على فرقاه أنا وشلون أبصبر!!

[سند]

السلام عليكم ورحمة الله وبركاته

وبعــد القصيده ه ه .... أرجوو أن تنال على أعجابكم ورضاكم....


ألا يا قلبي اللي زاد ويله /*/ ولا حصّل من الدنيا حصيله

ليا منّه وصل غاية مراده /*/ يزيد الميل فـ الأيّام ميله

وإلى منّه سلا وإنساح باله /*/ يردّه للعنا طيفٍ يجي له

هموم الوقت تقبل به وتقفي /*/ ولا له مع هموم الوقت حيله

سوى طاري ليا منّه طرا له /*/ يخفّف عنّه حمولٍ ثقيله

ألا يا طاريٍ يروي عروقي /*/ بجسمي مثل وادٍ سال سيله

(عنود الريم ) من قلبي قريّب /*/ لكن شوفت عيونه مستحيله

وأنا ما بيني وبينه مواصل /*/ ولا حتّى صديقٍ نلتجي له

يا كود اللّي ذخرته للمواقف /*/ عسى حملي ولو ساعه يشيله

يوصّل له شعوري في رساله /*/ وينقل له خبر حالي وويله

أبو رمشٍ كحيل ولون خدّه /*/ كما البرّاق في صدر المخيله

وأبو عودٍ سوات الخيزراني /*/ يميل العود مع نسمة عليله

جماله من جمال الطرز الأوّل /*/ ولا يلبس معه برقع وشيله

هذا حول الشهر ما شفت زوله /*/ وطيفه في خيالي كل ليله

على فرقاه أنا وشلون أبصبر /*/ هذي روحي من الفرقا عليله

وألا يا لايمي باللّه جنّب /*/ لا تنشب في نحر عابر سبيله

ترى هذي نصيحه وإفتهمها /*/ قبل لا تروح مصحوب الفشيله

وقالوا بالمثايل فيه حكمه /*/ كثير الهرج يوفي به قليله



تقبلووا تحياتي يا أعزائي,,,,