يمه,, اذنبت,, ونزحت من العشيره

[أبو الوليد]

هذه قصيدة للشاعر المبدع ناصر القحطاني واتمنى تحوز على رضاكم

يمه.. اذنبت.. ونزحت من العشيره=وان تمنوا توبتي ما نيب تايب

مابي لدنيا الغنادير أي سيره=طايح من عام الاول في مصايب

يمه.. اللي حب له طفله صغيره=وش يسوي لا غدا فيها طلايب

طفلة ما كانت بحبي جديره=بس كانت غير عن كل الحبايب

كنت اسميها العنود المستذيره=ليت اهلها العام سموها عجايب

كنت اجيها مثل الامطار الغزيره=كنت أضيع بجوها مثل الهبايب

واطلب الله هي متى تصبح كبيره=تفهم شلون المكان يكون ذايب

ان تغنت صارت الطرقه قصيره=وان تغلت صارت جروحي عطايب

وان بكت ناش الفضا طهر الستيره=وان شكت صار الحكي مثل الذهايب

وان توارت مثل الاسرار الخطيره=صار لوني مثل الايام العصايب

ديرة ما هي بها ما هيب ديره=لو ثراها عشب واعلاها سحايب

يمه.. تحبين.. طايلة الظفيره=آه.. والله يا عليها اشقر ذوايب

ان تبعثر له سواليف كثيره=وان ركد روّح مثل لمة قرايب

عرّفتني الليل ونجوم الظهيره=بللتني باغنيات ورحت طايب

كل عرق في خفوقي تستثيره=خايف تصبح مراجيحه نصايب

صنتها مثل البحر لا بعد جزيره=ما تركت علومها لاهل الركايب

قالت ان جا الراس شايب فيه خيره=قلت يا بنت الحلال الراس شايب

قالت الا الحب وش هو؟ وش مصيره؟=قلت انا استاهل انا كل السبايب

ما جزا اللي حب له طفله صغيره=غير قبر.. وضحكها فوقه.. نصايب

[فيصل بن حجرف]

رائعه من روائع المبدع ناصر القحطاني

لاهنت يبو الوليد على النقل الموفق والجميل

تحياتي

[أبو الوليد]

ولا انت يا بوعبدالله

اسعدتني بمروك طال عمرك

تحياتي لك

[ابوتركى]

ياسلام عليك يابوالوليد على الاختيار الجميل

يااااااااااااااااااااخى والله انك جميل


تحياتى لك

[أبو الوليد]

هلاااااااااا اخوي بوتركي

والجميل فعلا هو مرورك يالغالي

تحياتي

[عزوف]

قصيــــــده رائعه لشاعر مبدع


اختيار موفق ويعطيك العافيه يا ابو الوليد

تحياتي

[أبو الوليد]

عزووووف:

الله يعافيك يارب وشكرا على المرور والتعقيب

تحياتي