أعبر عن شعوري وحسسـك ابغـلاك

صرت في موقفك مثل النقاط ابلا حـروف=عرفتنـي مستـواي الكبـير ومسـتـواك

وشفت في موقفك عله وفي شمسك كسـوف=وشفت في حاجبك تعبير واضح عن رضاك

قلت أفارق عنك وأقفي بتعريض الكتـوف=بعد خابت هقوة اللي عنـا يمـك وجـاك

وش شعورك يوم لفت الضلوع العوج لوف=وش شعورك تعترف في خطا ما هو خطاك

ولا تضيع إلا حقوق الزلايب والضعـوف=ويلزمك تعرف ثواب ابطريقـه محتـراك

لا تحسبني بتجريحـك القاسـي عـزوف=وقفتي هـي وقفتـي مـا يغيّرهـا جفـاك

ولا يداوا الجرح فيني شعورك بالحسـوف=مير يا جرحي تـرا البعـد والفرقـا دواك

وخاطري يا هيه لا تحسبه خاطر هنـوف=تكسره أو تجبره مثـل مـا يبغـا هـواك

خاطري خاطر بعيد المرامـي والشفـوف=واملك الرجال بالجـود والطيـب امتـلاك

وجعل يبتر عظم ساقي من ارهاف السيوف=لو اشوف الموت ما خضع لمثلك أو سواك

لـو تفرشنـا الجريـد وسكنـا فالكهـوف=(عهد) يا قلبي لداويك وابـلا مـن بـلاك

زود بعنـادك وزود التصـدي والوقـوف=يا بلغنـا قمـة العـز يـا نهلـك هـلاك

ما نحّـول مـن سنـام المعـزه للـردوف=ولا يخالط ريحة العود الأزرق عـود راك

ولا نعيش أبذل والقلب ما يدخلـه خـوف=والفنـا والمـوت واحـد هنـا ولا هنـاك

يالكتاب اللي جعلتك على الرف أمحـذوف=ويش تعني غير رسم الغلاف اللي زهـاك

لا حقيقة واضحـة لا معانـي لا وصـوف=من خطاي أني قريتك وأخطا مـن قـراك

شـــــــــعـــــــــر /
ثــواب بــن زيـــد بن نجا الـحـارثـي
thawab1398@hotmail.com

[عـزام]

ثواب بن زيد الحارثى

مرحبا ملايييين قصيدة تدل على قدوم شاعر متمكن.

والله يحييك فى محلك بين ربعك واخوانك وانضمامك يسعدنا ويشرفنا.

صح السانك واعتلا شانك

ولاهنت

[البخيت]

ما نحّول مـن سنـام المعـزه للـردوف
ولا يخالط ريحة العود الأزرق عـود راك

ولا نعيش أبذل والقلب ما يدخلـه خـوف
والفنـا والمـوت واحـد هنـا ولا هنـاك

ثــواب بــن زيـــد بن نجا الـحـارثـي
حياك الله
وصح لسااااانك ولاهنت على القصيده الجزله

[بحوور]

ثواب بن زيد الحارثي



ياللـــــه حيـــــــه

صــــــح كــــــلك مليــــــــوون

ولاهنـــــــــت ,,





أختــــــــكـ

[فيصل بن حجرف]

يامرحبا ومسهلا بالشاعر ثواب بن زيد الحارثى
وصح لسانك على القصيده الرائعه
ونتمنى ان نرى المزيد من ابداعاتك في هذا المنتدى

[العبرةالحائـرة]

يالكتاب اللي جعلتك على الرف أمحـذوف
ويش تعني غير رسم الغلاف اللي زهـاك



صح لسانك ياخوي

[فلاح بن ملبز]

يعطيك العافيه على القصيده الرائعه ولاهنت

[قرقاص]

هلا والله وغلا فيك يا بو زيد


ما شاء الله عليك من أول مشاركة فجرة هالقنبله المدويه !!!

حياك الله بينا ... وبيّض الله وجهك


تحياتي





أخوك

قرقاص

[فيصل المشوط]

السلام عليكم ورحمة الله وبركاته

ثواب الحارثي

صح لسانك وحياك الله بين ربعك

واخوانك في منتدى قبيلة العجمان

كنت أحسبك مسندي يوم تشتـد الظـروف=بس يا ذيب الخلا وش ورا جـرة عـواك

[ثواب بن زيد الحارثي]

الاخ عزام الموقر

بعد التحيه والتقدير

صح بدنك وسلم راسك وشكرا على مرورك المشرف

تقبل احر تحياتي