نومك طرب وانا بنومي هواجيس

[نـاصـر]

هذه القصيده للشيخ والفارس تركي بن حميد العتيبي

نومك طرب وانا بنومي هواجيس=ماسهرك بالليل كثر الهمومي
اسهر الي نامت عيون الهداريس=وبالليل ارعي ساهرات النجومي
قالوا:جهلت وقلت جهل بلاقيس=الجاهل اللي مايعرف العلومي
اشوف عدلات الليالي مقابيس=ولحدٍ من الدنيا عظامه سلومي
تضحك وتخفي لك خفي الهناديس=تفطر لها يوم ويوم تصومي
اعمل وتلقي وافهم العلم بالقيس=دنياك لو زانت تراها نقومي
والعز فوق معسكرات السواديس=الي قصدت اللي بالأشياء رحومي
قب تنازا بالنشاما كراديس=والطير في روجاتهنه يحومي
الي توافق مشور السوء وبليس=تبر منه وعز ربي يدومي
بالليل اصالي حاميات المحاميس=والصبح اصالي كل قبا قحمي
أربع سنين ودمع عيني أماريس=والعين تسهر كن فيها هزومي
والي ركبت معالجات المضاريس=يبردعلى قلبي لهيب السمومي
صوابنا بالليل عمق بلا قيس=وطريحنا في مثبره مايقومي
ان جن بنا مثل النعام الأماريس=لاخف عجل مع رقاق الحزومي

واتمنا ان تحوز على رضاكم
بن هادي

[مفلح]

قالوا:جهلت وقلت جهل بلاقيـس
الجاهل اللي مايعـرف العلومـي
اشوف عدلات الليالـي مقابيـس
ولحدٍ من الدنيا عظامه سلومـي


صح لسانك يابن هادي ، الله لا يهينك على الإختيار

وصح لسان الشيخ الشاعر تركي بن حميد العتيبي

[عيد بن شدقان]

بن هادي
لا هنت
وصح السانك والسان العتيبي

[عـزام]

قالوا:جهلت وقلت جهل بلاقيـس
الجاهل اللي مايعـرف العلومـي
اشوف عدلات الليالـي مقابيـس
ولحدٍ من الدنيا عظامه سلومـي


لا هنت ياا بن هادى وصح الساان الشيخ تركى بن حميد (الله يرحمه)


تحياتى:

الولــــهــــان

[العماني]

لاهنت يا ابن هادي على الاختيار الطيب.
بس القصيدة ناقصة وفيه أبيات كثيره غير موجودة
وهذه هي القصيدة كامله والكامل الله

.

نومك طرب وانا بنومي هواجيس=ماساهرك بالليل كثر الهمومي
اسهرالى نامت عيون الهداريس=وبالليل أراعي ساهرات النجومي
قالو جهلت وقلت جهل بلا قيس=الجاهل اللي ما يعرف اليمومي
أشوف عدلات الليالي مقابيس=ولحد من الدنيا عظامه سلومي
تضحك وتخفي لك خفي الهناديس=تفطر لها يوم ويوم تصومي
اعمل وتلقا وافهم العلم بالقيس=دنياك لو زانت تراها نقومي
والعز فوق معسكرات السواديس=الى قصدت اللي بالاشياء رحومي
قب تنازا بالنشاما كراديس = والطير قى روجا تهنه يحومي
الى توافق مشور السوء وابليس=تبر منه وعز ربي يدومي
بالليل اصالي حاميات المحاميس = والصبح اصالي كل قبا قحومي
اربع سنين ودمع عيني اماريس=والعين تسهر كن فيها هزومي
والى ركبت معالجات المضاريس=يبرد على قلبي لهيب السمومي
صوابنا بالليل عمق الى قيس=وطريحنا في مثبره ما يقومي
ان جن بنا مثل النعام الاماريس=لاخف عجل مع رقاق الحزومي
أستلحق اللي يطلبون النواميس=اللي من الاقصين وادنا اللحومي
لاخير في كثر الحكا والتماليس=هرج بلا فعل يجي به وهومي
لومي على اللي ينقلون العبابيس=واهل الفرنج وكل رامي لحومي
ان جن بالميدان مثل الدواويس=وطار الغطاء عن قانيات الرقومي
عرج باهلهن كنهن القرانيس=على الطريح مصوبرات كضومي
الى سمك عج الرمك بالملابيس=المسعد اللي حظ ربعه يقومي
حتى يزين لنا المثل والتوانيس=والكيف طاب لمن يفك الفحومي
من لا يديس الرأي من قبل ماديس=عليه داسوه العيال القرومي
ومن لايقلط شذرة السيف والكيس = يبدي عليه من الليالي ثلومي
والقصر ما يصلح على غير تأسيس=ومن لا تعلم ما تسر العلومي
ومن لاخذ الدنيا بميز وتقييس=مثل الذي يصبح بليل يعومي
كل القلم من كتبنا للقراطيس=وركابنا من كثر الاقران تومي
الشيخ من يعطي الفقار المفاليس=يبدل الساعه بعز يقومي
والحر لادبت عليه النواميس=يشهر وعن دار المذله يشومي
والى اكترب من بعض الاشياء نسانيس = اعزم ولا بد الفرج بالعزومي
باب الفرج لبسك نظيف الملابيس=ينجيك بأيام الكرب والزحومي
أوجس بقلبي مثل دق النحاحيس=الله يلوم اللي لحالي يلومي
يجلي صدا قلبي ضبيح المهاريس=لاقام شراب القهاوي يعومي
دلال فوق النار دايم مجاليس=اكرامهن حق علينا لزومي
من صنعة الصبه وخمس التخاميس = برية يعمل بها كل يومي
وبهارهن هيل بليا حواسيس=كيف يعدى للنشاما القرومي
عده لحماي العياد المراويس=والا الحصان اللي بقينه وهمومي
حتى يزين لنا المثل والتوانيس=والكيف طاب لمن يفك القحومي
وصلاة ربي عد رمل الطعاميس=على شفيع الخلق يوم اللمومي

[نـاصـر]

مفلح شاكر مرورك وتعليقك على موضوعي

[نـاصـر]

الراكد شاكر مرورك على موضوعي

[نـاصـر]

الولهان شاكر مرورك على موضوعي

[نـاصـر]

العماني يعطيك العافيه على اكمالك لنا القصيده ولكن ماكان عندي خبر ان القصيده ناقصه انا نقلتها من كتاب ( القول الفاخر لاهل المفاخر )

المؤلف: عبدالله بن شعران العجمي

وانا كتبت البيوت اللي موجوده في الكتاب

يعطيك العافيه يالعماني على اكمالك لنا القصيده

وتقبل تحياتي

[ابوحمد الشامري]

لا هنت يا ابن هادي على القصيدة الجزلة والله يرحم الشيخ تركي بن حميد ويسكنه الجنة.

ابو حمد الشامري