صبا نجد اثر الغربه وهاجر يـوم هاجرتـي
متى عودتك ترجع للوطـن نسمـة تعاليلـه
رضينا بالعنا المعهود واخترنـاه واخترتـي
شجـون اذكريـات اللـي تقهوينـا فناجيلـه
تمادي واتركي ذكراك تمعن في محاصرتـي
وانا راضي على شان النجاح الي وصلتيلـه
تطورتـي لكـنـك بالمقـابـل ماتأثـرتـي
على الطبـع المحافـظ ماتحمستـي لتبديلـه
وانا شرقي خنين الهيل حتى فـي مفكرتـي
احيي فيك روعة مجمل اسلوبـك وتفصيلـه
تدور الشمس ونجوم المجـره كـل مادرتـي
ويصير الغرب مشرق لابدت شمسك على ليله
بنات الغرب غاروا منك وانتـي ماتغيرتـي
على الكبّوس ثاروا واستعاضوا عنه بالشيلـه
لثامك وصّل التغيير حد ( ن ) ماتصورتـي
خصوصية جمالك شكلـت وضعـه وتفعيلـه
والى صار الصليب هلال هللتـي وكبرتـي
وصار الكون مسلـم بيـن تكبيـره وتهليلـه