السلام عليكم ورحمة الله وبركاته ..
الحلقة الأولى - ميلانو
ملاحظة .. تقريري مفصل على حلقات للأماكن اللي زرتها .. ماهو على الايام مثل التقرير السابق .. لأن التقرير هذا صوره اكثر بواجد ولو بحطها على كل يوم حلقة ماخلصنا من كثر الصور ..
لتسهيل التصفح للاخوان راح احط مكان كل حلقة هنا ...
الحلقة الثانيه ( فينيسيا - البندقية ) في الصفحة الرابعه
الحلقة الثالثه ( لوقانو ) في الصفحة الخامسة
الحلقة الرابعه ( الطريق إلى جنيف ) في الصفحة السادسة
الحلقة الخامسة ( جنيف ) في الصفحة الثامنه
الحلقة السادسه ( قصر فرساي ) في الصفحة العاشرة
الحلقة السابعة والاخيرة ( باريس ) في الصفحة الحادية عشرة
بسم الله ..
يقول الشاعر فيصل اليامي في مطلع قصيدة له عن السفر والصيف ..
يجينا الصيف وننتظره واذا عدا نبيه يعود=وونفرح به اذا جانا نقول الصيف لا يعدي
نحسب حسابنا بدري نفكر بالليالي السود=نفكر كيف نستانس وكيف نجيب ونودي
ندور للوناسه وين شباب وقدها وقدود=نسولف مع نجوم الليل ذوات المبسم الوردي
وباقي القصيدة مايلزمني ..طبعا ! لأن سفرتي عائليه ماهي شبابيه
بعد الاعداد للسفر وتحديد الوجهه .. توكلت على الله ولا على غيره .. وركبنا على متن اطلق خطوط .. القطرية جعلها بعد خطوطنا ..
اهلا بكم على متن الخطوط الجوية القطريه ... نتمنى لكم رحلة سعيده على اجنحة القطرية .. وبالفعل تم الاستمتاع بالرحله ... وهانحن فوق هام السحب .. وقربنا من الوصول لعاصمة الاناقة في العالم ...
لحظة الوصول الى عاصمة الاناقة ... ميلانو .. وفي مطارها واول نسمة هواء خالية من الغبار طبعا ...
وفي الطريق الى فندق فور بوينتس شيراتون .. ميلانو وهذا رابط موقع الفندق للي يحب يشوفه ..
http://www.fourpointsmilan.com
ومشاهدات الطريق .. اول شحاذ مستحل الاشارة للعمل ..
والمرور على المحطة الرئيسية للقطارات في ميلانو ...
وعلى بائع الزهور .. البنغالي طبعا ..
على فكرة ميلانو البنغاليه فيها اكثر من اللي عندنا بالكويت ... بس بنغاليتهم مو مثل اللي عندنا .. يعني شاعريين .. يبيعون ورد شزينهم .. مو مثل اللي عندنا مجرمين ... وهذا اولهم ..
طبعا بعد الراحه في الفندق وثاني يوم لازم تروح تنقض على اسواق ميلانو .. وعلى فكرة وقت وصولنا لميلانو كان مناسب جدا .. لأن اسواق ميلانو هي الوحيده تقريبا بالعالم اللي تسكر في يوم الاول من اغسطس وحتى الثاني عشر من الشهر نفسه للتجديد ... مو قايل لكم عاصمة الاناقه ؟
وهذا حنا في شارع بيونس آيرس .. اشهر شارع للتسوق في ميلانو وهو شارع كبير جدا والاسواق على يمينك ويسارك حتى نهاية الشارع اللي يسمونها الطليان ارجنتينا !
هذا اللي خلاني احب الشارع طبعا .. بما اني ارجنتيني
... اسم الشارع على عاصمتهم ونهايته على ديرتهم .. طبعا فيه كلام محظور كان على اللوحه السوداء الحمدلله ان واحد من الشباب نبهني عليه ولحقت امسحه قبل احط الموضوع ..
طبعا فيه مكان كل من ينزل في ميلانو لازم يزوره بالغصب ... وانا عن نفسي كنت كل يوم اروح للمكان هذا واتمشى فيه واقعد بالقهاوي اللي عنده .. وهو ساحة الدومو الشهيره .. واعتقد انها غنية عن التعريف ..
وهذي كاتدرائية ميلانو الموجوده في ساحة الدومو ... مبنى ضخم مخيف ... خاصة بالليل شكله مرعب ..
وهذا تمثال في ساحة الدومو ..
ويطل على ساحة الدومو مجمع جاليريا .. اقدم مجمع تجاري مغلق في العالم واعتقد اللوحه تبين تاريخه العريق ..
وهذا المجمع التجاري من الداخل ..
ولازم انك تجرب القهوه في الكافيهات العريقه بالمجمع العريق ..
وهذا يسلمكم ربي مكان موجود في منتصف المجمع وقصته قصه .. وهو عباره عن قطعة رخام زرقاء وعليها رسمة ثور عزكم الله .. يتجمع عليها السياح من كل حدب وصوب .. وعندهم خرافه تقول انك لازم توقف فوق الرخامة الزرقاء على طرف رجل وحده وتلف على نفسك لفه كامله وبعد ماتكمل اللفه تقول امنيتك وراح تتحقق لك .. وشوفو الخبلان وش كثرهم عندها يبون امنياتهم تحقق ..
وخلف المجمع نفسه لازم انك تمر وتشوف تمثال راعي الشفره ... تمثال ليوناردو دافينشي ...
وفيه بالمجمع محلات الماركات كلها لكن مالفت نظري غير قوتشي ... قولو ليش ؟
لأن فيه كافية قوتشي الوحيد بالعالم ... ولازم عليك انك تمر تقهوى عنده .. علشان تحس انك تتقهوى بفخامة الماركه .. !
وبعدين انت في ايطاليا ... معقوله ماتجرب البيتزا ؟؟
ومايعجبني في ميلانو ... هو ليلها الحلو ... وشوارعها في الليل .. طبعا مو كل شوارعها .. . الشوارع القريبه من الدومو .. لأنها اوربيه قديمة .. مو مثل باقي الشوارع اللي عادة ماتكون عادية مثل ماشفتوا في شارع بيونس آيرس ..
طبعا فيه مشاهدات في ساحة الدومو .. لازم ان الواحد يصورها ويصور لحظات جميلة لأصحابها ... .. يعني البورتريه لزم يكون متواجد طبعا ... بزرانهم ودك تاكلهم صراحه ...
وحتى بزران الخليجيين بعد ودك تاكلهم .. بس مايطولون .. من يوصل عمره 5 سنين يقل حلاه
.. طبعا نسيت اقولكم ان ميلانو فيها عدد اخواننا السعوديين بشكل رهيب جدا ... تارسين ميلانو ما شاء الله ..
وفي آخر يوم لك في ميلانو ... لازم تصور مشهد وداعي لآخر يوم فيها ... وتودعها وداع يليق فيها ...
مؤثرة الصوره صح ؟
وتروح لساحة الدومو تسهر فيها الى بعد نص الليل ..
وجه من ميلانو ... طبعا هذي فقره راح تكون بكل حلقاتي .. كل مكان اجيه لازم اصور لكم وجه من الديره .. وهذا لحلقة اليوم ..
وجه من ميلانو .
ملزوم انك تشوف لك بنغالي حلو مثل الحلو هذا
مع وجه ميلانو اكون وصلت معاكم لنهاية الحلقة الاولى ..
وآخذ منه ورده ... علشان اهديكم اياها واجهزكم للحلقة الثانية .. ونشوف جمال فينيسيا ... المدينة العائمة
اترككم في رعاية الله وان شاء الله تكون الحلقة اعجبتكم ولنا لقاء في الحلقة الثانية ان شاء الله ..
هاكم الورده نسيتها ...
سلام يا أحباب ... ولقاؤنا ان شاء الله في فينسيا .. العائمه الجميله ...
26-08-2010, 03:25 AM
العرض العادي
