همــهـــمــات سعد . . !

[سعد الصميل]

حسبي الله على ستيف جوبز مره ثانيه

الناس تشوف اجهزته لها فوائد وانا اقول اضرارها أكثر .. لو بنحسب برامج الايباد والايفون اللي خلت الواحد مايتحرك مانخلص ..


تعالو نعد بعضها ..


برنامج للطلب من المطاعم ..
حاط لك قائمه مليون مطعم وتطلب بدون ماترفع السماعه وتحرك حبالك الصوتيه ويجيك الطلب وانت قاعد ..

برنامج للتداول بالبورصه ..
طبعا هذا للأغنياء ( أعدائي ) اللي بالأساس كانو مريحين قبل الاجهزه هذي
ويتداول وهو قاعد بدال مايطق مشوار ! لا ويتداول في امريكا بعد ..

برنامج للبنك ..
يخلص أموره بالبنك والتعاملات وهو في بيته بدال مايروح ياخذ رقم وينجز معاملته مثل قبل .!

برنامج للسينما ..
بدال مايروح يدور بالجرايد الاعلانات .. يفتحه وهو قاعد ويشوف شنو اخر الافلام لا ويشوف مقاطع منه بعد !

برنامج دفع المكالمات ..
ولا عزاء للعزيزيه اللي كنا نجيها تالي الليل ندفع !

برنامج للبيع والشراء ..
وجان يطيح سوق الوسيط

نكمل والا كافي ؟