السـدحـــــــان

[بن زيد القضاعي]

واسمحوا لي بإضافة هذه القصيده للشاعر الشاب / أحمد بن عبدالعزيز الثنيان وقد قالها في اجتماع السدحان السنوي بمدينة شقراء يوم الخميس الموافق 22/3/1427 هـ .

جازلي بدع القصيد وقلت ياربي تعين
بالقصيد اللي خذيته ورث من جداني
شاعر توي صغير السن لكني فطين
ورث أبوي ورث جدي السابع حميدانيِ
قلت ابكتب لي قصيدة في وجيه الطيبين
في بني زيد القصايد تخجل القيفاني
كل بيت يقال فيهم حتى لو انه سمين
في عيوني ما وفاهم لو غدى روياني
إن كتبته في وفاهم بيتي القاسي يلين
وان كتبته في كرمهم يروي العطشاني
وإن كتبته في شجاعتهم على مر السنين
جبت شعر من صميم القلب من وجداني
وان كتبته في أخوتهم تملكني الحنين
كن هذا عمّي الواقف وذولا أخواني
يا القصايد لو كتبتك من رحيق الياسمين
ما وفيتك دام صرتي بجمعة السدحاني
جمعة شيوخ القبيلة انتظرها كل حين
حيثي القى بينهم فخر ورفعة شاني
فيهم الراي السديد وفيهم العقل الرزين
وفيهم الشيخ الإمام العالم الرباني
وفيهم الوجه السموح وفيهم الطبع الحسين
وفيهم النخوة من الشيبان والشباني
يا بيوت الشعر جيتك من يسار ومن يمين
احشميني حشمتك لنابغة الذبياني
اسمع القول المفيد واعرف العلم اليقين
بوش.. قبل بلير.. قبله هتلر الألماني
كل منهم بيتمنى لو لزيدٍ منتمين
وان نشدته قال أنا أصلي من آل فلاني
بس يخسون الكلاب.. والشيوخ مكرمين
واعذروني جتني حمية وزل لساني
وين حنا يا نسل سدحان والكفار وين
وش يجيب الحر الأشقر لسود الغرباني
حنا فينا العود قلبه عمره دنيا ودين
والشباب القرم فينا مشمر الذرعاني
والولد فينا عزيز النفس لو ماله عوين
والنساء فينا بهن عفة وزود إيماني
وحنا فينا البنت تاخذ من طباع الوالدين
كنهن الدر والياقوت والمرجاني
منين ابتدي ياقصيدي بس خبريني منين
كيف اببدى.. كيف ابنهي قصة الولهاني
والله إن شقراء تزايد نورها نور يبين
لحظة فيها تجمع من بني عماني
ياكثر ماكنت أفاخر بالشيوخ المنصحين
ويا كثر ما كنت أفاخر لان شقراء أوطاني
حافظ حبك ياشقراء حفظي الشي الثمين
يوم أحفظها بقلبي ويوم وسط أعياني
انتي يا شقراء تمني و اطلبي شلي تبين
دونك أرقاب النشامى نقهر الطمعاني
استعين الله لحبك وادحر بليس اللعين
حيث أشوفك نور عيني،وقلبي،وشرياني
ياعسى ربي يحرسك من عيون الحاسدين
ويا عسى ربي يديمك للوفا عنواني
في بني زيد القصايد كل بيت اسمعه زين
ولا سمعت أمجاد ربعي القصيد أغراني
بآل سدحان القصايد كنها الدر الثمين
وزان لأحمد في قصيده واسمع القيفاني
شاعر توه صغير السن لكنه فطين
من بني زيد القبيلة... والفخذ سدحاني
والختم صلوا على اللي خاتم للمرسلين
الرسول محمد اللي من نسل عدناني

وسلامتكم .