بسم الله الرحمن الرحيم
السلام عليكم ورحمة الله وبركاته
أعتذر عن الغياب وأضع بين أيديكم هذه القصيدة المتواضعه وآمل إنها تحوز على رضاكم.
أنا أشهد إن النوم ما طب عيني=في صبح يومٍ جابت الشمس خافيه
قامت همومي تختلج في وتيني=وآخاف تقطع نابضه عن عراويه
إليا وردت وحبل دلوي رصيني=ما عاد يرويني قراحه وصافيه
آدوج والضيقات باحت كنيني=ما كني إلا اللي صوابه مخليه
ولا خلوجٍ هجرعت بالحنيني=ما سرها عشب الفياض ومفاليه
لي شافني خصمي غدا له ونيني=يفطر فؤاده ما يشوفه ويوحيه
انا اشهد إني ما وفيت لضنيني=قصرت في وصله وآنا خاطري فيه
شهرٍ ومرساله يروح ويجيني=وانا طواني عنه الغم والتيه
ما لي عذر لو كان عذري سميني=له حق ما أوفيته ولي حق موفيه
آسوق عذري للوليف الفطيني=في عقد يزهاه القصيد وقوافيه
إليا سمحني جعل عمره سنيني=وإليا تركني جعل يفداه مغليه