## عجمية ولي الفخر ضيفة على كرسي الاعتراف ##

[الشامخه]

هلا أخوي ALAJMI وحياك الله


سؤال يتيم كالعاده : ماهو مجال عملك وطبيعته؟

مجال عملي له علاقه في البيئه وطبيعة عملي هو أخذ القرأت بأجهزه متخصصه في هذا المجال

أشكر مرورك اخوي ALAJMI

[الشامخه]

هلا أخوي سياتل وحيااك الله

بس ابي لو سمحتي القصه وبالتفصيل اذا امكن و باي عمر كنتي؟

كنت بالمرحله الابتدائيه يمكن عمري 7 سنين وكانت الساعه 6 صباحا يوم الجمعه وكنا بذاك الوقت اداوم حتى خميس يعني اجازتنا الاسبوعيه بس يوم الجمعه يمكن تذكرون حتى

المهم كان صوت القطوه مزعجني حيل قاعده أقول ألحين بتسكت بس ماكو كل مالها وتزيد طلعت الحوش وخذيت طاابوقه وفكشت راسها على طووول ماتت بس لما درت أمي شنو صاار؟ خذيت زفه محترمه بس لما كبرت وكل ما أتذكر هالسالفه قلبي يعورني طبعا وهذي القصه بالكامل أخوي سياتل طبعا ألأحين أموووووووت بالقطاوه حييل يمكن تكفير عن الذنب

أخوي سياتل أتمنى جاوبتك على أسالتك وشكرا

[الشامخه]

هلا أخوي كويتي وحيااك الله

بالعكس معذوور وحياك الله بأي وقت

شنو برجج بــــــــــس ؟؟

برجي الثور


شاكرتلك

[الشامخه]

هلا أخوي تايه الغربه وحيااك الله

أين تكمن السوداويه في حياتك ؟ وهل ترضخين لها بسهوله ؟

عندما أفقد شعوري بذاتي .... لا طبعا الانسان يجب أن يكون لين ويقبل التغيير

الكويت ,, ماذا تعنـي لــــــــك .. وماذا ينقصها لكي تكون كما تحبين!

الكويت أهي وجودي وكياني وأتوقع هذا شعور كل كويتي ... المزيد من الأمان والتقدم في كل مجال

أهم شئ غير مجرى حياتك .. اضاف لها او حوّل بعض مسارها ..!

أرتباطي اضاف الكثير لحياتي


هل تؤيدين التصفح الخفي ام الظاهر .. ولماذا ؟

أؤيد التصفح الظاهر ...لأنه التصفح الخفي ما أشوف غير أو يضيف للعضو شيء ما المانع أن كل الأعضاء يعرفون بتواجدك في هذا الوقت

هل الكاتب مطالب بأن يبرمج نصوصه وفق فهم القارئ، أم يكتب كما تملي عليه بنات افكاره ؟

أنا بنظري يكتب كما يشعر الكاتب حرفيا لأنه الكاتب ليس مطالب بأن يقلل من أفكاره أو يغير فيها حتى يجاري القاريء برأيي القاريء يجب أن يرتقي بطريقه تفكيره حتى يصل لفكره الكاتب وبذلك تعود بالفائده الكبرى للقاريء وهي ترقيه وعلي طريقه تفكيره

حيااك الله اخوي تايه الغربه وأـمنى أني جاوبتك على أسألتك

[الشامخه]

هلا أخوي معقل الخبلان وحيااك الله

الله يبارك فيك ومشكور على الكلام الي قلته وفال لك اذا كنت بعددك ما تزوجت

لو تقدم لش من هو كفو وصالح شاب في وظيفه زينه ومصلي وخايفن ربه ومحبوب من ربعه وجماعته.. بس اصغر منش بسنتين او ثلاث.. هل تقبلين ؟؟ واذا لا وش الاسباب؟؟( ترا مو قصدي شي من ها السؤال اقسم بالله الا بس اني اعرف وجهة نظرش )


لا ما أقبل لأنه بوجهة نظري البنت لازم تكون أصغر من الرجل هذي طبعاا مو قاعده ياما ناس تزوجوا والبنت أكبر ونجح زواجهم .. بس أنا شخصياا لا أقبل لأنه البنت المعروف عنها تكبر أسرع من الرجل فالحلو تكون أهي أصغر منه ..بس الأول والأخير كل شيء قسمه ونصيب من رب العالمين

الا ليه اتكملين حضري وما توشوشين مثلنا؟

ما أدري بس أحنا بعايلتنا العجايز بس الي يوشوشوون بس ساعات لما أعصب على خواتي يطلع العرج وأوشوش غصبن علي


تسلم اخوي معقل وأشكرك على ذوقك وأتمنى أني جاوبتك على الأسئلتك

[مخاوي العجمان]

عجمية ولي الفخر

بصراحه اشكرك على اجوبتك ولكن عندي ملاحظة على جواب واحد

عندما سأل احد الاخوة سؤال وقال من مثلك الاعلى؟

فأجبتي جدتي

وعلى عيني وراسي جدتك ولكن هناك من هو أولى إنه:

الرسول محمد صلى الله عليه وسلم

وشكراً لكي شفافيتك.

[الشامخه]

هلا أختي كويتيه وحيااج الله

أيه والله طافني بس لو كنت أدري كنت هريتج أسأله

بس يا الله خيرها بغيرها

اي صج كويتي سال شنو برجج. قوليلناا شنو برجج و هل تامنيين بالابراج ولا لا؟؟؟..

برجي جاوبته عند سؤال الأخ الكويتي ..أما اذا كنت أؤمن بالأبراج شوفي ساعات يقولون مواصفات الشخص في هذا البرج وساعات تكون حقيقيه ومتطابقه بنسبه حيل عالييه ... أما الأخباراليوميه لهذا البرج مثلا شنو راح يصير لصاحب برج الثور في هذا اليوم وشنو حظه ما أؤمن فيها كلش .. لأنه ما يعلم الغيب الا الله سبحانه وكذب المنجمون ولو صدقوا

وعلى فكره انا لازم اجيك الكرسي و لي طرى على بالي سوال بسال اكيد الاساله عمرهاا ماتخلص

لا تكفيين لألأ وبعدين الحمد الله صاار أفراج واليوم أخر لي في كرسي الاعتراف

حيااج الله أختي كويتيه وأتمنى أني جاوبتج على أسألتج

[الشامخه]

هلا وغلا أختي السنافيه وحيااج الله



انا لاحظت انه فى بعض الاسئله ماتجاوبين عليها مثل من وين من العجمان شنو سيارتج
,, مع العلم انج على كرسى الاتعراف ؟

أختي السنافيه السؤال الي سألتني اختي عجميه ملسونه من وين من العجمان جاوبتها عليها وتقدرين أتجيكين ..... أما شنو سيارتج أختي هذا منتدى عاام وصعب أقول شنو سيارتي بس أنا لمحت .. وما أعتقد أني قصرررت في اجوبت الأخوان والخوات

1- ليش اخترتى هالنك بالذات ؟

أول ما دخلت منتدى العجمان على طوول طرأ في بالي هذا النك يعني ماقعدت أفكر شنو أكتب بالفطره طلع

2- شنو يعنى لك النت ؟

ولا شيء .. ماهو شيء أساسي بحياتي

3- بنظرج ليش دايم العضو الناجح والمتميز له اعداء بالمنتدى ؟

موبس العضو الناجح له أعداء في المنتدى كل شخص ناجح له أعداء في الحياه .. أما ليش بأعتقادي عدم الثقه بالنفس أهي الي تولد الشعور بالغيره وبالتالي يعادون الشخص الناجح ..وأتمنى هذا الشيء ما ينوجد في منتداانا

4- شنو هدفج بالحياه ؟

كل فتره يجدد هدفي بالحياه .. اما هدفي الي مايتغير هو أرضاء رب العالمين

5- اخر دمعه نزلت من عجميه ولى الفخر وليش ؟

جاوبت على هذا السؤال وأعتقد من ضمن أسئله أخوي السلاطين

6-من هو العضو الي برأيج يستحق يكون مشرف بالوقت الحالي ؟

كل عضو يستحق هذا الشيء اهو الي يستااهل

7-لو ملكتي العالم لمدة ساعه شنو الشي الي راح تسوينه ؟

يمدييني أسوي شيء بهالساعه ... اول شيء انفذ حكم الأعدام لصداام

8-لو كنتى فى صحراء وفجأه طلع لج الفانوس السحرى وطلع لج المارد قالج اطلبى 3 امنيات شنو تطلب عجميه ولى الفخر ؟

أول شيء يرجعني لأهلي دام أني بصحراء وماعندي أحد .. وثااني شيء أطلب أكل يكيفي لا ما أوصل لأهلي .... وثاالث شيء أطلب كراتيين ماء صحه ( بس مو من اجاوبتي تتوقعين أني دبه ترى مو متينه )

9- شنو شعورج لو تفوزين بمليون دينار ؟ وشنو راح تسوين فيهاا ؟

رااح أطير من الفرحه ... أول شيء اتدصق على الأطفاال الفقراء بجميع أنحاء العالم ....واذا بقى أشتري كل شيء كان بخاطري فيه ألحين ما أدري شنو الي بخاطري فيه

10-اجمل هديه قدمت لج ؟

خاتم الزواج والفال لج ولكل البنات في المنتدى

11- كلمات شنو رايج فيها ؟

(( الحب , الخياانه , الغدر , الصداقه , الكذب , الامومه , ))


الحب : هو الشعور للتواصل

الخياانه : أمكر صفه وأجبن صفه

الغدر: معناته عندي مثل الخياانه

الصداقه : لا توجد هذي الأياام ومعناته اكيد شيء حلو

الكذب : فقدان الثقه بالنفس ومرض

الأمومه : أحلى شيء بالوجود عسى الله يرزقنا وأياكم الذريه الصالحه

12-بحط لج مواصفات وابيج تحطين كل عضو او مشرف يناسبه الوصف ؟ وبدون مجامله ؟

- عضو / مشرف توقيعه حلو ؟

أعتقد أسمه birlliat ما أذكر بس كان توقيعه حيل عاجبني واهو ( عندما أنتهيت من بناء سفينتي جف البحر )

-عضو /مشرف نشيط ؟

- عضو /مشرف واثق من نفسه ؟
المتلقم
-عضو /مشرف اتمنى التقى به ؟
السؤدد
-عضو /مشرف مثقف ؟

وايد ابوحمد ااالشامري

- عضو /مشرف ودج تغرين نكه ؟

عجمي عراقي ما أدري ليش أسمه جذيه

- عضو / مشرف ودج تعرفين معنى نكه ؟


- عضو /مشرف تحسين انه شايب ؟

شاايب حيل ماكو بس بس الي احس انهم أكباار وايد لورنس السلاطين بوتركي

- عضو /مشرف يناسبه لقب طموح ؟

كويتي

-عضو /مشرف قريب لقلب عجميه ولى الفخر ؟

كلكم
-عضو /مشرف الكل يلجأ له للمساعده ؟

أنا ما أدري منو الي يلجأله بس أنا لما تواجعني مشكله في عرض احد مواضيعي ألجال الأخ ALAJMI من الداره

-عضو /مشرف دمه خفيف ؟

واييد بس ما أذكر

13- مليتى من الاسئله ؟

لا بالعكس بس أسالتج واييد اكثر وحده أسالتني شنو أطلعين حرتج عااد يوم كنتي انتي بكرسي الأعتراف اسالتي كانت خفيفه يمكن سؤالين أو ثلاث بس

بالعكس أضحك معااج حيااج الله أختي االسنافيه وما قصرتي والله يوفقج أنتي بعد بدراستج وبحياتج

[الشامخه]

هلا فيك أخوي مخاوي العجمان وحيااك الله


عندما سأل احد الاخوة سؤال وقال من مثلك الاعلى؟

فأجبتي جدتي

وعلى عيني وراسي جدتك ولكن هناك من هو أولى إنه:

الرسول محمد صلى الله عليه وسلم


بدون شك مثلي ومثل كل مسلم ومسلمه الرسول عليه الصلاة والسلام عسى أن نمشي على خطااه ..عندما سألت هذا السؤال كان القصد الي اتوقعه وفهمت وهو مثلي الاعلى بالحياه واللذين عشت معهم ...أما الرسول عليه الصلاة والسلام فهو مثل لكل مسلم ومسلمه والقدوه بالرسول عليه الصلاة والسلام فهو بالفطره ومحبته أيضا .. ولكن كل واحد فينا له مثله الاعلى من بين اهله ان كان والده أو والدته كونه عاش بينهم


أشكرك أخوي مخاوي العجمان على المرور والتعليق وأتمنى أني وضحت القصد وحيااك الله

[السنـــــافية]

لا بالعكس بس أسالتج واييد اكثر وحده أسالتني شنو أطلعين حرتج عااد يوم كنتي انتي بكرسي الأعتراف اسالتي كانت خفيفه يمكن سؤالين أو ثلاث بس

لووووووووووووول


مادرى عجميه ولى الفخر يمدينى اسأل بعد ولألأأ

عالعموم تسلمين على اجوبتج وروحج الحلوه

تحياتى لج

[الشامخه]

لا ما يمدي راحت علييج اليوم أفراج لي خلاص

[مـحمـد]

كل الشكر على تجاوبك مع الجميع
والسؤال الاخير بما انه اليوم الجمعه من تختاري بعدك ليجلس على كرسي الاعتراف علما بانه توجد قائمه فيها جميع الاعضاء اللذين جلسو على كرسي الاعتراف بامكانك الاطلاع عليه
مواضيع كرسي الاعتراف

[الشامخه]

هلا اخوي ALAJMI اخترت الأخ السلاطين وان شاء ما اكون احرجته

لك كل الشكر اخوي على الرابط

[اطياف الماضي]

اما سالفة القطوووووووة

هههههههههههههههههههه اثاريك مجرمة

لوووووووووووووووووووول

................

واخيــــــــــراً

عزيزتي

اسعدنا حضورك الرائع وتجاوبك الجميل مع اسئلة اعضائنا الكرام ..

وسعدنا بمعرفة ضيفتنا الغالية

لك غاليتي

اصدق الدعوات والامنيات بحياة سعيدة وهانئة

ونتمنى لك التوفيق اينما حللت

نشكر لك اختيارك الرائع

تقبلي اجمل تحية

[مخاوي العجمان]

يعطيكي العافية على الرد يا مهندستنا