قصيده لمحبي البر والقنص

[*ابوخالد*]

ترى القيظ للي يعشقون البراري عوق
ليا قام يلفح لا هب القيظ بسعيره
وراع البر ليا جاء طلعة اسهيل قام يتوق
وليا ابرد عليه الوقت كثرت تفاكيره
وانا من هواة البر بالفعل والمنطوق
مناي وهواي البرد مالي هوا غيره
يجيني ليا هبت هبوب الصفاري شوق
على سجة في البر ومفارق الديره
احب الديار الخاليه والمطر والنوق
وبالخص سود الطرش الا مغاتيره
ليا جات تبارى كل ذود مع طاروق
وطال النهار وريعوهن مقاهيره
واحب الهواء ليا هب مع المرفق الشاهوق
خفيف هواه وساكنات معاصيره
واحب البطين القافر الاخضر اللاهوق
ليا اقفى سحابه وسطعت به نواويره
مناثر نفود ونوب سوده ونوب اعروق
سقاه السحاب اللي تتالت تماطيره
يجيها من المنشاء سحاب ورعد وبروق
يسيل وعرها والسهل مع محاديره
تواليه ديمه واوله صادق حقوق
اسبوعين والماء ناقع في محاييره
وليا زل خمسة عشر يوم بالماثوق
تشوف النبات اللي يشوق مخاضيره
تشاكيل عشبه مخضره واوله زملوق
يشوقك ليا سقت النظر في دواويره
ابا اخذ بها سجه وما فات لي ملحوق
اسج القدم في البر وابعد عن مشاويره
خصوصا ليا صرت في رحلتي مرفوق
نشاما لهم في قنة اهل الوفا سيره

[الـعـابـر]

صح لسانك ولسان شاعرها

[●• Ŝђǿǿq •●]

أبيآت جميلًه
تِسلًم يمينكـً ..~

[العــــديم]

صح لسان قايلها
ولاهنت ع النقل

[*ابوخالد*]

المشاركة الأصلية كتبت بواسطة الـعـابـر

صح لسانك ولسان شاعرها

كل الشكر العابر على المرور

[*ابوخالد*]

المشاركة الأصلية كتبت بواسطة ●• Ŝђǿǿq •●

أبيآت جميلًه
تِسلًم يمينكـً ..~

كل الشكر شوق على المرور

[*ابوخالد*]

المشاركة الأصلية كتبت بواسطة العــــديم

صح لسان قايلها
ولاهنت ع النقل

كل الشكر العديم على المرور

[ياعين أبوي]

تسلم يمينك على النقل

[*ابوخالد*]

المشاركة الأصلية كتبت بواسطة ياعين أبوي

تسلم يمينك على النقل

كل الشكر ياعين ابوي على المرور

[ابورامي]

الله حي والله ذا الشو ف وذا الطاري صح لسان الشاعر وتسلم يمينك