مثال رائع للحلم و الحب بين الاخوه

[alajmiali78]

السلام عليكم ومساكم الله بالخير

هذي سالفه لميزر بن زياد الطواله الشمري له اخ اكبر منه وعنده له فرس طيبه وكسرت مرتن وهم غازين ويقوم ميزر ويكسب اطيب منها ويهديها اخيه وصارت ثانيه وثالثه وكل ما كسرت فرس اخيه غزا ميزر وعوضه باطيب من الاوله المهم انه مرتن هو واخيه ماشين واخيه على الذلول وانت يا ميزر يسير على رجيله وصار بينهم مشاده بالكلام وقام اخيه يضربه بالعصا من فوق الذلول وقرب منه ميزر وخلاه يضربه وهو يضربه طاحت العصا من ايده وخذاها ميزر وعطاها اخيه يبيه يبرد كبده . وشافته وحده وخابره ميزر شجاع وقالت يا ميزر كيفن لك مارديت عليه وحتى لو انه اخيك وانت فارس ومعروف ورد عليها بقصيده يقول :

خيلت اخوي اشمرتن تروي الارماح = وذبحت وجبت اللي سوات المهاتي

ولاني مغوزها الا صاح صياح = لا صيح الراعي براس الفلاتي

ولو ان قلبي مع هل الخيل قد راح = اعنها ومعرقه لين ياتي

واليا ضربني بالعصا والعصا طاح = ناولتها مضنون عيني شفاتي

واليا نزرني مرتن والغضب فاح = اصد وكني وحدتن من خواتي

هذا عضيدي ماشين لي بالانصاح = ولا غبت عينه ساهره ما تباتي

ابيه قبل الموت غطاط الارواح = ناخذ على عدواننا الطايلاتي

وسلامتكم .