قصه شيخين من شيوخ الجزيره العربيه !

[ماتنحني هامتي]

بسم الله الرحمن الرحيم
كان أحد أفراد عنزة زعلان على قبيلته عنزه وحب انه يتوحد بهالحماد ويبتعد عن قبيلته اللي هي عنزه وبيوم من الايام وتضيعله ناقة انفقدت ويقال أنها غدت وراح يدور عليها وخذا أكثر من شهر ويوم نشد عنها بكل مكان قالوا له ترى ناقتك انذكرت انها عند شمر عند الجربان شيوخ شمر ويم نصى قبيلة شمر وصل يم مطلق بن الحميدي الجرباء الملقب ب (أخو جوزه) دخل بالمضيف وتعشى عندهم وقال أريض الليلة وأنام والصبح أنشد عن حاجتي ويم جا يبي ينام الا في شمري بجنبه يدور التعالييل والشمري سأل العنزي قاله عمرك شفت أشجع واكرم من راعي هالبيت ، قال العنزي :
كل ديرة لها حقها ورجالها ، قال الشمري دامك قلت هالكلام : لازم تعلمن منهو اشجع منه ..
الوكاد ومطلق الجرباء هو يذعن لهم لانه مانام وسمع الكلام اللي بينهم ..
المهم ويرد العنزي ويقول للشمري اللي أشجع منه : راعي الحصان جديع بن هذال ..
ويم سمع مطلق هالكلام قال للعبد شب النار والوقت كان بآخر الليل
والعوايد أن شبة النار بها الوقت يعني في شي والكل لازم يجتمع،،،
المهم تجمعوا حوله الربع وقال لهم مطلق الجرباء أبي أسولف عليكم سالفة قالوا قل وشو سالفته،،

قال سنة من هالسنين تواجهت أنا وجديع بن هذال راعي الحصان يومنه نازلٍ بالعجاجه وخذا سبعة أشهر وهو غزاي ويم لفيت عليه ومعاي 30 خيال من شمر قلت له يا جديع وش رايك نغزي على مطير أنا عقيد شمر وأنت عقيد عنزة اللي معك قال جديع الشور شورك يا بو مسلط وأنا لا قاله الله اني مصبحهم،،
المهم ومطير كانوا على مارد سواج بالقصيم ويم وصل جديع واللي معه من عنزة ومطلق واللي معه من شمر والا يبحرون بعيونهم الا البل ماده اللي هي ابل مطير وما حولها أحد وساقوا حلال مطير كله وأخذوه ويم أقفوا الا فريس مطير يحلقونهم وعنزة هي اللي متقدمه وشمر هي اللي توالي الفريس فقال مطلق الجربا أخو جوزه لجديع بن هذال راعي الحصان كلن يحط صابور من ربعه (والصابور هذا جماعه من الفرسان يتراوح عددهم من عشرين الى ثلاثين فارس ولايكونون الا من اشجع الفرسان لانهم يعتبرون في عداد الاموات مهمتهم يردون اللي هاجمين عليهم اللي هم مطير ) المهم يقول مطلق لجديع
ياجديع اليا قربوا الفريس الصابور يرد عليهم وباقي الغزو يروح بالحلال قاله جديع ما يخالف،،، وحط الجرباء الصابور وعنزة ظعونهم متقدمه والا الجرباء يبحر أن جموع عنزة مقفيه وفريس مطير ذبحوا صابور شمر بالكامل ولحقوهم حمران النواظر يبونهم وكان مع مطير ابو شويربات (شيخ البرزان) والمريخي (من مشايخ بريه) ومسعود البريعصي (حصان ابليس) ، المهم قال مطلق الجربا وين صابور عنزة يا جديع قاله ما من صابور،،


أنا وانا أخو بتلا صابور الويلان كلها وينتخي وانا راعي الحصان ويقول وهو يلكد فرسه ويحذفها على مطير وفريسهم :



معلم الصبيان وأنا أخو بتلا @،@،@،@،@ ضراك بالصيد غزال منكسر




ويم بحروا به مطير لاو الله ويعرفون انه راعي الحصان جديع بن هذال ويم شافه مسعود حصان ابليس ويهج عنه ويرد عليهم جديع ويردون عنزة معه وانذبح هذاك اليوم منهم المريخي من مشايخ بريه وشتت الجبلان من مطير ويهزمهم واخذو الابل والحلال غنايم لهالمعركه،،،


المهم عقب ماقضى مطلق من سالفته اللي قصها على الربع هو مقصده أنه يسمع العنزي اللي جاء ينشد عن حاجته ووعرف أنه يقدر الرجال حقوقها وانه رجل يقول الحق ولو على نفسه وبعد هالسالفة وعطاه اللي يبيه وأكرمه ،،،

ويعطيكم العافيه على مروركم على هذي السالفه اللي نعتز باصحابها وتاريخهم،،،


ودمتم سالمـــين،،،