يا الله ويا تالله وحن بك نستعين=في اي وقت وأي شكل وأي حال
الى سجدنا لك سجدنا مخلصين=وإلا دعينا بك دعيناك إبتهال
والثانيه خذيت لي خمسة سنين=وانا مع نجران قاطع الإتصال
إذا حصل منا خطا متأسفين=وإن ماحصل منّا خطا يا هملال
يفك سحر أبا الحصين أبا الحصين=والثالثه بعد دقيق العود مال
الناس هذا له يقين وذا يقين=وأطيبهم اللي يجوّد إيديني وقال
بزينك بزينك على روحك بزين=الأرض أهلها قوم ورضاها محال
صاحيها يدرك وعاقلها ذهين=والأرض ممطوره عقب طول المحال
لا تزعل السجان وتصير السجين=والمجرم اول ما يجيه الأعتقال
وكاد وإن الله خير الشاهدين=إني ما أعنزها على جال هيال
إلا على نجران وأهله يا حسين=شواهق منها ذرى ولها ظلال
وش تونس الخضرا يا زين العابدين=الى غفت سحابته والشعر سال
البارح الهاجوس للمسرى عوين=ونا على المسرى سريع الإشتعال
إذا بغيت اكتب ما تحفظه السنين=سفحّت بالمعنى على ظهر الخيال
ومن البيوت اخترت لي بيت هجين=ومن الجزيلات أتخير في الجزال
وسفطت بالهاجوس بين السايدين=والليل ذيبه يعوي ونجمه هلال
وصفقت بالطاره وركبته يمين=ودقيتها عصبه وطوحت العقال
يا يام أنا ماجيتكم ليل الثنين=الا ونا في إيدينكم بيز و جلال
أما إذخروني في وجيه الغانمين=ولا إزهلوني في الغواري والدلال
عبد ولو ما ني من المستعبدين=الى غدت في جاه عم وجاه خال
الله يجملني مع المتجملين=تراه يلحقني ردا بعض الليال
يا امير انا من عادني أبو سنتين=أسوقها لكن ما أحب الإنفعال
ولا أنفعلت اني حفيد العزوتين=اللي مراقيها على رووس الطوال
والشاعر اللي ينفعل في كل حين=على الزمان الله يعين ابن الحلال
ياكثر ما يجرح شعور الطيبين=لكن تعديها مقام وطيب فال
والإنفعالات الحقيقيه تبين=في ليلة ما عقبها الا بري حال
المنهزم والمنتصر يا حي عين=امثال والأمثال تضرب وتقال
مشاعري من صم صخرة ماش طين=لعيونك ولعيون اهل الإحتفال
قصيدة الذ من ما الرافدين=يدوي صداها كنه برق في خيال
الى بغيت افرق عن المستشعرين=ظمنتها اللي قيل واللي ما يقال
وحكيتها حكيتها حتى تزين=وحبكتها حبكتها حتى يخال
اني محشش أو مقضم حبتين=ونا من اهل الأدعيه والإبتهال
شاعر الى غنيت والمعنى دفين=لو كان به شيطان ما عين مجال
دايم من العد الروى آميح لين=ما عاد يبقى من جذام الحثال الا الحثال
حللت اهلا يالأمير اللي ندين=لك بالموده والمحبه والوصال
يامرحبا يا مرحبا ترحيبتين=وكل ترحيبه لها وجه ومقال
ترحيبة تفرح بها قلب الحزين=وترحيبة فيها غنج بنت الدلال
ولبيك لباية يتيم الوالدين=اللي تعيضه وقفتك عند السؤال
تصافحك كل القلوب إبلا يدين=وتحتضنك قلوب النشاما من خلال
نجران واللي في طرفها ساكنين=اللي ولاها لك ولا ترضى بدال
الطيب ورث ابوك ولجدك رهين=والمدح من تقدير ننظمه إرتجال
إن لم تكن لجلك ضعون الراحلين=فمن لغيرك قد يكون الإرتحال
ورجال يام نصر دنيا ونصر دين=لا تخذلك ولا تعرف الإنخذال
هي يسار يسار والا اللي يمين=واللي مقيمه في الجنوب وفي الشمال
واحد على طول الزمن ماهم ثنين=إن كان هم في سلم ولا في قتال
ودك بهم محزم لقا ولا يمين=يمين رجال لما انه قال طال
من عند حد المملكه جنوب لين=تفرق صلاف القاع من لين الرمال
الى التقت هدارة المجلس نبين=يوم اليمن يشكو ظروف الإنفصال
الى عفينا نعفو وحن قادرين=وإذا بطشنا ما بطشنا بطش ذال
إن ركدت حنا من المتوكلين=وإن قنبعت ما حن من أهل الإتكال
الله خلقنا للجوير وللزبين=وللأرمله وللي عليه الحال مال
من القطين نصدر أصحاب القطين=ومن التلال نحول أصحاب التلال
الى عطينا ما عطينا الا الثمين=وإلا خذينا ما خذينا الا حلال
لكن لا فاض الما على صاع الطحين=لعيون من يقبع عليها كل شال
نثور البارود و نشمه خنين=حنا عيال الشايب اللي له عيال
من دون هيبتنا وقفنا صاملين=رجال والماقف ما يبغى الا رجال
واللي ما ياقف دون حقه باليدين=دون البلد ما هو موقف في اي حال
وانا بمدح المكرمي جنبي متين=لازلت اقول انه كفو ولا يزال
هو شيخنا لون نختلف في المذهبين=نبينا محمد و مذنا بلال
ويعيش ابوساق وتعيش الحاضرين=شيوخ يام اللي لهم قدر وجلال
اللي يبي سلمه على ربعه مكين=لحمولهم يبرك مباريك الجمال
وان كان منت بشيخ فعل او شيخ دين=عيب عليك انك تسمّى شيخ مال
الشيخه شداد الشيوخ الأولين=لاهي بالدرهم ولاهي بالريال
وخريم شيخ وشيخته فعل سمين=ماخوذة بالسيف وحداب السلال
وريال مدريد انهزم خمسه ثنين=وحنا سبب خسارة مدرب ريال
قعد يجرح خاطر الجمهور لين=ثارت عليه اعصابها لين استقال
ياقو ذا البيتين عند اللي فطين=وياضعفها ضعفاه عند اهل الهبال
وفي ظل حكام الجزيرة قانعين=ان الحكم لله وحده ثم لـ آل
ال السعود اللي لهم في القبلتين=مواقفٍ تنحت على صم الجبال
في ظل عبدالله وسلطان الامين=ونايف وسلمان وحميدين الخصال
ياللي قريتوا في رياض الصالحين=نبينا الهادي محمد ويش قال
طاعة ولي الأمر نهج المومنين=وحنّا لجانا الأمر عند الإمتثال
وعلى معزي رحمة الوالي وامين=اللي حكمها بالقنا والإعتدال
والأربعين الاربعين الأربعين=اللي مع جدك معزي يوم صال
نصيبنا منهم معا جدك اثنين=وحوادث التاريخ ما تبغي جدال
وفي حب ابو متعب ترانا مدمنين=وإدمانا بين الصحاوه والهبال
والحب ما تفرقه عن الهيروين=يلعب براعيّه على سبعين جال
قدام تسأل عنّه المتفقهين=الثاني محرم لكن الاول حلال
وامثالك ندور عليهم بس وين=ياامير عيا الوقت يعطينا مجال
في ذمتي لو حن نعرفك من سنين=لعيونك نسوق الركايب للشمال
حتى نوقف عند امام المسلمين=ونصيح بااعلى الصوت يامشعل تعال
ويامرحبا في كل قلب وكل عين=ويامرحبا في كل وقت وكل حال
17-11-2009, 01:02 PM
العرض المتطور
