بــــوح الغـــلا

[زود الغـــــــــــلا]

[82]


يـا صـغيّر لا تـضيعني بـنظرات البراءه
وانـت مـا تعرف مدى تأثير نظراتك بحالي

آه يـالبيه .. يـا بـشويش .. يا هدّ الإضاءه
لـلجفول الـلي .. مـن جفاله يجفّلني ظلالي

فـز .. بـاسم الله عليك .. من المبرّة للإساءة
وارقد آمن في عيوني .. واسهر آمن في خيالي

يا صغيّر .. والذكي .. مثلي .. ليا خانه ذكاءه
مـاله إلا يـعشقك ويـصير لـعيونك شمالي

قم فديتك وانت حر .. من الف باءه .. لين ياءه
مـا عطاك الا الله .. اسرف واستبيح ولا تبالي

سـو ما يرضي غرورك .. وإدّ ما تهوى أداءه
الـحشا لك بيت حاتم .. وانت غالي عند غالي

قم تمخطر في الحشا .. وانسى الكتابة والقراءة
وحـل واجـب شـاعرٍ مـا حلته سود الليالي

وعـلّمه وشـلون تـتعدي عـلى خط استواءه
وعلّمه وشلون كيف .. وهل يضيعون الرجالي

وكيف يجني خلف سور الجامعة .. ذنب الكفاءة
سـاعةٍ نـادى ابليس وقال له : مالك ومالي

وأنـت يـشفع لك صغر سنك ونظرات البراءة
بـري حالي .. كل مالديت يمي بري حالي

الشاعر/ ضيدان بن قضعان

[زود الغـــــــــــلا]

[83]


الجادل اللي يمر القلب شارعها
بين الحنايا تعدي ماتطالعني.

تقفي مع الدم بعروقي واتابعها
واحس كنها على نفسي توزعني.

قامت تبعثر غلا وان جيت اجمعها
اضمها واتشتت لين تجمعنــــــي.

بين الحنايا تثني في مرابعها
كنها تقول اتحدى من يطلعني.

دام الحشا بيتها وانا مدلعها
وش دخل القلب يزعل يوم توجعني؟

وليا خذا رمشها رجل يطالعها
لعل رمش خذاني مايرجعنـــــــي.

عيونه جيوش والنظرة طلايعها
غارت بصدري وجاز لسيفها طعني!!.

ويوم انكفت لين قلبي من قلايعها
والصبر عن خافقي ماعاد ينفعني.

مدهالها القلب وعيوني مراتعها
اموت فيها وهي للريح تزرعني.

ريحانتي والغلا بالقلب زارعها
تشرب عروقي وترواني وتشبعني.

كان النحل من رحيق الورد مشبعها
وانا شموخي من احلا شي جوعني.

وليا تعانق خجلها مع تواضعها
عانقت ليل على مسراه شجعني.

لوينسري ليلها سريت بايعها
بشر ولا اللة عن الزلة مرفعني.

واصبحت من عقب ماني ضدها معها
ان ضاعت اضيع وان دلت تسنعني!!

للجادل اللي شرايني شوارعها
القلب يقتادني والنفس تمنعنــــــي

الشاعر/ ضيدان بن قضعان

[زود الغـــــــــــلا]

[84]


يالله ياللي جميع الخلق تحت امره
انك تجازي هل النمّات والغيبه

وانك تفرج لعبدٍ ضايقٍ صدره
الهيّنه في عيونه صارت مصيبه

عزيز واللي سواتي مانقص قدره
والله مالِحقني شكٍ ولا ريبه

شاعر مجرب واخذت من الزمن عبره
وياشيب راسي من اللي شفت ياشيبه

ماكل منهو يغيب اجيه ولاّ اشره
بيموت ماقلت له يامطوّل الغيبه

اميّز الضحكه الضحكه من الكشره
وخصمي واعرفه بضحكاته والاعيبه

من بعدها ببتدي وافصّل النشره
وكلاّ يفسر على كيفه واساليبه

يابنت انا لابتي خيالة السمره
ارداهم اللي مايِحصون العرب طيبه

فينا الولد للمراجل واهبٍ عمره
يحري بكلمة نعم والنعم يحريبه

فينا الولد يرتكي للحمل من صغره
من شاف فعله لزومٍ انه يهذريبه

رفيقنا مايجيه ابر من تمره
وعدونا يابري حاله وطرجيبه

اشب ضوّي وسمره في طرف سمره
والضيف يبشر بعشر آلاف ترحيبه

لانيب اجامل ولا داني هل الزمره
ولاّ رفيقي تلبى له مطاليبه

اعز نفسي عن الهفوات والعثره
اخاف كلمة عذاريبه عذاريبه

الدرب ماقول ياطوله ويا قصره
لو كان في درب ماتِحمد عواقيبه

لا ششت كني هبيلٍ في طرف سكره
لا جيب للموت طاري قلت حلـّـيبه

وانتي لش المشط والريحان والحمره
وانا لي العز وافخربه واماريبه

وانتي لش الولوله والدمع والحسره
وانا لي المجد والنوماس والهيبه

انا ليا قلت عندي للفعل قدره
والا انتي اقصى علومش (ياقطع صيبه)

هاذي ترى زبدة الموضوع فالنشره
وكلاّ يفسّر على كيفه واساليبه

من راح يالله عساها لي وله سفره
ومن صدّق اهل النمايم ويش اسويبه!!؟؟

لكن قبل ماختم ابياتي على فِكره
الله يجازي هل النمّات والغيبه


الشاعر/ سالم بن جخير

[زود الغـــــــــــلا]

[85]


بنت الشيوخ اللي يسمون العنـود
يطغا على ريح الخزامـى فلهـا ..

تنبت لها ريضان قلبي عود عـود
تشفا لها روحـي ويبـرد غلهـا ..

زود على تاج الحلا دهنة اكبـود
كلي لها وهـي بعـد لـي كلهـا ..

وان طولت سود الليالي والوعـود
واصل لها وان طولت واصل لها ..

مايجرح فؤاد الهـواوي زود زود
الا جفـا منهـو يحـب وذلـهـا ..

وانا احمد الله معه وضعي قود قود
افـوح ادلال الـغـلا وازلـهـا ..

وارد على جال الغزير من العدود
اللي ضما نزف الجروح ايعلهـا ..

مايهتني بالـي ولايرتـاح كـود
لاشـاف زول ام الجدايـل فلهـا ..

مااحلا من اعيون العنود الا العنود
واجمل من وجيه العذارى ضلهـا ..

ان سولفت تنثـر سوالفهـا ورود
وان سلهمت لي بالعيـون فحلهـا ..


الشاعر/ محمد الحويله

[فهيد بن صبيح]

ارك الله فيش على النقل الرائع وانتي دوم متميزه

[ظما الوجدان]

السلام عليكم ورحمة الله وبركاته
أختي زود الغلا لا هنتي على ذا القصايد
و أعجبتني حييييل قصيدة فهد المساعد
تقبلي مروري
....ظما الوجدان....