أشواااااااااااااااااااااااااااااا

[المربوعه]

كلمة أحبك لاتقولينها اللحين = بدري على اسلوب الغرام وكلامه

يادوب انا وانتي لنا بس يومين = قلبي بعد مبدا معاك انسجامه

تذوقي طعم المحبه وتدرين = ان الغلا لا زاد تجرح سهامه

ودامك بديتي بالهوا لاتشكّين = من حب لا يلحق بنفسه ملامه

الحب ماياتي على ماتمنين = محد ٍ قدر يابنت يملك زمامه

واليا خذاك ابعيد لا تسألي وين = اما سعاده فيه والا ندامه

كم راح فيها من شيوخ وسلاطين = وكم راح فيها من كبار العمامه

طبعه كذا مايعرف الزين والشين = ياتي مثل سيل ٍ يطم العدامه

ياما غدا في وسط بحره غريقين = كل ٍ تشكّى من سبايب غرامه

ودامك تبين تجربين وتحبين = انسي سوالف عزّتك والكرامه

ياتيك ليل ٍ تسهرينه تونين = راعي الهوا مايستريح بمنامه

ويسيل دمع ٍ يحفي الخد والعين = يجعل على خدك جروح وعلامه

يابنت انا في الحب لي عدّة سنين = ياما تغنّت من هواي الحمامه

ياما سهرت الليل والناس ممسين = بعض الغلا يفرض علي احترامه

وكانك نويتي تبعدين وتخلّين = رزقي على اللي معتلي في مقامه

روحي واذا مثلي لقيتي محبين = لااترك مجال الشعر واعلن ختامه

مثلي تبين احباب ماراح تلقين = انا الوحيد اللي عطاك اهتمامه

لعبك خداعك ابتزازك على مين ؟؟؟ آخذ قراراتي معاك بصرامه

لا انتي بجذابه ولنتي بتغرين = والا انا فيني شويّة وسامه

بلقا بدالك من بني ومزايين = ناس ٍ تقدّرني بصدق وشهامه

سيري على اللي يعجّبك لاتوانين = وانا بعد ببعد ويالله السلامه

اشوا علاقتنا لها بس يومين = لوها طويله كان شفت الندامه


الشاعر : حمد المسرع