## شـهـد تحت المجهر ##

[شهد]

ناصر بن حثلين


هلا والله ومسهلا اخوي الكريم

واسفه ماانتبهت والله

واتمنى ان يكون فعلا خوش اسبوع

بانتظارك

[شهد]

المها

الاخت الغاليه والعزيزة على قلبي حيل

يسعد مساج بكل خير

والله يسلمج ويسمح دربج

افرح كثير اذا قريت كلامج ودعواتج الحلوة

تسلمين حبيبتي ودمتي بكل خير

[شهد]

الغاليه ... الخالديه

ابعدي هلا والله ومسهلا قسم بالله الكلام اللي قلتيه لبسني ثوب واسع مايناسبني انتي كبيرة باسلوبج وذوقج وانا صغيرة ولا اقدر اجاريج الله يسلمج ويسعد قلبج


عزيزتي ... لقد كتبتي هذه الأبيات في توقيعك :
عسى الله ما يصغر قيمتي في نظرة العقّال .. ويرحم كل شخص يعامل الناس بصفى نية

* هل يهمك المنظار الذي يراك الناس به ؟! .. ولماذا؟!

اول شي للامانه الامير هو من اختار هلتوقيع بكل مافيه يعني مالي يد بالاختيارولكن ردا على سؤالج اكيد تهمني نظرة الناس انا بالنهايه عايشه وسطهم ومعهم صحيح نظرتهم لي ماهيب شغلي الشاغل ولكنها تهمني ...


* وهل انعدمت صفاء النية في هذا الزمان؟! وما هو السبب في نظرك غاليتي ؟!

للاسف انعدمت بشكل كبير ... لاننا اصبحنا اكثر ماديه والمصلحه اصبحت هي اساس تعاملنا


* لمن تستمعين عادة ؟! ... صوت العقل (المنطق) أم صوت القلب (العاطفة) ؟!

انا اسمع لصوت عقلي اذا ماكان دائما يكون غالبا ... لاعتقادي ( الذي من الممكن ان يكون خاطئا) بان صوت العقل هو الاصح والذي من المفترض ان اتبعه


* عزيزتي .. ما هي أروع اللحظات في حياتك ؟! ... ومتى تشعرين بأنك بحاجة أن تكوني وحدك؟!
اروع لحظات حياتي تكون بلمة اهلي كلهم ... افرح كثير ساعتهاايضا بوجودي مع الملحا ناقتي اكون مبسوطه معها اسولف عليها وهي تناظر فيني بنص عين احب اكون لوحدي اذا كنت زعلانه او متضايقه شويلا ماتاخذ وقت كبير انا بطبعي اكره الضيق


* لو أكتب لك هذه الجملة >>> " أفعلي شيئاً مختلفاً " ... ماهو أول شئ يخطر في بالك؟!

اول شي يخطر فبالي اني ارسل لج رساله ...واقولج شنو تقصدينلاني مااحب استنتج ويطلع استنتاجي ماهوب محله


* تشاركين في العديد من المنتديات (عيني عليج باردة ) ... ولكن .... في أي منتدى تجدين قلمك يبدع أكثر من غيره ؟!

ممكن اكتب بشكل جميل ولكن لم اصل لمرحلة الابداعاما بالنسبه لاي منتدى ... ممكن بالترفيه كوني اكتب بلهجتي وعلى طبيعتي


أكتفي بهذا القدر من الأسئلة ... عساني ما ثقلت عليج !!

بالعكس انتي شرفتيني واسعدتيني بتواجدج يابعد حيي

[شهد]

الله يعطيك العافيه ويسعد قلبك اخوي شبيب العجمي>>>>تطالع الاسئله ومنصدمه

1- من هي شهد في سطرين ولا أقصد الأمور الشخصية؟

جاوبت على نفس السؤال تقريبا بردي على الاخ الامير

2- ماذا تفعلين في اوقات الفراغ ؟

في الغالب العب بلاي ستيشن واحيانا ادخل النت


3- تحدثي عن خمسة أعضاء تتابعين كتاباتهم بعناية؟ ولماذا ؟

خمسه قليل اللي فبالي كثير والله... لكن بختار منهم اللي يطري على بالي الحين ...صديق الملك ... استمتع كثيرا بقراءتي لمواضيعه هو فعلا ملك باسلوبه واخلاقهانتحار ... منفرد بطرحه باختصار هو يغرد خارج السربالمها ... لانها تختار مواضيعها بعنايه ودائما تكون مهمهالخالديه ... لاني احبها في الله ومااقدر اشوف لها موضوع ولا اقراهسابرج ... رائع وهادف بطرحه


- لمن تقدمين عشره أطواق من الياسمين من الاعضاء الذين يحتلون منزلة كبيره لديك؟

الاول لكالثاني لبنت النواظرالثالث لبرنسيسهالرابع لحروفالخامس لبنت العجمانالسادس لسعد القويالسابع للمهاالثامن لصمتاالتاسع للباشاالعاشر ارميه بمنتدى الترفيه واللي ياخذوه حلال عليه


5- ماهي الأقسام التي تتواجدين بها دائماً وماهي نوعيه الكتابه التي تستهويك؟

اكثر الاقسام ...قسم السوالف العامه قسم الاسرة قسم الشعر وقسم الترفيهمافي نوع معين من الكتابه الموضوع الحلو يجبرك على قراءته سواء ديني اجتماعي او ترفيهي


6- عرفي منتدى قبيلة العجمان تعريفا موجزا ؟

صرح عظيم استمد عظمته من ادراة واعضاء اقل مايقال عنهم انهم رائعين


7- موقف طريف مريتي به ولا تنسينه ؟

هو بصراحه لو مر بغيري مستحيل يقول عنه طريف لكني هسرت بيومها من الضحك ولازلت اضحك كل ماذكرتهاذكر مرة دخلت على لجنة الامتحانات و كنت مستعده من دراسهومن براشيم ومضبطه مع البنات الشاطرات وحده على يميني والثانيه على يساري ودخلت ابله مديحه وتصييييييييييييييح يابنات بصو اللي حلائي معاها براشيم او بتحاول تغش ححرمها من الدرجهوطبعا هي تتكلم وعينها علي حيثي راعية سوابق ومعروفه عند الكل ولكن في الواقع لانضراتها ولا كلامها اثر فيني ... لاني خبرة مع الغش الموووووووهم وزعوا الامتحان على اساس ان الامتحان لمادة الاجتماعيات ولكن الصدمه ان الامتحان كان للرياضيات

8- اول ما تدخلين النت (( وين تروحين )) وأي قسم ؟؟

حسب اذا كنت مشاركه بموضوع اروج لموضوعي اشوف ردوا عليه والا مثل العاده تطنيييييييييييش
اذا ماكنت مشاركه ادخل قسم السوالف على طوال


9- الفائده التي اكتسبتيها من النت بصفه عامه والفائده اللي اكتسبتيها من المنتدى بصفه خاصه ؟؟

الفائده اللي استفدت منها بالنت نفسها اللي استفدت منها بالمنتدياتوهي مو فائده بالمعنى الكبير للفائده ولكن اشياء جيده تعلمتها وتعرفت عليها مثل معلومات عامه او حتى معلومات تخصني انا كبنت في شغله استفدت منها تحديدا بمنتدى العجمان انا ضعيفه جدا بالفصحى وكانت اكبر درجه احصل عليها بالتعبير 4 من 10ولكن بعد ماقريت مواضيع الاعضاء هني صرت مضطرة اني اكتب فيها والحمدالله احس اني تطورت عن اول


10- لو كنتي وزيرة التربية ماهو القرار الذي تطبقينه فور أستلامك المهمه ؟

الله الله ... جبتها عالجرحاول شي اغير المناهج عيالنا صابتهم البلاده بسببهالازم ناسس اطفالنا بشكل سليم اهم شي تعليهم الانجليزي ... اكثف حصص الانجليزي الغي مواد مالها داعي مثل الفيزيا والكيميا انا خريجة علمي قسم بالله مااستفدت منهن شي ولا اذكر منهن شي مع اني توني متخرجه... ليش ندرس شي مانستفيد منه بالمستقبل المفروض ندرس بالرياضيات بس القواعد الاساسيه مثل الجمع والضرب والطرح والقسمه واشياء مهمه .. مانتعمق بخرابيط الثانويه العامهانا بنشد أي متوفق بالرياضيات وش استفاد من نظريات اولى ثنوي وش استفاد من المثلثات وفيثاغورث... ولاشيطبعا هذا اول قرار في قرارات ثانيه ...


11- متى اخر مره ختمتي القرآن الكريم ؟؟

قبل اسافر يعني تقريبا قبل خمس ست اسابيع


12- ماهي البلدان التي تحبين السفر لها ؟؟

ماني من عشاق السفر ... يعني اذا بسافر اسافر للمملكه وبس وتكون المدة مو اكثر من ثلاث اسابيع


13- متى تغضب شهد ؟؟

اذا انظلمت

14- متى تذرف دمعة شهد ؟؟

قليل جدا ويمكن نادرا ذرفت دموعي
اتضايق واتاثر اي لكن ماتنزل دمعتي ... ولله في خلقه شئون


15- افضل شاعر ؟؟

ضيدان بن قضعان ... يمكن مايكون الافضل بالساحه لكنالأفضل والاقرب بالنسبه لي


16- شي تحسفتي انك سويتيه؟

صراحه متحسفه اني سويته لكني لازلت امشي عليه ولانيب قادرةاخليه

(( اعتمادي على البراشيم ))



17- شي مستانسه انك سويتيه ؟؟

تسجيلي بهالمنتدى

18- شي حدث في حياتك تتمنين نسيانه ؟

ماحدث لي شي مزعج لدرجة اني اتمنى انساهيمكن اشياء شفتها حدثت مع غيري ... معاي لله الحمد ماصارت


19- اكملي العبارة .. كنت محرجا جدا عندما ...... ؟

علمت بانه تم اختياري لاكون تحت المجهر


20- اذا عرفتي ان الناس ينشرون اشاعات عنك شنو موقفك مع هالناس ؟

ولا شي ...
حتيش لو قالوا ترى القلب مسرور .. مااوحيتهم لو كلهم عذربوا بي


21- نصيحه قدمتيها (( وندمتي انك قدمتيها )) وما هي ؟؟

هي نصيحه وان جيت للحق مصيبه ورطت فيها بنت خالتيانا قد سمعت ان الخروع يعجل عمليه الولاده طبعا بعد مشيئة الله سبحانهفنصحت البنت وهي مسكينه تقولي شلون اشرب خروع وانا اقولها ماعليج جربي >>>>شريرة
استسلمت وشربت وماله داعي اقول شصار فيها !!!



22- نظرتك للحيـــــــــــــــاة؟؟؟

نظرتي للحياة نظرة تفاؤل واذا تضايقت اليوم قلت بكرة ازين وبتنفرج...الحياة حلوة لكن تبي من يحبها ويفهم عليها


23- ماهو شعورك وانتي ترين طفل لبناني مسلوب الامان يبكي امامك ويطلب منك العون فماذا تفعلين حيال هذا الموقف ؟؟

اخي الكريم كلنا مفتقدين للامان ...
الامان ماهوب شي ملموس بيت واهل الامان احساس ...
ماابالغ اذا قلت اننا افتقدناه من ايام الغزو الى اليوم
اطفال لبنان والعراق وفلسطين يعرفون من هو عدوهم ويتجنبونه
حنا اللي مانعرف من عدونا ونتيجه لذلك عمرنا مراح نشعر بالامانيعني باختصار فاقد الشئ لايعطيها
لطفل اللبناني اذا طلب الامان لايطليه مني يطلبه من شخص يملكه وبالتالي يقدر يوفرة له
فهمتني!!


24- ماهي أهم 3 اهداف تسعين لتحقيقها في حياتك ؟؟

-رضا الله سبحانه والوالدين
-احصل على وظيفه مناسبه
-رصيد جيد من الناس اللي تترحم علي بعد مااموت



25- ماهي أصعب الكلمات التي وجهت لك في يومٍ ما ؟؟

بصراحه كلمه وجهت لي وهني بالمنتدى انصدمت من بعدها وقررت ترك المنتدى ولكن لاني طيبه تناسيتها مانسيتها ...


26- إذا دخلتي مكتبة فما هو القسم الذي تتوجهين له ؟؟

ماادخل المنتدى الا اذا بغيت بحث ...يعني اكون عارفه وين ابي اروح وشنو ابي اقرا وعموما سؤالك هو شنو نوعية الكتب اللي تفضلين قراءتها ولكن بطريقه غير مباشرة ؟؟عشان اكون صريحه معاك انا مااميل كثير للقراءة وماقد توجهت للمكتبه عشان اقرا


27- إذا كان ممكن إنك تحذفين حادثة حدثت في تاريخ العالم..راح بكل تأكيد يكون ؟؟

الوجود الصهيوني في القدس الشريف




28- برأيك متى يكون الانسان جسداً بلا روح ..؟

عند فقدانه لعزيز



29- لمن تقولين .."عطائك قل"؟

اقولها الى الام ...اشعر ان ام اليوم اقل عطاء واحيانا اكثر قسوة واقل عاطفه مما كانت عليه الام في السابقافكر كثيرا في ذلك ... وربما وجدت تبريرا قد يكون ضعيفا ولكن يبقى مجرد تبرير من انسانه صدمت من أجّل عاطفه على وجه الارض ...انا اقول بان مرجع ذلك قد يكون كون ام اليوم لم تكن بالامس سوى تربية خادمه هي لم تشعر بعاطفة امها نحوها لذا فهي لن تقدم لوليدها ماتفتقده هي بالاصل



30- لمن تقولين .. " لديك الكثير من الابداع ولكن لاتظهره"؟

اقولها الى الجوري ..هي فعلا مبدعه مثقفه وصاحبة اسلوب وقلم رائع رغم جميع ماقرأت لها من روائع ... الا انني ارى بانها لم تظهر كل مافي جعبتها .. هي لازالت تملك الكثير


31- لمن تقولين.. " أين أنت أو أين أنتي"؟

اين انت ... اقولها لصديق الملك لاني من زمان ماشفته



32- لمن تقولين .. "لديك الكثير من النشاط ولكنه ليس في المجال المناسب"؟

اقوله لنفسي ومااقصد هني بالمنتدى ولكن في حياتي عموما


33- لمن تقولين .. "الجندي المجهول"؟

فيصل بن حجرف ... وبالمناسبه انا احب اهنيه من كل قلبي على هالمنتدى الاكثر من رائع


34- لمن تقولين .. "الغائب الحاضر" ؟

نفر كويس وحمد العجمي


35- مارأيك بهذه المقولات :

(((إعمل للدنيا بقدر بقائك فيها واعمل للآخرة بقدر بقائك فيها)))

دائما اردد قول امير المؤمنين علي بن ابي طالب كرم الله وجههاعمل ليومك كانك تعيش ابدا واعمل لاخرتك كانك تموت غداعين الحكمه ان تعمل لدنياك واخرتك وان لاتنشغل باحداهما عن الاخرى


(((المسلم من سلم المسلمون من لسانه ويده )))

كثيرا مانقولها قليلا مانعمل بها ... للاسف هذا الواقع


((( وليس نيل المطالب بالتمني............ولكن تأخذ الدنيا غلابا)))

فعلا نيل المطالب لاياتي بالتمني ولكن ومع ايماننا بذلك لازلنا نتمنى

نتمنى وفي التمني شقاء .. وننادي ياليت كانوا وكنا
ونصلي في سرنا للاماني.. والاماني في الجهر يضحكن منا
غير اني وان كرهت التمني .. اتمنى لو كنت لا اتمنى


36- هوايتك المفضلة ؟؟

الشعر ... احب اقراه واسمعه وفرحت كثير بافتتاح قناة الساحه اللي تهتم بالشعر وفرحت اكثر بنقلهم لمهرجان المغترة


37- شعور داخلي لدى شهد يجعلك تقفين حائره ومفكره ؟

بصراحه اشعر اني مخلوقه بزمن غير الزمن اللي من المفترض اني اعيش فيه ... يمكن يكون كلامي غلط او لاسمح الله حرام لكن فعلا هذا اللي انا احس فيهكنت اتمنى لو اني عايشه على بزمن ثاني... لكن نقول الخيرة فيما اختارها الله


38- مامدى قدرة شهد على تحمل الصعاب ؟

كبيرة ... يمكن هالشي راجع لكوني بنت وحيده بين عشر شباب

حتى لعبنا كان عنيف فتعلمت اني اكون شديدة وقويه من صغري


39- كم صديقه مقربه لديك؟

عندي صديقات لكن مقربه مافي ... مالي غير امي


40- وما مفهوم الصداقة لدى شهد ؟

بصراحه انا اجهل الصداقه بمعناها الحقيقي , يعني ماتعودت تكون لي صديقات حتى في المدرسه كانت علاقتي مع زميلاتي مقتصرة داخل حدود المدرسه بمجرد انتهاء الدوام والخروج من اسوارها تنتهي علاقتي بهن
ولاتسالني ليش؟؟


41- كيف ترسمين خطط الغد والسير عليها ؟ ومامدى تطبيقك لهذه الخطط ؟

ماقد خططت لشي بسويه بكرة لمعرفتي المسبقه بعدم تطبيقها

42- الوداع ؟؟ للاسف دائما يكون النهايه الحتميه لكل علاقه جميله

43- الهدوء ؟؟ كلمه مالها أي وجود بقاموسي لاني شخصيه مزعجه وثرثارة

44- السعادة ؟؟ لاتكون الا برضا الله والوالدين

45- الغرور ؟؟ دا ء لايصاب به الا ضعاف النفوس ومن يشعر بنقص في ذاته

46- الهم ؟؟ للاسف البعض يختلقه من عدم والبعض يياس من قدرته على هزمه رغم سهولة التغلب عليه

47- الوحده ؟؟ لكل منا نصيب منها



48- لو تملكين مليون دينار ماذا تفعلين .. هل تستثمرين بها أم تبقينها بالبنك؟؟

بالبنك لا مستحيل .. انا شمريه والشمري ماجمّع الالف والميه
بصراحه لو املكهن ماتردد لثانيه بالتبرع فيهن للسيد حسن نصر الله انسان اعاد لنا جزء بسيط من كرامتنا كعرب ومسلمين يستاهل اعناقنا مو بس فلوسنا


49- هل تأيدين دخول المرأه مجلس الأمة ..نعم أو لا اذكري الأسباب ؟؟

بصراحه كنت ضد مو بس ضد كنت ارفضها رفض قاطع لكن بعد التفكير بموضوعيه لقيت اني غلطانه
يعني سنين ومجلس الامه بس رجال وش صلحوا هالرجال ... ولاشي

واذا نوى يسوي شي يسويه لاهله وجماعته

سنين والبدون محلك سر
سنين وابناء الكويتيات يعانون ... واعضاء مجلس الامه وين ؟!
والله يمكن الحريم يجيبن اللي ماجابه الرجاجيل ماتدري سبحانه يضع سره في اضعف خلقه


50- ماهي النصيحة التي توجهينها للقراء الكرام ؟؟

ماني بعمر او بمكانه تخولني انصح احد ...لكن من جد الحياه حلوة لاتضيعونها بالزعل
كل الشكر اخوي الفاضل والرائع شبيب العجمي
لكن عندي سؤال .. من مسلطك علي هديت حيلي مع اسئلتك لاتعاودها مع غيري ههههههههههااي

[البادع]

السلام عليكم ورحمة الله وبركاته

الأخت الفاضل

"" شهد ""

كل الشكر لك على أنهاء المرحلة الأولى من الاختبار

ولكن أختلف معك في بعض الأجابات

وتبقى المرحلة الثانية قيد الانتظار

تحياتي لشخصك الكريم

[سعد القوي]

شهد..كيف الحال؟
مرتاحه ان شاء الله ولا نجيب مركا زياده ..لا تستحين اطلبي .
افتحو لها علبة بيبسي ريقها نشف من اسئلة شبيب الله يعطيه العافيه
ودي انا بعد امغطها بمية سؤال..

- من متى بدا استخدامك للانترنت؟
-مواقع تحبين تدخلينها غير موقع العجمان؟
- نفرض انك كتبتي موضوع ولا رد وحاطه كل جهدك فيه ..ويجي المشرف ويحذفه ؟ ماهي ردة فعل الانسه شهد ؟
-مين اللي يغلب في البلاي ستيشن ؟
-تحبين الملحا؟؟مشاء الله راعية ابل..!!اجل تاركه البنات ومخاويه الملحا؟؟طيب وش السبب وش اللي لقيتي فيها ..افضل من البنات؟

وهذا اقتباس من ردك

ماني من عشاق السفر ... يعني اذا بسافر اسافر للمملكه وبس وتكون المدة مو اكثر من ثلاث اسابيع

الله يحييك وتنور المملكه بزيارتك انتِ واهلك الكرام..
-وش المدن اللي زرتيها في المملكه وحبيتيها؟ او ماارتحتي فيها؟
وفي الختام

*احب اهنيك على روح الفكاهه اللي عندك وتفائلك في الحياه ..وانا بصراحه سعيد اني تعرفت على شخصيه مثلك في المنتدى ..وانا اذا امزح معك ازيد العيار حبتين من باب الميانه فسامحينا ..

[صـــمتا]

حياكِ الله يا شهد


والله يعينك على الأسئلة ... واستمتعت بإجاباتك ...

اقصد يا طويلة العمر .. تعلمتي او استفدتي من المنتدى .. اعتقد استفدتي واستفدنااا منكِ

على العموم ... انا عند وعدي ... وانتظركِ في مطبخك الخـــاص .... في اي وقت يا شهوده

ويعطيك العافيه على جهودك المتواضعة

[بندر]

العضوه الغاليه والمحترمه ..

شهد ..

حيّاش الله في تحت المجهر ..

أستمتعت بأكتشاف نواحي شخصيّتش ..

وقراءة أجاباتش على أسئلة الاعضاء ..

ولو أن بعضها رفع ضغطي ..

ومن أهم النقاط اللي لفتت نظري أنّش:

1-راعية أبل ..

2-جهراويّه سابقه ==>وهاذا زاد من غلاش عندي ..)

3-غشّاشه ..

4-مزعجه وثرثاره ..

5-من مناصرين الأمين العام لتنظيم حزب الله الشيعي حسن نصرلله للأسف ..

,
,

وأتمنى أنّي ماثقلت عليش بمروري ..

وأشكر المشرفه المتألقه أطياف الماضي على أستضافتش ,,

[بنت حمران النواظر]

اجاباتج على اسئلة اخواني اللي قبلي

خلتني أعرف الكثير من جوانب شخصيتج الرائعة

تحياتي لج

ودعواتي الصادقة بأن الله يعينج...

[تايه الغربه]

السلام عليكم ورحمة الله وبركاته ..

حي الله شهد
الظاهر ان حضش اقشر
شكلش بتقولين جعل بقعاء تصوع بعض الاعضاء ايش قومهم عليش ههههههاي
الوكاد اني جاي اسلم عليش والأسئله لسى ما انتهينا من تحضيرها ..
بس اني جايب البلاي ستيشن معي وجايب شريط الدوري الثالث
انا بلعب بمنتخب نجوم العالم وأنتي العبي بمنتخب قطر
<< شكله مهوب موجود في القائمه

اختي الفاضله شهد .. اعجبني اسلوبش في الرد على الأسئله السابقه
واقول الله يعطيش الف عافيه
وإن شاء الله راح ارجع لش بالأسئله اذا سمحتي لي ..


تقبلي تقديري ..!!
سلالالالالالام ..!!