كلمات / عبدالله بن هادي القعيمه
انشاد / سلمان القحطاني
رد توضيحي من الشاعر / عبدالله بن هادي القعيمه .. للشاعر / محمد بن فطيس المري .. يوضح فيه عن قائل البيت الذي يتسائل الشاعر محمد بن فطيس المري .. من هو كاتبه وذلك حين القاء قصيدته المشهورة في شاعر المليون ..
ماني بمن ياتي ولايدرى به /// شطرن حفظته ما عرف كتابه
__________________
ماني بمن ياتي ولايدرى به
شطرن حفظته ماعرف كتابه
يقولها محمد فطيس المري
في شاعر المليون اضنه جابه
والشطر هذا عارف من هو له
لشاعر كلن يحسب حسابه
محدن جهل شعره ولامرجلته
في كل مجدن عاليً يرقا به
شيخً ليا لاعدو شيوخ الحكمه
كريم يمنى والكرم يزهابه
والحمل لامن ثقل لدو يمه
لانه شجاع وكل شخص يهابه
وله وقفتن يفرح بها اللي مبلي
لاجاربه وقته وكشر نابه
هذا قليل من كثيرن باقي
للي مع اهل الطيب ساق ركابه
في كل مجلس سامعين بذكره
غايب وذكره باقي يحكى به
شاعر بنو قحطان وقتن مضى
يوم كل العرب كلن يعد انسابه
حنا الحسب حنا النسب واللابه
لابة كفو ياطيبها من لابه
مواقفه دون القبيله تشكر
يقلط على الماقف ولا احدن عابه
ودون الوطن دوره كبيرن بيّن
يوم المعارك نارها شبابه
شاعر وطن مافيه شك وريبه
مشاعره لجل الوطن غلابه
يشهد له ( ال سعود ) واحد واحد
حكامنا اللي بالوفا كسابه
ويشهد له اهل العرف واهل المعنى
انه من رموز الشعر واصحابه
الشطر هذا ثابتن يالمري
( ابن القعيمه هادي ) كتابه
( بستشهد وبجيب بعض بيوته )
اللي ارتجلها عند اسود الغابه
عند محلف في حفلة ال العرجا
اللابة اللي بالكرم غلابه
في حفلهم وقف عساه الجنه
بابيات شعرن تطرب اللعابه
ينحت صخر عاده صغيرن سنه
ويقول انا صقر الشعر وعقابه
ماني بمن ياتي ولايدرى به
حرن يبشر بالعشا في مخلابه
درب الوفا طبعي وامثل ربعي
ولاخير في من لايعز اقرابه
وفي الناس من حاول يقلد سلمي
وسلومنا والغير ماتتشابه
حنا هل الترحيب والتسنيده
ونمنع دخيل البيت لاوزا به
لوكان راعي البيت ورعن قاصر
سلم الدخيل وخبت ياطلابه
وكبيرنا لمن حضر في دعوى
مفراس ماص يتعب القضابه
وصغيرنا لمن وقف في محفل
غصبن على السامع ينال اعجابه
هاذي بيوت ابن القعيمه هادي
والحق حق وكلنا نرضى به
حبيت ابين والمعاني واجد
ولاضاع حق دام له طلابه
احدن يموت وحي باقي ذكره
ومامات من خلف وراه ذيابه
الورث ورثي والشداد شدادي
والسيف عزه دايم بنصابه
والشعر يبقى والفعول الجزله
تبقى لمن ذكره حيا في غيابه
والشعر له معنى وله تركيبه
مثل اللزز والخيل والركابه
يفوز فيه الشاعر المتميز
اللي بنى بيته وشد طنابه
والشعر ياشعار وقتن ماضي
له هيبة .. له نظرة جذابه
قصيدهم فيه الدها والحكمه
وجزل المعاني فاتحين بابه
الله يرحمهم.. ويعفو عنهم
والكل ياخذ باليمين .. كتابه
قبل الختام اهدي سلاماً واجد
للمري اللي قافي من اسبابه
وختامها صلو على سيدنا
محمد نبي الله وكل اصحابه
_______________
واللهم صل وسلم على نبينا محمد