ديوان الشعر لقصائد راكان بن حثلين - الصفحة 2

gft · #11 06-02-2004, 02:25 PM

قال المعيضي بالضحى يبدع القاف = في دار سمحين الوجيه الكرام

عسى لهم بآيات من حج وطاف = عز لحاضرهم وللحي دام

ياركب من عندنا فوق هياف = بتيل ساج ومقتفيه الولام

فلا دعم صدره على بعض الاسياف = والا ثلاث يشتهن الولام

بواطن يشدن الادمى بالاوصاف = وان زرفلن يشدن لجول النعام

يمشن ثلاث عقب الاوما والاصلاف = والرابعه يلفي لولد الامام

سلم على ربع كما وصف الاشراف = واختص ابة تركي برد السلام

سلام احلا من لبن كل مشعاف = واحن وانوج من عنابير شامي

ولفتها ياشيخ من كل الاطراف = نمرا كما وصف الجراد التهامي

والله لولا جمعك اللي له ارداف = دولة هل العوجا سواة النظام

لني لاعد لهم على كل مزقاف = علم يردونه جديد وعام

مطارق فيها غلب كل هياف = وحدب الظهور اللي تقص العظام

والكل ينكس عايف عقب ماشاف = غصب ودورات السبايا دوام

عاداتنا لاما التفت دلق الاشناف = ثم رودعوا سرد الرمك بالاولام

في ماقف خطر على الروح باتلاف = في روشن غني بركنه حمام

ودموع عيني فوق الاوجان ذراف = وفي الرجل طبيلن حلقهن احكام

ننسف على الطوعات زينات الاطراف = مابين مصري وما بين شامي

ودروع منعات ثقيلات لصاف = متحزمين فوقهن بالحزام

ولا اقبلت حومه زرفهن كما القاف = ثم حل ستر معورجات الوشام

عاداتنا عند المظاهير تنشاف = ونركض مراكيض ترمي الكهام

ونحري برمي الشيخ وان جن زلاف = نرميه بين الخيل مثل المقام

ماهي بهرجة شاعر يبدع القاف = طول لسانه فعل ولد الامام

حنا ترانا علته بين الانجاف = نقزي عيونه عن لذيذ المنام

وقبله لو نازح يرجف ارجاف = ونصبحه لا اباج نور الظلام

والله ان ننزل بين بوشه والاسلاف = ونودعه يترك حلته والجهام

زيجنب الخفرات زينات الاوصاف = وبيض الترايب زاهيات الزمام

كنه خريش بدل العقل باهفاف = واسباب ما خفه فعول قدام

ليتك لنا ياشيخ بالعين تشتاف = يوم اقبلت دولات صبين يام

معهم افرنجي لحسه تقصاف = مثل الرعد في مدلهم الغمام

حنا ذرا الديرة عن البرد ولحاف = ومن زارها زرناه قدنا شمام

ياشيخ نا ارسلنا نبي منك محذاف = قوم تبني من ورانا الخيام

بين الضفيري والمطيري وعساف = ننزل ولو جانا النذر والزحام

ويروح في زملة كثير التعجاف = ولا خير في هرج بليا تمام

حنا كما حر تعلى بمشراف = وصيده من الجل الحباري الجسام

جاه اسمر في صايده جداه التلهاف = فعلك جعل للي مغل كلام

وصلاة ربي عد من حج وطاف = على النبي ما حج بيت الحرام

نتمنى مشاركة الجميع
في جمع ديوان
راكان بن
حثلين
أعطر وأرق
تحياتـــ ي

gft · #12 06-02-2004, 03:12 PM

اخواني اخواتي
لازال هناك الكثير
من قصائد الأمير الراحل
راكان بن حثلين رحمه الله
وأسكنه فسيح جناته الواسعه
ويسعدني ان اضع بين ايديكم كل
مايقع بين يدي واقدمه لكم كهديه
متواضعه مني لكم ولهذه الشبكه الشامخه
بجهود القائمين عليها وبجهود اعضاؤها المخلصين
لها ويودون خدمتها من اي طريق كان
وكلنا مجتهدون في سبيل الوصول
الى اعلى مراتب لما تحمله
من اسم لامع يحمل
قبيلة العجمان
نرجو تكاتف
الجميع في
البحث عن
القصائد
اليكم احدى اروع
قصائد الأمير الراحل
راكان بن حثلين ردا على
امير قبيلة قحطان أبن قرمله
ارجو ان تحوز على اعجابكم
وهي من اروع قصائده
رحمة الله عليه

ياراكب حر تذرب سنامه = عليه ني راكب نيه العام

ماصك لحيه في ليالي فطامه = وعظمه قوي من لبن كل مرزام

الى ورد عد يطير حمامه = جا للصريمه من لحيه تقصام

تلفي لابن هادي كبير العمامه = شيخ ورمحه مع هل الخيل مرسام

مر يواعدنا بحرب وقوامه = ومر يجينا منه هرج وتسلام

حي ذا الكلام ومن هو كلامه = اللي لفانا منه هرج التوهام

وش الجزا ياشوق زاهي الوشامه = بالسابق اللي ماعرفنا له اوقام

كزيت لك نور السلف والجهامه = باغيه ذخر في مقابيل الايام

وغديت انا وياك مثل النعامه = جاها بلاها من ثقيلات الاقدام

ان كان تبغي سابقك والسلامه = فلا تحول بالجحادر على يام

حرم عليكم النوط تطلق بلامه = مادام عنده واحد من ضنى يام

معنا الطويل اللي تجيكم علامه = مثل العديم اللي على الجول صرام

الترك قبلك زارنا به زعامه = وقد عافنا واختار عنا هل الشام

ان كات تطري حدرتك بالجهامه = لما توصل بك لهذيك الارجام

ذي ديرة الحاكم كبير العمامه = اللي نحى عنها طوابير الاورام

قدامكم شيخ رفيع مقامه = الخيل قرح وابيض الخد قدام

وان رادها غيره ضربنا رثامه = عود يبدل هفوته بالتندام

يالله عسى الفردوس ملقى عظامه = اللي بعث دين النبي دين الاسلام

مثل الدويش اللي يقدي الجهامه = عرقت جواده فوق رجله والاقدام

وان كان حدر لابته من تهامه = حنا لهم في مقطع الصلب قدام

اقبل وحنا لك نسوي كرامه = شلف على شهب سريعات الاولام

تسعين رمح كسرن في عدامه = عشلاين منهن بين راكان وحزام

كم ثار عند ركابنا من كتامه = ياما هلك من ضدنا من سبب يام

كم من حريب دارج الدم دامه = يشبع بها السرحان والطير لا حام

حنا كمنا سيل تنحى غمامه = هامل بردها بالفرنجي والاورام

سيله يقزي مانحا من عدامه = ورعودها منها المدن له تقصام

كم سيف هندي فضخنا لجامه = بايماننا كنه مقابيس الاظلام

نروي من ارقاب السكاري جيامه = في هية يشبع بها كل حوام

ونطعن لعين عريض سنامه = شقح مفاليها مباكير الاوسام

ان كان ودك عندنا لك كلاامه = وتدري بضيفتنا لك الشرق والشام

اقبل علينا حي سوق المسامه = وعاداتنا نغلي جلب كل سوام

حريبنا تصبح بكبده ندامه = وبراية الله والقدم ناحر يام

وصلاة ربي عد ما انشي غمامه = على النبي خصة الله بالاكرام

وســـلامتكـــــم
نرجو تعاون الجميع
في جمع ديوان
الأمير راكان
بن حثلين
أعطر
تحياتــــ ي

الخويطري · #13 06-02-2004, 03:22 PM

لأهنت يالعجمان

وبيض الله وجهك على الجهد ولأهنت مليار , ولي رجعه هنا انشالله

وتقبل تحياتي

الخويطري

gft · #14 06-02-2004, 03:35 PM

الغالي
الخويطري
ولانت ياسنايدي
الشكر موصول لك
استاذي الفاضل
اتمنى تكون عودتك
محمله بالقصائد الجزله
كما هي عادتكم
لاتاتون سوا
بالسمين
اعطر
التحايا

admin · #15 08-02-2004, 04:44 AM

هلا باخي العجمان وحياك الله وشكرك علي هذه المشركه اللي اكثر من رائعه
واتمنى من الاخوه الاعضاء من لديه قصائد لشيخ راكان ان يضعها في هذا الموضوع ليصبح كا ديوان نتعرف علي قصائده كما اسماها الاخ عجمان نوادر راكان بن حثلين .

أخيكم ابوفيصل

الخويطري · #16 09-02-2004, 04:55 PM

(((((((( يافاطــــــــري ))))))))))

يا فاطري ذبي خرايم طميـّة // الى اشمخرت مثل خشم الحصاني

ذبـي طمية والفياض العذية // تنحّـري برزان زيـن المبانـي

سلام اخو نورة لزوم ٍ عليّه // قبل القريب وقبل قاصي وداني

والى قضيت اللازم اللي عليّه // اللازم اللـي ما قضاه الهداني

الجدي حطيته بورك المطيّة // وافرق نحرها عن سهيل اليماني

نبغي ندور الطفلة العسوجية // ريحة نسمها كالزباد العماني

تباشروا بي عقب سابع ضحية // وانـا علـيّ ابرك ليالي زماني

خبـّي وانا راكان زبن الونيّه // ما ياخذ الفضلات كود الهداني

خبـّي خبيب الذبيب بالجرهدية // ليا طالع الشيهان واللي داني

لومي على الطيّب ولومه عليّه // هو ليه ياخذ عشقتي ما تناني

ليته صبر عامين والا ضحيه // يـما يـميّز غربتي ويش جاني

إما غـدا راكـان بالمهمهية // والا ظهر يصهل صهيل الحصاني

حريبنا اليا اهدى علينا هدية // عندي مجازاته مثل ما جزاني

نسهج محله لين يخلف نويّـه // يصبر كما يصبر جديع الاذاني

من القطيف الى النفود محميّه // الا ان يـمشيها خوي ٍ وعاني

افعالنا هذي علينا وصـيـة // فرض علينا مثل فرض رمضاني

الصدق يظهر من حباله رديّه // والكذب يقطع من حباله متاني

الخويطري · #17 09-02-2004, 04:57 PM

((((((( لا واهني ))))))))

لا واهني يا طير منهو معك حـام // والا انـت تنقل لي حمايض علومي

إن كان لامن حمت وجهك على الشام // أيسر مغيب سهيل تبغى تحومي

باكتب معك مكتوب سر ولا لام // ملفـاه ربـع ٍ كل ابوهم قرومي

سلم على ربعٍ تنشّد بالاعـلام // لا واهنـي مـن شافهـم ربع يومي

ومن سايلك عني فانا من بنـي يام // من لابـة ٍ بالضيق تقضي اللزومي

ربعي ورا الصمان وانـا بالاروام // من دونـهم يزمـي بعيد الرجومي

ومن دونهم حوران ضلع ٍ بعد زام // دار ٍ اهلها ما تعـرف السلومـي

حال البحر من دونـهم له تليطام // ومن دونـهم مايات موج ٍ تعومـي

من عقب ما سيفي على الضد حطام // اليـوم سيفي جادعه صار شومي

صارت سوالفنا معه مثل الاحـلام // مالـي جـدا يكود عد النجومي

لامن ذكرت رمـوس عصر ٍ دام // قمت اتـململ والخـلايق نيومي

يالله ياللي طالبه ماهـو يـظـام // تفـرج لشخص ٍ لاجي ٍ عند قومي

الله من عين ٍ لها سبـعـة اعـوام // تسهـر وتبكي من كثير الهمومي

الحال باد وباقي ٍ جسم واعظـام // كنـه مـريض ٍ واقع ٍ ومحمومي

وقعت انا في ديرة ٍ ما بـها اسـلام // والبـن الاشقـر ما يدار معدومي

سجين سجن ولاجي ٍ عند ظـلاّم // ودونـي بـحور وبالحديد محزومي

والجفن يسهر تالي اللي مـا نـام // ومن جملة الكيفات صرت محرومي

وعزي لمن مثلي عليه الدهر هام // مقصور رجل ولا جزع ما يشومي

وصلاة ربي عد من يلبس حـرام // وعداد مـا تذري ذواري سمومي

الخويطري · #18 09-02-2004, 04:58 PM

{يـا ونـتـــي }
يـا ونـتـي ونـت خـلـوج تـسوفـي &&& عـلى مـكان حوارها تعول اعوال

لأبو دليقي فوق متنه صـفـوفـي &&& راعـي أشـقر مـتثيني كنه حبال

في عينه اليمنى جموعا وقوفي &&& وفي عينه اليسرى ثمانين خيال

وكن القلايد في نحرها شنـوفـي &&& في لابة كنها قراطـيـس عـمـال

وكن الردايف لا قـفتها شـفـوفـي &&& تـشــبـه بـواكـيـر تـحنـا الجـهـال

إن قـلـت ديــان فـلا هـو بـيـوفـي &&& أمـا الحـديـث الـزيـن كـل بـيكتال

الخويطري · #19 09-02-2004, 05:00 PM

$ابوعبدالعزيز$ · #20 12-02-2004, 11:05 PM

لاهنت ياخي العجمان
وبشر انا احضر
قصيد لشيخ راكان ابن حثلين
يوم طلع من اسره في تركيا
ولاهنت مره ثانيه
اخوك$ ابوعبدالعزيز$]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]