عنزة تهزم المطران وتمنعهم عن رقابهم ...

[الـسـبـيـعـي]

غزا مطلق الجعيب عقيد من عقداء مطير الى (البريت) ومعه جيش وعارضهم ابن فدغم ابن لامي من شيوخ الجبلان من مطير ومعه جماعته يريد المشاركه والكسب ولما وصلوا الى البريت واذا هذه الخيرات والاذواد من النياق الطيبه المنتشره في كل مكان يرعن الاماكن البعيده كما يقول محمد بن مقحم النجدي الصقري :

ترعى بهـا قطعاننـا سـر وجهـار *** ترعى زماليـق الفيـاض النظيفـه
قطعاننـا مـا يرتعـن دمنـة الـدار *** في ظل مرويـن الغلـب والرهيفـه
ترعى بضف الغوش بقصاف الاعمار *** تقطف زهر مرباعها مـع مصيفـه
فـي ضفّـة الله ثـم جبـرٍ وجبّـار *** خيّالـةٍ يــوم المـلاقـا عنيـفـه
ترعى بها الوضحا من الذود معطـار *** غبوقـة الخطـار عجـلٍ عطيـفـه
ما هي حكايا مسردٍ عقب مـا نـار *** اللي نكس واطراف رمحـه نظيفـه
إن سوهجوا عنها قليليـن الابصـار *** من دونها نروي السيوف الرهيفـه

ولكنهم لم يطيلوا النظر اليهن الا وفرسان الصقور من كل جانب وصارت المناوشات وبدأت المعركه ولما علمت مطير ان لا مجال لها طلبت المنع : ( ان يمنعوهم على رقابهم ) .

فعاهدوهم الصقور على رقابهم فقط اما الخيول ان ينزلوا منها على الاقدام ابن فدغم اللامي ابتعد عنهم قليلا واختار احد الخياله من الصقور وضربه بالرمح وقتله بعد المنع ورماه واخذ فرسه وشرد بها , فلما هرب تبعته الخيل ويوم شاف ان الخيل قربت منه حرف الفرس تجاه ربعه ونزل ودخل بينهم , فصكت عليهم الصقور وقالوا رجالنا مات خبرونا بقاتله ونحن سبق وأعطيناكم المنع الامان ولا عليكم بأس أخرجوا لنا الرجل ؟

رفضوا مطير ان يخبروهم بابن فدغم وذبحوا الصقور واحد وقالوا طلعوا الرجال رفضوا مطير الحقوه الثاني ونفس الطريقه الى ان ذبحوا سبعه من مطير وفجاة تدخل فارس من الصقور وقال لجماعته : اوقفوا القتل !! الذي كان عنده ثاركم مع الذين ماتوا واقتصصتم بالسبعه .. والان لن تمسوهم بشر .. فكوهم جميعا .
فكوهم الصقور وعادوا المطران الى ديارهم راجلين خائبين تملئهم الهزيمة .

وقال العقيد / مطلق الجعيب

امس الضحا في طويل الرجم عديت *** فاضت اعباري بصوتي يوم اجـره
يقول مطلق على الرجلين حديـت *** حفيان الاقـدام واصبـر بالمعـره
ياونتي ونت اللـي طـوت البيـت *** على ولدهـا واخوهـا زاد حـره
علـى ربـوع جلبناهـم لبريـت *** باسباب من هو علينا جـر شـره
سبعة عيال نشا ماجالهـم صيـت *** راحوا فوات عقـب بـوق يغـره
ليتك يابن فدغم في شرك اقفيـت *** تبي الطماعه وجتك الخيـل كـره
معنا تلجا ومـن دونـه تحاجيـت *** نبيه يسلم وصـارت لـي مضـره
قالوا لنا وين هـو رجالنـا ميـت *** وقنا لهـم مـا نعلـم فـرد مـره
عـن البلاسـه تعاهدنـا وعييـت *** روس رفيعه وطيـب فـي مقـره
سلم لاهلنـا علـى هـذا تثابيـت *** عنـد الـخـوي سلمـنـا لله دره
صكو علينـا قواطيـع عفاريـت *** كل منيعـه علـى وجهـه يجـره
اسباب ابن لامي بالكبـد حلتيـت *** عقب حلاهـا شربنـا كـدر مـره
برجس وبرجس يودعني بتصويت *** ينخون علـوى وفرسـان تسـره
لابـد مـن هيـه لهـم تقاضيـت *** يوم عليهـم يجـي للجـو صـره
راع القطاعه نولـع فيـه كبريـت *** وكل فعولـه تعيـن فـي مصـره
من شق ثوبي ترى للجيب شقيـت *** ومن جار بانار جـور الله يضـره


وتحيه طيبه للجميع .......

المصدر : كتاب ( قصه وابيات ) تاليف / ابراهيم بن عبدالله اليوسف
الجزء الاول , صفحه 238 و 239
والرواي لهذه القصة / محمد بن جازع بن دله الصهيبي المطيري
وهو من جماعة العقيد / مطلق الجعيب ..