وقـــــــــعه الدحــــــــمليه وما بعــــــــدهـــــا

[الأدوح]

الــد حمـليه

الدحمليه هي موضي بنت ابن شقير من ادوشان وقد سميت احد الحروب التي خاضتها قبيلة مطير بأسمها وسوف

نتكلم عن هذه الحرب ومسبباتها وتبعياتها وماقيل بها من قصايد
________________

بعد رحيل قبيلة عنزه عن نجد اصبح لاينافس قبيلة مطير احد في نجد واصبحت مطير تمتد على طول

نجد من شرقها الى غربها ومن شمالها الى جنوبها وبسطت نوفوذها الكلي على نجد ولم ينافسها بذالك

احد ومع مرور الزمن برز الزحف القحطاني القادم من الجنوب ولعله اول ما وقع عليه على قبيلة بريه

من مطير ووقعت معركه بين الطرفان في اوائل القرن التاسع عشر الميلادي في منطقة خفس الواقعه

شمال مدينة الرياض ويبدو ان المعركه هزمت فيها بريه وذالك لمقتل زعيمها اّن ذالك صلال المريخي

وفي ذالك ارسلت مويضي البرازيه رسالة تحرض بها سلطان بن الحميدي الدويش (ويقال انها ارسلتها الي ماجد

بن الحميدي الدويش) تحرضه لاخذ الثأر وايضا تنبهه بالخطر القادم على قبيلة مطير كلها كما يتضح بأبياتها

يــــاراكبــن فتــانة العيــــن حايـــل ** من الخفس تمسيــبك على جــــال تبـراك

تلــفي لشغمـــــوم ايــداوي الغــــلايل ** قــل يــاحامي الــذلان صــلال يفــــداك

نــجد حمــيناها من اولاد وايـــــل ** واليــــــوم عــدونا سكــن وادي الراك

أما احتميــنا ها بحــد الســلايل ** والا عطــينا الشــاه ذولا وذولاك

وقـــد فزع الدويــــش لنجــدت بريه وحمــاية نجــد من الطامعــين الجدد والتقى الجمعان في عالية

نجد مطير بزعامة الدويــش وقبيلة قحطــان بزعامة ابن قرمله (ناصر او خالد ابن قرمله كما هو متبين بالقصائد)

وقد ساق الدويــش عطفة مطيــر وبها الدحمليه بنت ابن شقير الدويش لما لهذه الفتاة من مكانة رفيعه

دون سائر بنات الدوشان ولكن نظر لما تمتاز به قبيلة قحطان من كثر العدد والعده شائت الاقدار انت تهزم

قبيلة مطيــر وسلبت عطفة الدويش بهذه المعــركه وقال دعيث المنجلي السهلي وكان اّن ذاك اسير لدى

الاتراك عندما سمع بهزيمة مطير

قــلبي يحــب مطيــر والحب بلـــوى ** في حبــهم لا اسمح ولا يــدله الــبال

بكيــت من فعل الجحادر بعــلوى ** جمــع الجحــادر حــد علــوى على الال

بكيــت وابكيــت انا ضلعان جــلوى ** وكتور جمــران من الدمــع سيــال

من لامني في حبهم جعل يلــوى ** في حبــهم لا اسمــع ولا اطيــع عــذال

وبدأت بعــدها قبيـــلة مطيــر تستعـــد لاخذ الـــثأر ولكن قبـــل وقـــوع معركة التي تسمــى ثار الدحمليه

وقعت معركه في عالية نجد وبالتحديد بالدخنه ومن خلال القصائد يتضح انها كانت بين جمع من مطير

وجمع من قحطان وكان قائد الجمع المطيري هو الفارس المشهور مطلق الجبعا وقائد الجمع القحطاني

هو حزام ابن حشر وقد انهزم القحاطين بهذه المعركه وقتل ابن حشر وقال ابن مسعر يرثيه

رحنا وخلينا زبون الحفايا ** على نفي في قاعة الحزم نزال

لاواجملنا اللي يشيل الروايا ** اليانوخوا للشيل وثنات الاجمال

ليته مشاورني واسوق الفدايا ** بمغلافات مايشلين الاثقال

ويبدو من القصيده ان ابن حشر اصيب بالمعركه وحمل من الدخنه الى نفي ومات هناك

وقال مطلق الجبعا مفتخرا بالنصر

لا واحسايف سابقي يا هل الخيل ** يازينها لا جات تبار المطيه

مسلوبة الذرعان مركوزة الذيل ** باغ عليها فك راع الرديه

ضربت برمح ساطي له شناشيل ** من كف ناصر مهد ينبه عليه

حذفتها في هيئة كنها الليل ** كله لعينى صيحة الدحملية

خذنا القضا فيها خيار الرياجيل ** حامي عقاب الخيل زبن الونيه

وكان الدويش حين اذن يخطط لمعركة اكبر لاخذ الثأر من المعركه السابقة التي سلبت بها الدحمليه وعند

سماعه ان القحطانين نزلوا على سدير اغار الدويش بقومه فتناوخ الجانبان وارسل ناصر ابن قرمله مستفزع

بهذال بن فهيد الشيباني وعندما سمع بذالك ابو اثنين السبيعي وبني عمر قدموا لمساندت مطير وهزم القحطانين

واتباعهم في هذه المعركه التي سميت بثأر الدحمليه او يوم اوراط .

وقد صاحت الدحمليه بهذه المعركه مطالبه بثأر ولهذا السبب تشجع فرسان مطير لا سيما غنيم ابن شبلان

فقد رماه ابن حشيفان بالشلفا فأستقبلها غنيم برجله وقايه للفرس ثم استوى على جواده فلحق بالفارس

واصابه. وقال عجير ابن طلمس وهو من رفقة مطير كان حاضر المعركه

ياراكبن حر دله بالخاضير ** متيهن كل الشتا مع ربيعه

يسرح على تقليطت الحوض للبير ** والعصر بين منيصفه والوريعه

تلقى بيوت مدهل للخطاطير ** ياحيف لولا للنزايل مطيعه

ناصر لفانا صايلن بالمظاهير ** يقول من علوى علينا هزيعه

جونا وجيناهم وسقنا المغاتير ** سوق الجلايب يم سوق المبيعه

هجن وصفينا عليهن طوابير ** ورد بنا ورد القطا لشريعه

حنا نبيع الروح دون الغنادير ** بعناه بيعة رمة مستبيعه

جمع الجحادر قدم علوى طمارير ** مايسلمون الا من الله شفيعه

وغنيم قفا بسبايا مدابير ** ووراط سال من اشقر الدم ريعه

والله يا لولا نايفات الشناظير ** ماعاد ينكس من يهرج رضيعه

تغانموهن يابسين الحناجير ** وغدا لهم عن الاهاوي منيعه

وقال اخاه عوير

ياراكب من عندنا عمليه ** تقطع رهاريه السهل ووعورها

ماهسها الراعي يرد رعيه ** ولا مصها وقت الشتا قرقورها

ترعى من الصمان الى ماويه ** لما الاباهر عقب وثورها

تلفي لنا يم الفروق حمايل ** اهل سربة يشكو العدو دعثورها

قل يا هيته جت مع شعيب العوده ** مقرود ياللي ماحضر دافورها

الخيل هي والجيش غاد حفه **والذود قدمه طافح مقهورها

نركب عليهم حدب كل مجرب ** وخصبات عارفين حكورها

نطعن لعين كل شقحن مردم ** يوم القرايا غلقت مسعورها

ونطعن لعين الي تصيح وتنخا ** تبدا الضلوع وتنثني لبزورها

ونطعن لعين اللي تصيح وتنخا ** ومغورقاتن بالدموع حجورها

من بوزت الاوراك ملهوفة الحشا **بنت الشيوخ مضيفه بعسورها

ماني بكانيها تراها موضي ** الدحمليه كنها من حورها

فعولنا وصلت ديار ثويني ** وجنوب وصلت يم هوجا وكورها

ترى الوعد الى جا الخضار محقبه ** اليا نثرت غر السحاب بكورها

وقال اخر

سبة بطانا دفعنا للمطيه ** نضف جنحان طويلات ونشاط

الخيل نعطيها القصب والنسيه ** والمال من كثر المناويخ منلاط

الصبح سقنا ذود ذيب السريه ** وتحاضبوهن لابسين الزقلاط

عثا بهم قنور والشمس حيه ** وحمى جفيل الخيل عرقات الاباط

بني عمر جونا رجال الحميه ** من فعلهم هذال يدوس ماحاط

حريمهم من عقب ركب الحويه ** ركبن حراذين حثاحيث واملاط

_____________

انتهى ...............الأدوح

[العماني]

لاهنت يا الأدوح على هذا السرد الجميل للوقعة،وبيض الله وجهك.

ونحمد الله على نعمة الأمن والإسلام ،والحكم لله ثم لإبن سعود.

تقبل تحياتي،،،

[راعي الصمان]

مشكور يالأدوح ولاهنت...

الأحداث التاريخية التي ذكرتها يمكمن إيجازها في مايلي:

1- الدحملية وهي موضي بنت شقير الدويش ووقعت المعركة وسميت بإسمها

2- دخنة ووقعت 1293 هـ وهي بين مطير وقحطان وفيها أنهزموا القحاطين وفيها سلبت بنت حزام ابن حشر ردا على سلبة الدحملية

3- اوراط وهي بين مطير وفزع لهم ابو اثنين السبيعي وبين قحطان وفزع لهم هذال العتيبي وفيها انهزموا قحطان وعتيبه


أما غنيم بن شبلان فهم من اليحيا الجبلان وفارس شهير وسألوه بعدما تلقى الرمح برجله لماذا فعل هذا الفعل فقال ... الرمح في الرجل وابقى على الفرس أخير من رجل سليمه وانا في الأرض ...

ولغنيم بن شبلان قصص كثيرة وفروسية معروفة ...


والحمدلله على نعمة الإسلام..

[راكان اليامي]

لاهنت يالادوح على المشاركه

تحياتي

[abu faisal]

مؤرخ العجمان ما قصرت والله ,,,,,,,,,,,,,,

تحياتي لك اخوك ابو فيصل,,,,,,,,,,,,,,,

[الأدوح]

العماني
نامي
راكان
اخي ابوفيصل
جعلكم سالمين والله لا يهينكم..................

[فكاك^النشايب]

لاهنت يالادوح على ذكر السالفه


ولكن عندي سؤال ..

نجد من شرقها الى غربها ومن شمالها الى جنوبها وبسطت نوفوذها الكلي على نجد ولم ينافسها بذالك

احد ومع مرور الزمن برز الزحف القحطاني القادم من الجنوب ولعله اول ما وقع عليه ..

//////////
الكلام هذا انت صادق فيه ولا ناسخه وماانتبهت ؟؟؟؟؟؟؟؟؟؟؟؟؟؟


تحياتي لك وانتظر اجابتك على احر من الجمر

[راشد سعد]

لاهنت يالادوح اول مره اسمع مطير مسيطره على نجد

لوتذكرلي مصدرك جزاك الله خير

[الأدوح]

شي جعلك سالم يافكاك....وصبحك بالخير ياخي
اول شي المعلومات انا خدْيتها من كتاب السناح المطيري ولا لي قصد فيها لاني ماني مطيري وانا معكم لم تسيطر مطير ولا على ربع نجد وهي قبيله عزيزه,,,,,,,,,,,,,,,,,تحياتي

[فكاك^النشايب]

هذاااااااااا بلااااااااا ابوك ياعقــاب

(( وانا معكم لم تسيطر مطير ولا على ربع نجد ))

دامك انت منت مقتنع وش اللي حادك تكتب الجمله هذا الله يرحم شيبانك

ياخي العزيز الادوح انت مشالله باحث ونادر اللي مثلك ولكن في العيب هذا انك تنقل بدون مااتتاكد من اللي ناقله




تحياتي لك