أحبّك كثر ماواجه الحال شر وخيــر ،،، مختاره لــ ( محمد إبن هندي )

[محمد أبو زيد]

السلام عليكم ورحمة الله وبركاته

مسّاكم الله بالخير جميـــع ....

قصيده مختاره للشاعر ( محمد بن هندي السهلي ) ، عساها ترضي ذائقتكم وتجملنا معكم .

احبك كثر ما واجه الحال شـر وخيـر = وكثر ما يتوق القلب لحروف مرسالـك

وكثر ما تحرّيت المقابل ضحى واعصير = وكثر ما خذتني لهفـة الشـوق لقبالـك

تراك انت وحدك وسط قلبي فقط لا غير = تسيّدت به من كبـر قـدرك ومنزالـك

خذيت الولا والحب والشـان والتقديـر = وتساميت عن كـل المخاليـق بلحالـك

لك الله ما غيرك شغل موجـة التفكيـر = ولا ارتاح يالين آتطمـن علـى حالـك

رضيت العنا والهم والحـزن والتعزيـر = على شان احقق رغبتك واكسب اوصالك

عساك اتغانم من معك يحسـن التدبيـر = يقول العمر والروح ماترخـص الا لـك

مثل مالبخيل إيحفظ ماله عـن التبذيـر = حفظتك بقلـبٍ شـال همـك وغربالـك

لك الحب كله واقطع الشـك والتزويـر = امانه معـك لا تفـرح قلـوب عذالـك

مدام المحبه عندك اكبـر مـن التعبيـر = لعلّـك تـدوم وتثبـت اقوالـك افعالـك

وانا والله ان احفظ غرامك عن التقصير = واراعيـك واداريـك بقفـاك واقبالـك

واوقف بوجه اعداك واللي يصير يصير = لا بد الليال السـود تنبيـك عـن ذلـك

لـحيث ان قلبي فيك ما يقبـل التغيّيـر = تعلّيت فـي عرشـه وشيّـدت تمثالـك

تعرّض طيوفك قدم عيني وقوف وسيـر = ولا لي جدى كود اسهج الرجل واعنالك

وتطري على بالي طواري لها تفسيـر = عسى كثر ما تطري لي اطري على بالك

تطوّر غرامك مع مرور الزمن تطويـر = يالين انه خلاّ ساحـة القلـب مدهالـك

يادوب اتحمّل يومي اللي علـيّ امغيـر = من اوّله ليـن آخـره وانـا تحرّالـك

(امنّي) فوادي واطلب امن الله التيّسيـر = يعوّضني ايـامٍ مضـت دون ميصالـك

اقول اني اقدر ابتعد عن دروبـك ميـر = ليـا جيـت احـاول فالبعـاد آتهيّالـك

احبك واداري خاطرك واعشقك واغيـر = معك ياهوى بالـي فـحلـك وترحالـك

ومن كثر حبي بان في حالـي التأثيـر = عليّ الله الشاهد قعدت احسـد ظلالـك

انا كل ما قفّيت مـا ردنـي لـك غيـر = محنّة خفـوقٍ يهتنـي بـك ويشقالـك

وشوقي مثل شوق الضوامي لجمّ البيـر = تجي من غزير الشوق تاقف على جالك

وتشربك شوف إيلين كل العماس إيطير = وتقفي ولا تقطع ضماهـا مـن ازلالـك

هذي حالتي في كل ليل وضحى وعصير = اجي لك وانا هالك واقفّي وانـا هالـك

وسلمتــــــوووا

[بحوور]

محمد أبو زيد



إختيــــار رائـــــــع لـ شاااعر أرووع

لاهنـــــــــت ,,




أختــــــكـ

[Aziz]

قصيده رائعه كل الشكر لك اخي الكريم على النقل .

[سند]

محمد أبو زيد

صح الله ألسانك ولسانــّه

وماقصرت ياطيــب

توبك ..........

تقبل أطيب تحياتي,,,

[محمد أبو زيد]

هلا وغلا ( بحور )



الأروع مرورك ، لاهنتي

[عيد بن شدقان]

ابو زيد
لاهنت يالقرم
وصح السانك والسان السهلى
اختيار رائع

[قبلة العذارى]

محمد،،

اختيااااار منتاز منتاز على قولة الشيبان


لاهنت وصح لسانك ولسان بن هندي

تحياتي

قبـلــــــــــــــــ العذارى ــــــــــــة