!! .. حــــرٍ تعلـى فـــوق روس الــرجــومـــي .. !!

صمــت اليتــاما · #1 31-01-2009, 12:00 PM

السلام عليكم ورحمة الله وبركاته

,,

للطيـب رجـالٍ وللعـرف رجــال =والسيـف مـا ينفـع كثيـر الثلومـي
لا ضاقت الدنيا بـك وحـدك الجـال= انص الرجال اللـي تسـد اللزومـي
مجربـه ماهيـب قـولٍ بـلا أفعـال=ولا يغركم زيـن الغتـر والهدومـي
للذيـب منـزالٍ وللنيـص مـنـزال=والفرق واضـح بيـن حـرٍ وبومـي
جالاً يعنزلـك وجـالٍ تـرى هيـال=مـا ينفعـك ويزيـد همـك همومـي
فاشتر رفيق الطيب لـو تدفـع المـال=حـرٍ تعلـى فـوق روس الرجومـي
جمـل محامـل للثقـيـلات شـيـال=وبالطيب يبصم له بـروس البهومـي
وخوة رجال الطيب تشرح لك البـال= اللي يعرفـون القـدى والسلومـي
وخوة ردي الساس مثل أشهب الـلال=للمرجلـة والطيـب عيـا يـرومـي
ترى الردي فرقاه تشـرى بالأمـوال=مالك ومال أهل الـردى والرخومـي
وفرقا رفيقٍ مـا يسـرك هـو الفـال=اذبح على فرقـاه لـو ديـك رومـي
لا جا لزومه قال يـا عـم يـا خـال=وفي واجبك ما يشتقـي مـا يقومـي
فخلك بعيدٍ مـن هـل القيـل والقـال=حتى ولـو ترقـا طويـل الحزومـي
فالنار لو شبت وتشعـل لـك اشعـال=ترجع رمـاد وجمرهـا مـا يدومـي
وطرد المقفي ضعف بالعقـل وهبـال=لا ترتجـي بـرقٍ بعيـد الغيـومـي
ومنهو ضحك بسنون شامـت وعـذال=هـاذا ومـن مثلـه الـد الخصومـي
واللي يهينك هنه حـده علـى الجـال=لا تقبلـه لـو كـان متنـه زحومـي
والطيب أخير من الـردى دام تحتـال=ومحدٍ من الـزلات قيـل معصومـي
فخلك مع ربعك ولو طال مـا طـال=ورجلاً بـلا ربـعٍ تـراه مهزومـي
لاجـا نهـارٍ فيـه للشـر زلــزال=محزمك ربعـك فـي نهـارٍ كتومـي
في عزوتك لا يدخلـك ربـع مثقـال=راع الحكـي لا تسمعـه والنمومـي
لاقابلـك غنـى علـى كـل مــوال=ويرميك لمن قمـت بـردى العلومـي
فالنـاس جهـالٍ وفالـنـاس عـقـال=والعاقل اللـي محتـرم ومحشومـي
والجهل ضد العلم راعيـه مـا نـال =الا المشاكـل والشقـا والذمـومـي
ومن عال في دنياه في النـاس عيـال=كـم واحـدٍ للشـر يسعـى يسومـي
والحق حـق وكلمـة الحـق تنقـال=يا العبـد تـب لله وخلـك جزومـي
هـذي نصيحـة للصناديـد الابطـال=ابنـا الرجـال الطيبيـن القـرومـي
تمت وصلـوا عـد مـا هـل همـال=على النبي وعـداد منهـو يصومـي

للشاعر.. عبدالله القعيمه

أختكم

,

جطلي بن فهد · #2 31-01-2009, 12:06 PM

مجربه ماهيـب قـولٍ بـلا أفعـال
ولا يغركم زين الغتـر والهدومـي
للذيـب منـزالٍ وللنيـص منـزال
والفرق واضح بين حـرٍ وبومـي

ياسلام ..
صح لسانه ولسانك ياصمت..

ولاهنتي على النقل الجميل
ويعطيك العافيه

تقبلي مروري

شـمـوخ مـطـيـر · #3 31-01-2009, 12:24 PM

.
.

فاشتر رفيق الطيب لو تدفع المـال
حرٍ تعلى فـوق روس الرجومـي .. !!

.
.

ياسسسسسسسـلام ..

قصيدهّ قمه ..

ومن شآعر مبدع

.
.

صمـت اليـتـامـأ

لبآ قلبتس يآلشيخـهّ

لاهنتي على النقل المميـزٍ

وهاذا مآتعودنـآ عليه ..

.
.

والله لايحرمنا هالطله غـلاي

.
.

تقبلي مـروري اختـس ..