ابيات مكذوبة على الشيخ محمد بن قرملة للتوضيح

[ابوقحط]

السلام عليكم ورحمة الله وبركاته

في رد لعضو في ذا المنتدى شفته كاتب ابيات ناسبها للشيخ محمد بن هادي بن قرملة شيخ قحطان وهي

الله على شمة عسام الطرادي=وان حججت عند الذرا كل مشوال
مع حرب والغلبا وسبع البوادي=والا العتيبي حاسبينه من المال
عليه وسم ٍ للجحادر وكادي=يزول نجم سهيل والوسم مازال

وذي الابيات ماعمري سمعتها وسالت عنها قبل شوي جدي الله يطول عمره وكذبها نهائي فلا احد يتجرا ويكذب على الشيوخ الكبار مثل الشيخ محمد بن هادي شيخ قحطان

[عويشق]

الاخ ابو قحط اسدح موضوعك في منتدى قحطان ويجيك الرد اللي يهز شنبك :d

[ابوقحط]

المشاركة الأصلية كتبت بواسطة عويشق

الاخ ابو قحط اسدح موضوعك في منتدى قحطان ويجيك الرد اللي يهز شنبك :d

وليه اطرحه في منتدى قحطان وهي مكذوبة عليه هنا

وقصيدة الشيح محمد بن هادي المعروفة هي

لا بد من يوم يثور عسامه= إما على المطران ولا علي يام

والعسام هو عج المعركة فكيف يقول بن هادي شمة عسام الطرادي لان العسام يثور ولايشم؟؟

وذا دليل ان مزور ذا الابيات بزر ولايعرف عن الاولين شي

والشيخ محمد بن قرملة قصايده جزلة ومحفوظة في دواوين ولافيها مثل سوالف ذا البزران

[سلمان بن ضيدان]

يـا راكـبٍ حــرٍ تــذرب سنـامـه
نَيَّـه جديـدٍ فـوق نَّيـه مـن الـعـام

مـا صـك لِحْيَـه فـي ليالـي فِطامـه
ومدلهـن يشـرب لبـن كـل مــرزام

إلـيـا ورد عــدٍ يِطَـيِّـرْ حـمـامـه
جالـه صريـمٍ مـن إلحِيَّـه تقـصـام

الـعــد: هـــو بـئــر الــمــاء.

ملفـاك ابـن هـادي كبيـر العمـامـه
شيخٍ ورمحه مع أهـل الخيـل مرسـام

مــرٍ يواعـدنـا بـحـرب وقـوامـه
ومـرٍ يجينـا مـن هــرج وتـسـلام

حـي الكـلام وحـي منـهـو كـلامـه
اللـي لفانـا مـن هــرج التـوهـام

وش الجزا يا شـوق زاهـي الوشامـه
لِسَّابق إللـي مـا عرفنـا لهـا أوقـام

أهديـت لـك نـور السلـف والجهامـه
باغيـه ذخـرٍ فـي مقابـيـل الايــام

وغديـت أنـا ويـاك مـثـل النعـامـة
جاهـا بَلاهـا مـن ثقيـلات الاقــدام

إن كـان تبغـي سابـقـك والسـلامـه
خلـوا ضعاينكـم مـع العتـش خــرام

العتش: شعيب في وادي العرمه جنوب الدهناء

حِـــرِّم عـلـيــك النوط فكت إبلامه
ما دام حيٍ واحدٍ من ضنا يام

معنـا الطويـل اللـي تجيكـم عـلامـه
مثل العِديم اللـي علـى الجـول صـرام

الطويل : هو فـارس ال حبيـش المشهـور

التـرك قبلـك زارِنـا بــه زعـامـه
قد عافنـا وِعْتـاض عنـا اهـل الشـام

الـتـرك : هــم الـدولـة العثمـانـيـة

وان كـان تطـري حِدْرتـك بالجهامـه
لمـا توصـل بـك إلـى ذيـك الارجـام

ذي ديـرة الحـاكـم كبـيـر العمـامـه
إللـي نحـى عنـهـا طوابـيـر الاروام

قـدامـك شـيـخٍ رفـيـعٍ مـقـامـه
الخيـل قِـرَّح وأبيـض الـخـد قــدام

وإن رادهـا غيـره ضربـنـا لثـامـه
عــودٍ يـبـدل هـفـوتـه بـتـنـدام

يالله عسى الفـردوس ملقـى إعظامـه
اللي بعـث ديـن النبـي ديـن الاسـلام

مثـل الدويـش اللـي يِقَـدي الجهامـه
عِقـرت جـواده فـوق رجلـه والاقـدام

وإن كـان حَـدَّر لابـةٍ مـن تهـامـه
حنـا لهـم فـي مقطـع الصلـب قـدام

الـصـلـب: هـــو وادي الـعـجـمـان

اقبـل وحنـا لـك نـسـوي كـرامـه
شِلـفٍ علـى قـبٍ سريعـات ألــولام

شِلف: جمع شَلفه وهي أصغر مـن الرمـح

قـــب : هـــي صـفــة للـخـيـل

تسعيـن رمـحٍ كسـرت فـي عـدامـه
عشرين مِنْهِـن بيـن فـاران وحـزام

كـم ثـار عنـد إركابنـا مـن كِتامـه
ياما هلك من ضدنـا مـن سبـب يـام

كـم مـن حريـبٍ دارج الـدم دامــه
يشبع بهـا السرحـان والطيـر لا حـام

الـسـرحــان: لــقــب الــذيــب

حنـا كمـا سـيـلٍ تَنـاحـا غمـامـه
حامـل بَـردهـا بالفرنـجـي والاروام

سيله يقـزي مـا نحـى مـن عدامـه
ورعودهـا منهـا المِـدَلَـه تقـصـام

وان كانكـم سـيـلٍ يِـطْـم العـدامـه
حنـا زبـارٍ يشـرب السيـل لا عــام

وان كانكـم ضـلـع كبـيـر حَجـامـه
حنـا كمـا نجـمٍ علـى الضلـع هـدام

وان كانكـم مثـل الـرعـد بِنْقِصـامـه
فـإن الرعـد ينبـت زبيـدي بـرضـام

كـم سيـف هنـديٍ فِظَخْـنـا لِجـامـه
بأيمانِنـا كِـنـه مقابـيـس الاظــلام

نـروي مـن إرقـاب السِّكـارا حَيامـه
فـي هيـةٍ يشبـع بهـا كـل حــوام

الــهـــيـــة: الــــحــــرب

قطعـا لعيـنٍ اللـي عريـضٍ سَنامـه
شقـحٍ مفاليـهـا مباكـيـر الاوســام

وان كـان وِدك عندنـا لــك كـرامـه
تدري بضيفتنـا أهـل الشـرق والشـام

أقبـل علينـا حـي سـوق المسـامـه
وعاداتنـا نغلـي جلـب كــل ســوام

حريبـنـا تصـبـح بكـبـده نـدامـه
وبرايـة الله نجعلـه حــذو الاقــدام

نرجـي مهاشـيـل تـعـدى تهـامـه
لا سـاق كالله والقـدر نـاحـرٍ يــام

وصـلاة ربـي عـد منشـى غمـامـه
علـى نبـيٍ خــص هالله بـالاكـرام

[عويشق]

ابو قحط اللة يهديك ترى قصايد الشيخ محمد بن هادي القحطاني كثيرها يمكن هاذي

القصيدة للشيخ محمد بن هادي القحطاني اسدحها في منتدى قحطان وتاكد من صحة

هاذي القصيدة الكلام اللي قلتها كلام عامي ما احترامي لك ما عندك اي دليل ان هاذي

قصيدة ما هي للشيخ محمد بن هادي القحطاني تراك ما نت بخسران شي اذا استفسرت

عن هاذي القصيدة في منتدى قحطان هذا اذا كنت قحطاني فعلن

[شـــواش]

اذكرو الله ,,,

محمد بن هادي غني عن التعريف ....
والقصايد توخذ وتحرف ,,,والتوضيح مطلوب ..

تحياتي لكم...

أخوكم : شواش العنزي

[ابوقحط]

القصيدة لها بداية وردود يابن ضيدان وكانت البداية من دغش بن سالم بن حامد الهاجري مرسلها لشيخ محمد بن هادي بن قرملة شيخ قحطان


يا راكبٍ حمرا بلونهـا سحامـه=ترعي الزهر لين الشحم فوقها زام
عليها صبى مـا تغيـر كلامـه=يدي الخبر يم الرفاقـه والاعـلام
منصاك شيـخ بينـات اعلامـه=شيخٍ ورمحه في أهل الخيل ملحام
منصاك ابن هادي كبير العمامـه=مكدر الصافـي بعجـات الأيـام
حن درعه الضافي وقوة حزامـه=وعدوة القاسي ندوسـه بالأقـدام
وعده لبن شفلوت راعي الشهامـه=شيخ الشيوخ متيهة كـل مـرزام
صبيان قحطـان عليهـم ملامـه=والها على صبيان جنـبٍ تلمـلام
حنا كمـا مايـح ثمانيـن قامـه=هيما وفي جيلانها تسعـة اهيـام
ما يظهر المايح من أقصى الغمامه=الاجواذيبـا وربـعـا وخــدام
وان كان جذابه تنافض اعظامـه=خلي ابغلـه فـي قليبـه ولاقـام
حنـا شـوي وشايلتنـا القرامـه=قطاعـةٍ نذبـح ولا كملـوا يـام
رماحنا وسـط المدينـه علامـه=مع الصحابه قاتلوا ذيـك الأيـام


فرد عليه الشيخ محمد



يا سابقـي تستاهليـن السلامـه=الله يجيرك من بلا سـو الأيـام
لي لابةٍ حدرتهـا مـن تهامـه=وسلاحها صنع الفرنجي والأروام
اعلوهم في الطور ثـور كتامـه=واسفلهم اللي كدر الماء على يـام
ياذا البهم والله أن تباري الجهامه=أيلين تنزل بين صفوى والأوجام
حنا كمـا سيـل يطـم العدامـه=حول على طاش البحر له تلطـام
ولابد مـن يـوم يثـور عسامه=أما على المطران والا على يـام
كله لعينـا شافـي فـي كلامـه=يشكي علينا الضد قبل ذا العـام



فرد الشيخ ركان بن حثلين شيخ العجمان فرد عليه الفارس الكبير فراج بن ريفه القرقاح


يا راكب حر(ن) يـلاوي اخطامـه=هيـاف قطـاع الريـادي بالوجـام
كنـه ظليـم يـوم حـق انهزامـه=لطار عنده يبـرق الريـش سهـام
يلفي بنـا الشيـخ كبيـر العمامـه=واختص لي بالهرج راكان وحـزام
يذكر لنا انهـم محتسينـن كرامـه=عجل ابها ترى ربعي مواجيب وحيام
فلولا الامـام اللـي تبنـا اخيامـه=اللي قرع ربعي بخـط(ن) وبلـزام
كـان يمدينـا كليـنـا الكـرامـه=احد كلا منها ومنـا حـد (ن) حـام
والضاعني اللي ابتـدا فـي كلامـه=لافايـدن ربعـه ولا هـوب دسـام
الضاعنـي اللـي يخوجـل كلامـه=يجعل يمينه فـي مكانـه اليـا قـام
يكفونك ال معيض يـا ذا الهلامـه=خيالـة ال حبيـش لجـات لزحـام
وانكان تطري منزلـي فـي تهامـه=فلانـي لاجـار ولانـي ابـغـرام
عبيـدي وسـط القبايـل عـلامـه=اصل وفصل ياالردي ماكـر الهـام
وانكان تطرون الرثـى والحمامـه=فنحمـد الله ماكفـرنـا بالانـعـام
وانكان تطرون الفـري والجرامـه=فنلبس فرنجي من سريعـات الاولام
ارماحنـا عنـد المدينـه عـلامـه=مركـزه قبـل نمـرود وهـشـام
والشريـف العبدلـي ابـو عمامـه=الـي يقلـط بالعسـاكـر والاروام
في دقل ربعي هو وبـوه وعمامـه=خلي عشا للذيـب والطيـر لاحـام
حنـا كمـا سيـل يطـم العـدامـه=حول على طاش البحر لـه تلطـام
سيله يغـزي مانحـا مـن علامـه=ورعودهـا منـه المدايـن تفصـام
وجنـب مفاتيـح البـلا والسلامـه=ماحن بمن فيه الروايات يـا خمـام
كم شيـخ قـوم مطلقيـن احزامـه=من عقب لبس الجوخ قدولـه الخـام
نـروي رقـاب النشامـى هيامـه=في هية يشبـع بهـا الطيـر لحـام
تـرى حدنـا مـن ثرمـدا لتهامـه=واسفلنا اللي كدر المـا علـى يـام

[ابوقحط]

اخي عويشق ذي بربسة بزر وقصايد الشيخ محمد بن هادي قصايد جزلة موجهه للحكام والشيوخ امثال الامام فيصل بن تركي والشريف سلطان وراكان بن حثلين وتركي بن حميد ومحفوظة ويردون عليه بقصايد جزلة

اما برابيس ذا البزران اللي ترسوبها المنتديات دون حسب ولارقيب وينسبونها لشيخ فلان وفلان فهي مكشوفة والشيوخ منها براء

[ابوقحط]

اخي شواش جزاك الله خير على كلام الحق ولاخرب التاريخ في ذا المنتديات غير البزران

[سلمان بن ضيدان]

طيب طيب لا هنت على المعلومه بس حنّا وش يفيدنا

ترى يمكن اللي أنت تبي توصّل له هذي المعلومه ما قرا هذا الموضوع

ولا يعد له أهميه لأن ماله أهميه أصلاً

واذا تبي شي أو تبينا نتفاهم أخذ ايميلي شوفه فالتوقيع وهناك نعرف ونتفاهم

والهرج هنا ما يفيد وأنت عارف قصدي