الشاعرة عابرة سبيل

[نـاصـر]

السلام عليكم

أعرض امامكم كنوز ادبيه من شاعرةٍ بزغ نجمها في سماء الساحه الشعبيه وغاب فجأه غيبه مفرق الجماعات والاحبه إنها الشاعرة عابرة سبيل رحمت الله عليها واترككم معها لتقدم نفسها لكم:

أهلي يـدرون إنـي شاعـرة=بس مايدرون في جرح الليال
يمنعوني من كتابـة خاطـرة=مادروا إني من زمان بهالمجال
آه لو يدرون اني (( عابرة ))=عندهم بتصير موتتنا .. حـلال

ولا تخلو قصائد شاعرتنا من بعض الطرائفه حيث تقول عن نفسها:

أنا عجوز مطلقـة وأم ورعـان=وأيضاً مدام وبنت وآنس وعانس
أنا بدوية وعايشه عند حضـران=وبنت البحر وأبوي زارع وغارس
أميةٍ ماتعرف حـروف وألـوان=وتلميذةٍ دشت جميـع المـدارس
ظفرة وخبلة عاقلة في نقصـان=شرود وأنطح لي ثمانين فـارس
خلوني أعيش العابرة دون عنوان=طيفٍ يمـر بلارقابـة وحـارس

وهنا تتحدث عن كبريائها وسمو نفسها أمام معشوقها:

بريال عارضته على السوق بريال=من باعني برخيص والله لأبيعـه
من يشتري رجّال قصّر بالافعـال=باع العهود الماضيـه للخديعـه
رجّال يسوى له ثمانيـن رجّـال=كل الصفات اللي ملكها فضيعـه
له ضحكةٍ تشبه لضحكات الأطفال=ذيبٍ ونظراتـه حنونـه وديعـه
وله فزعةٍ منها المجانين عقّـال=وفجوج لا ضاقت عليّ الوسيعـه
ياما عدل عوجا ثقيلات وطـوال=وأنا معاقبتـه غيـورٌ صريعـه
والله يسوى لـه ثمانيـن رجّـال=والخبل مثلي لا زعل يب يبيعـه

وهنا تتحدث عن الأيام الخوالي ولوعات الفراق:

ليتنـي البارحـه ياغالـي ماسريـت=يم درج ٍ مقفـل مـن قديـم السنيـن
أشهد اني فتحتـه وانتحبـت وبكيـت=شفت ماهيض الجرح القديـم الدفيـن
شفت وسطه رساله وليتنـي ماقريـت=بيت شعر قديم وظرف مـع صورتيـن
اشهد انـي لغيـره بالغـلا ماعطيـت=واشهد انه بغاني مير ما مـن عويـن
صحت من قلب ياويلي على اللي هويت=وقمت امسح دموعي من يسار ويمين
لاطرالي حبيبي بصوت واطـي حكيـت=!! إنا لله .... وإنـا للولـي راجعيـن

وهذه بعض قصائدها الطريفه:

لي صاحبٍ منه تبي تطلـع الـروح=خبلٍ ومن هي مولعه فيه .. خبله
عامين المح له من الجد ومزوح=واقـول ياعنتـر تناديـك عبلـه
طال المدى ثم قلت انا اغليك يالوح=مجروحه جرحٍ مخاطـره عجلـه
دنق وقال آنا من العام مجـروح=وأشر لجرحٍ مبطي وسـط رجلـه

ياخبلي الغايب متى ترد للعين=متى اشوفك او تجيني رساله
صحيح بالدنيا خبولٍ كثيريـن=لكن خبالك ياحياتـي لحالـه

لقيت بعض البيانات الشخصيه للشاعرة عابرة سبيل وشفت ان الشغلات هذي تعتبر من خصوصيات الشاعره وماتلزمنا مثل اسمها وحالتها الاجتماعيه .

ولكن نكتفي بتاريخ وفاتها الله يرحمها توفيت الشاعرة عابرة سبيل في تاريخ:18/ 3/ 2003م

وهذه اخر قصائدها رحمها الله:

ترى الذبايـح واهلهـا ماتسلينـي=انا ادري ان المرض لايمكن علاجه
ادري تبـي راحتـي يابعـد عينـي=حرام ماقصرت ايديك فـي حاجـه
اخـذ وصاتـي وامانـه لاتبكينـي=لوكان لك خاطرن ماودي ازعاجـه
ابيك في ايدينك تشهدني وتسقينـي=وداعتك لايجـي جسمـي بثلاجـة
لف الكفن في ايديك وصف رجلينـي=ماغيرك احدن كشف حسناه وحراجه
ابيـك بالخيـر تذكرنـي وتطرينـي=يجيرني خالقي مـن نـار وهاجـه
سامح على اللي جرى مابينك وبيني=ايام امشي عـدل وايـام منعاجـه
اعيالي همي وانا اللي في يكفينـي=علمهم الديـن تفسيـره ومنهاجـه

في ختام الموضوع لايسعنى ألا الدعاء للشاعرة اللهم ارحمها وتجاوز عن سيئاتها وابدلها داراً خيرٌ من الدنيا.