حاولت ادور للخطا عندك اسباب
حاولت اشوف بعين ماهيب عيني
حاولت الاقي لك عذر يقبل عتاب
حاولت اضمك عمر تالي سنيني
حسبت لظروف الزمن عندي حساب
الا انت ماظنيت ظلمك يجيني
ظلمتني ظلم الموالين الاقراب
ياكيف تقهر من بذاتك سجيني
وهجرتني ذنب عن المغفره غاب
وجيتك غفور لكل ذنب مبيني
عطيتك اللي زاهد فيه وهاب
لاماتكاثرت العطا في يديني
وسلمتك المركب ولافيه ركاب
غير الذي زانك على راحتيني
واليوم مدري كيف ظني بعد خاب
وانا اعرف ان الحر وعده ثميني
اليوم هو اليوم تقتص الاعطاب
والله لاحني بنزف دمك يميني
والله لخلي دمعتك نور الاهداب
وابكي معك وابكيك وانسى حنيني
واعلمك ان الهوى فيك كذاب
وارجع واقول ان الهوى مبتليني
واطمنك بالحب..وافز مرتاب
واقول بعد الحب ..لاتحتريني
بالعب على قلب لعب فيه نهاب
واترك خيال الشوق بينه وبيني
واحكم على الشفه بمسنون الانياب
واصبح ياذا الموت لو تشتهيني
تعال وخذني لاتعذر بالاسباب
الوقت هو الوقت بعبر سنيني
وسلامتكم
بنت الجزيرة
04-12-2004, 01:49 AM
العرض الشجري