ابي اتزوج الثانية لكن؟

[ابو فهد العجمي]

السلام عليكم ورحمة الله

اعرض لكم المشكلة اللي اواجهها من سنوات
انا متزوج من بنت عمي
ومن اليوم الاول وانا مو عاجبتني
اقصد شكلها ما اعجبني
لكن قلت يمكن مع العشرة احبها

بس للأسف ألحين صار لي معاها اكثر من 18 سنة
ولي منها 5 عيال

طوال هالفترة وانا اغصب نفسي عليها
وكنت ابي الزواج لكن ظروفي المادية ما اسمحت لي
خصوصا مسألة السكن

لكن ألحين بعد ما طلع البيت الحكومي
وبنيت فيه شقة للايجار
فكرت اني اخذ ايجار الشقة واؤجر شقة بره البيت للزواج بثانية

وتقريبا دبرت كل اموري

لكن امامي مشكلتين

رفض زوجتي فكرة زواجي
لمحت لها اكثر من مرة
كان ردها تزوج
لكن اول عطني ورقة طلاقي
وعيالك ماراح تشوفهم الا مرة بالاسبوع
وراح ارفع قضية نفقة
واخذ نص المعاش

يعني الواحد شنو يسوي يغصب نفسه على وحدة مايبيها
والمشكلة بنت عمه
لو طلقها تصير قطيعة رحم ومشاكل
وهالشي هو اللي مخليني اتردد طول هالسنوات
اضافة لظروفي المادية



المهم
انا تعبت ومو قااادر
ابي اتزوج
طبعا محدراضي يخطب لي من خواتي

ما لقيت الا الخطابات

وكان شرطي اني اشوف البنت قبل التقدم لخطبتها
وبالصدفة لقيت خطابة في احدى المجلات واخذت رقمها
وكلمتها
وقلت مواصفات البنت اللي ابيها
وقلت شرطي

وبعد اكثر من شهر
دقت الخطابة تقول لقت البنت
وامدحت فيها
لكن قلتها ابي رؤية شرعية
حتى لو عند اهلها
اهم شي اشوفها

البنت اهلها ما يوافقون على الرؤية الشرعية ( تعرفون البدو وعاداتهم)
فالخطابة اقترحت علينا ان نشوف بعض في احد المطاعم اللي فيها كباين
وفعلا وافقت البنت بعد تردد
وتمت الشوفة بحضور الخطابة

وياليتني ما شفتها




البنت طلعت حلوة واعجبتني
وفوق هذا اصل وشهادة ووظيفتها زينة
وهذا السبب الثاني اللي مخليني اتردد

وحدة مثلها ليش ما تزوجت ؟؟؟
خفت لا يكون فيها شي

مدري ياناس
اعجبتني لكن هالشي محيرني ليش وحدة مثلها ما تزوجت للحين

وفوق هذا شنو اللي يخليها ترضى بواحد متزوج وعنده خمس عيال



والمشكلة الثانية هي كيف اتصرف مع زوجتي بدون لا اخسر عيالي ومعاشي؟؟ وبدون مشاكل

لو كنتوا مكاني شلون تتصرفون؟؟؟؟

[بعيد الهقـاوي]

السلام عليكم ورحمة الله وبركاته

اول شي يا ابوفهد وشتبي بالخطابات اذا انت رجال اتشوف ان مافيك اي عيب


دور عند بني عمك ولا اجواد الخلق ولو انك صامل في الموضوع اخطب عند ربعك


ولا بيذكرون لك عند فلان ولا فلان


وبعدين معزبتك لا اعرست بتزعل يومين وتعود علي بيتها وعوالها



ولاهيب مشتكيه وابيها واخوانها ما يخلونها تشتكي علي ولد عمها عشانه اعرس


بس الحين تهددك عشان ماتعرس


بس انت اعرس وتوكل علي الله وابشر بالعانيه


وانا من مؤيدين الزواج الثاني



تحيــــــــــــــــــــــــــاتي

[ابو فهد العجمي]

بعيد الهقاوي
تسلم لي على المرور
لكن انا اخترت الخطابات لاني ابي اشوف البنت قبل الزواج
ومثلك عارف ان الربع ما يقصرون لكن
شلون اشوف البنت
اكيد بيذكرون بيت فلان وفلان
بس متى رراح اشوف البنت الا بعد الزواج؟؟؟
وشالفايدة؟
مابي اغلط مرتين

اهم شي الشوفة

وبعدين البنت اللي عند الخطابة اعجبني وادخلت قلبي
بس مدري يمكن انها عن طريق خطابة مو مرتااح للسالفة

واذاعلى زوجتي الاولى
ما تعرفها؟؟
عوووبة
واذا قالت تبي تسوي الشي سوته
وانا حاشمها علشانها بنت عمي وعلشان عيالي
ولا انا مالي خاااطر فيها من زمان

[عبدان]

ابوفهد لاتترد اولا الشرع في صفك بشرط ان تعدل

اما عن الخطابه منت في حاجه لها ,انا اعرف كثير من الشباب قبل ان يخطب, يتجه الى ادارة

الجنسية والجوازات عن طريق احد المعارف, ويقوم باستخراج ملف المقصودة وهناك يتمكن

من رؤية صورتها .

لكن الزين ماهو اهم شي .الله من بنات مزايين جننوا ازواجهم

هذا ماعندي والله يوفقك واظن اخوي بعيد الهقاوي وفى وكفى

[اطياف الماضي]

يا اخي الكريم هذا هو الخطأ بكبره

دامك من الاول ماعجبتك زوجتك ليش انجبرت بالعيش معها وش ذنبها الحين وش ذنب عيالك الخمسة ؟

بصراحة خطأ يقع فيه الكثيرين وفي الاخير عذرهم ما اقدر اطلق حشمة لفلان ومدري وش

الحين المشكلة اكبر والله يعينك على اللي بيجيك !!

وبغض النظر عن عدم اقتناعي بشغلة الخطابات

المفروض انك تتحرأ عن هالمرأة اكثر يا اخوي دام داخلك شك بهالشكل

وحاول تتقرب لوحدة من خواتك وتشرح لها الوضع وتوضح لها انك مو مرتاح مع زوجتك وان شاء الله اخواتك يتفهمن ويساعدنك

والله يوفق ان شاء الله

[نجمه]

السلام عليكم ورحمة الله وبركاته

اخوي ابو فهد
اولا اشكر ثقتك فينا

ثانيا الله يخليييييييييييييييك فكر مليووون مره بالزواج على زوجتك لا تاخذ الامر بسهوله ترا والله القطيعه ماهي زينه بين الاهل وبيترتب عليها مشاكل بالمستقبل
فكر لقدام بكرا بيجيلك عيال من الطرفين وبتكثر مصاريفك غير المشاكل الي بتصير بين الحريم ولا بعد المشاكل الي بتصير بين عيالك
حاول انك تفهم زوجتك تغير من ستايلها وتغير من نفسها وهددها بالزواج اذا ما تغيرت يعني حاول بشتى الطرق قبل لا تتزوج........
والحل الاخير صل صلاة الاستخاره ووربنا يجيب الي به الخير.......

اختك نجمه

[صديق الملك]

أخي أبو فهد العجمي

تحية عطرة ...

ودّي أتناقش معك بكل وضوح وشفافيّة .. وأتمنى ما تتضايق من نقاشي معك .. لأني بذلك أبي اللي عند الله مو اللي عند خلقه ...

أولاً .. أتوقع عمرك الآن لن يقل بأي حال من الأحوال عن 45 سنه ... يعني أنت بدأت في العد التنازلي للقدرات الشخصيّة ...

ثانياً .. أطفالك الآن بعضهم في سن المراهقة بمعنى محتاجين لرقابة ودعم غير عادي من قبل الوالدين .. وأنت بزواجك سيقل تواجدك معهم بشكل ملحوظ ومؤثر ...

ثالثاً .. أنت غير راضي عن الزوجة الأولى ... وغير متطمن من الزوجة المفترضة الثانية ...
حيرتني معك !!

رابعاً .. نصيحتي لك .. أرضى بنصيبك .. لا يجيك شي ينكد عليك حياتك صح ..!!!

خامساً .. كل شخص يطلع له بيت حكومي ويبني شقة ويأجرها عليه التفكير في الزواج من ثانية ..!!

أتمنى تقبل رأيي بكل روح رياضيّة ... وما أردت إلاّ الإصلاح ...

أخيك .

[بنت حمران النواظر]

السلام عليكم

قريت الموضوع وحبيت أقول رايي

اذا تبي تزوج تزوج وماعليك من أحد وبنت عمك بالنهاية ماراح تشرشح ولد عمها بالمحاكم كلها جم يوم زعل بعدين ترضى بروحها

بس الغلطة منك من الأول أذا ماتبيها لا تربط نفسك فيها
ومحد غاصبك على شي ماتبيه


أما سالفة الخطابة فلي تحفظ عليها
يعني اذا بتخطب وحدة
أطلب صورتها أظن هالشي عادي والأهالي ما عندهم مانع


أقول مثل ما قالت اختي نجمة استخير والله يكتب اللي فيه الخير...

[فالكم طيب]

يا السمى .......

ابلع العافية ترى العافية زينة وذلك من عدة نواحى...


(1) اذا كنت منت مرتاح مع بنت عمك وبتزوج ثانية ابشر والله بالمشاكل ووجع الراس والضغط والسكرى ....

(2) وشلون بتقدر تعيش ذالعلة الثانية وانت ظروفك المادية مدوجة ..والا تييها تصرف عليك وعلى عيالك بعد؟؟؟

(3) بالله عليك فية رجل فية خير يروح يدور له مرة عن طريق خطابة وين اهلك وين جماعتك ان كان فيك خير بيزوجونك جماعتك وربعك ....

(4) وهالعلة ذا اللى تقول عنها مزيونه وين الاوادم عنها ماحد فكر يتزوجها من اللى حولها وانت خبرك الزينة ماتوقع ولا احد يطوفها من اللى حولها ....


باختصار الزواج عن طريق الخاطبة مخطور ... مخطور ياولدى ...وحط رجلك والله الله فى عيالك سنعهم وربهم وحافظ عليهم ...

واذكر لك هذة القصة للمعلومة والفايدة:-
يقال ان هناك رجل دميم متزوج امراة جميلة....
فقالت له يوم من الايام انا وياك من اهل الجنة...
فقال لها كيف ذلك...
فقالت له لقد صبرت عليك رغم قبحك فكنت من الصابرين وشكرت الله ان وهب لك مثلى فكنت من الشاكرين فالصابر والشاكر فى الجنة .


تحياتى

[ابو فهد العجمي]

عبدان

وشرايك في زوجتي لا زين ولا اخلاق سنعة؟؟؟
وانا ما طلبن مزيونة طلبت وحدة جمالها فوق المتوسط على الاقل احس بانجذاب لها كأنثى


أطياف الماضي

وحاول تتقرب لوحدة من خواتك وتشرح لها الوضع وتوضح لها انك مو مرتاح مع زوجتك وان شاء الله اخواتك يتفهمن ويساعدنك

خواتي رافضين المساعدة
ما يؤيدون الزواج الثاني
هذا غير خوفهن من زوجتي
وكل كلمة والثانية خلك على زوجتك وعيالك واحمد ربك
طيب وأنا وين راحتي ؟؟؟؟



نجمة

فكر لقدام بكرا بيجيلك عيال من الطرفين وبتكثر مصاريفك غير المشاكل الي بتصير بين الحريم ولا بعد المشاكل الي بتصير بين عيالك

ما انكر ان هذي ايضا من الاسباب اللي خلتني متردد في زواجي الثاني
لكن كثير من المتزوجون زوجة واحدة لا يعرفون البيت الا وقت النوم ولا احد يلومهم؟؟؟ واذا تزوج الثانية يقولون راح تقصر مع عيالك ؟؟
لكن ان شاء الله اني راح احقق العدل للجميع ( العيال والزوجتين )

حاول انك تفهم زوجتك تغير من ستايلها وتغير من نفسها وهددها بالزواج اذا ما تغيرت يعني حاول بشتى الطرق قبل لا تتزوج........

يا اختي زوجتي حظها قليل جدا من الجمال ومهما فعلت لن يغير شي فيها


صديق الملك

أنت غير راضي عن الزوجة الأولى ... وغير متطمن من الزوجة المفترضة الثانية ...
حيرتني معك !!

وانا لولا الحيرة لما كتبت الموضوع انا فعلا محتاج للمشورة

.. نصيحتي لك .. أرضى بنصيبك .. لا يجيك شي ينكد عليك حياتك صح ..!!!

دايما هذه الجملة ارددها بيني وبين نفسي ودايما خواتي كل ما اطلب يخدطبون لي الثانية يرددونها؟؟؟
واذا النصيب مو عاجبني وصبرت عليه سنوات وسنوات؟؟
هل كل من تزوج فعلا عجبه نصيبه ومرتاح
ولتعلم ان الدنيا متاع وخير متاعها المرأة الصالحة

صدقني الزوجة هي بيدها سعادة زوجها
وانا لم اجد السعادة مع الاولى فأرجو الله ان يكتبها لي من الثانية وتعوضني

كل شخص يطلع له بيت حكومي ويبني شقة ويأجرها عليه التفكير في الزواج من ثانية ..!!

التعدد لأجل التعدد دون سبب انا لا أؤيده
لكن اذا فيه راحة للشخص وسيجد ما افتقده في الزوجة الاولى فنعم والف نعم

بنت حمران النواظر

اذا تبي تزوج تزوج وماعليك من أحد

يسعدني ان اسمع هذا الكلام من امرأة

بس الغلطة منك من الأول أذا ماتبيها لا تربط نفسك فيها
ومحد غاصبك على شي ماتبيه

اللي غصبني الظروف المادية خصوصا توفير السكن
اضافة الى محاولتي اقناع نفسي اني ساحب زوجتي مع العشرة
وخوفا من قطيعة الرحم مع اهل زوجتي


شااااااااكر لكم تفاعلكم معي

وبالنسبة للاستخارة الحمدلله استخرت
واتمنى من الله يعوضني ويكتب لي اللي فيه الخير