الشاعر غازي بن دغيم العجمي : قصيده غزليه

[سفير القصيد]

يا مرحبا ترحيبة الطش والرش

يا ام العيون اللي هدبهن مراييش

يا مرحبا ترحيبةٍ ما بها غش

احلى من الما للكبود المعاطيش

ترحيبة الولهان من خاطرٍ هش

في شوفتك عقب النيا والمطاريش

يا من لمفجوع الهوا الميت ينعش

قربك وبعدك موت ما فيه تفتيش

ارحم محبٍ في غرامك تبلش

شاف العيون وشاف شقر العكاريش

شاف الجمال اللي مع الناس يدهش

يسب العقول ومن بعيد المناويش

ادعج غنج منه االمعاليق تنحش

ليا تبسم بالثمان المباهيش

والخد براقٍ سرى الليل يرهش

جنح الدجا بين النصوب الرواهيش

الموت في نظرة عيونه ليا ارمش

لولا الرجا فيهن فلا ظني اعيش

عين اشقرٍ للخرب ما يبعد النش

يهوي عليه وظربته تنثر الريش

يا زين ما مثلك يبي لبس رش رش

ان كان قصدك زين لا عاد تبغيش

الله عطاك وكملك يا لموحش

يا ريم ياللي مرتعك فالنشانيش

عليك وجدي وجد من نطل القش

هجت ذلوله يوم طشوا هل الجيش

والطرش هج من المغيره مخرش

وصاح الصياح وقيل يا اهل القناطيش

وركبوا مرويت السيوف المعطش

ولحقوا على قب المهار المداغيش

وخلي وربعه ما دروا وينهو طش

افخت وناروا مبعدين المغابيش

وحالوا عليه اللي فشقهم محتش

كل ابلجٍ ينس براسه نغاميش

عليك ياراع الخظاب المنقرش

يا منوتي من لابسات الرشاريش

لا وا هني اللي على بيتكم دش

غصبٍ على ناس ترز الشوابيش

مبينٍ حبك ولاني بمنخش

وامشي بغي اهل القلوب المشاويش

كني غليث طاح بالناب ينهش

واللي يلوم مولع القلب حتى ايش

ماهمني منقود ناسٍ مرطش

اللي يدورون الردى والتفاتيش

وصلوا على اللي بالرساله مطرش

على النبي الهاشمي صفوة قريش


الشاعر غازي بن دغيم العجمي
وهو من عائلة آل دغيم ومن فخذ آل صالح

[نادرة المزايا]

قصيده رائعه وراقت لي

ماهمني منقود ناسٍ مرطش
اللي يدورون الردى والتفاتيش


صح لسان العجمي

ويعطيك العافيه,,

[ابورامي]

الله الله ابداع صح فكر ولسان الشاعر وتسلم يمينك

[الـعـابـر]

صح لسانك ولسان شاعرها

[●• Ŝђǿǿq •●]

أبيآت رآئعه
تِسلم يمينكـً ..~