هذي وحده اسمها ام السباحين تقول زوجوني ولاشقيت ثوبي وطبيت من السطح
وهذي السالفه منقوله من لسانها
انا في هالفايت صارت لي امور مهيب على خبركم ,, ماش تسني اشوف الدعوه مخوبره , خاصة من يوم صارت تقوم (.......) قبل الراس وانا ناغزني قليبي , ياربيه عسى مهيب بس بداية شيخوخة مبتسره وانا ماعلمته ,, ياربيه ياخوفة اني اموت وانا توني ( عزباء ) وفي عز شبابي
ياربيه عسى مايجيني الموت وانا ما بعد صار على ذمتي رجال ابي اعرس لو مايجيني من العرس الا ان رجلي يغسلني الى مني مت بعد عمر طويل ان شاء الله وا ياجعلها على طاعة الله
ياربيه ماودي الى مني مت ما القى من يغسلني الا حرمة ,, انا مابي ولا حرمة من هالحريم تغسلني لو انها ان شاء الله وحدة من بناتي والله لا يحدني لهن يالله
هو: ياخزياه من تغسيلهن لي ياخزياه
ثم عاد تسني اشوف هاللي مغسلتني ماغير في كل مجلس وفي كل متسان وفي كل عاير وسكه مالها شغله الى حتسي في ام السباحين ماغيرتقول شفت (......) ام السباحين وشفت في ام السباحين ,,
والله يابياض مهوب طبيعي في ام السباحين ,, ووالله ياشعر على ام السباحين
ثم هها عاد من يفكني من عيون هالحريم المشفوحات ؟
ومن اللي يبي يسرني الى مني انظلت منهن؟
ولا ودي بعد استاثم في شباب هالامه خنت حيلي ,, اللي عز الله اللي تبي تجيهم الصخونه الى منهم سمعوا اوصاف ام السباحين ,
والاكيد انها تبي تطقهم الحسوفه هاللي فوتوا على انفسهم الاقتران بام السباحين
فعلشان تسذا اعلن لكم ومن على هالمنبر اني فاتحة باب التقدم لخطبتي فمن يجد في نفسه الكفء والقدرة على تحمل المسؤلية ويحب ان تكون له اسره صغيرة تكبر مع الأيام فليتقدم الي مشكورا او يوصف لي بيتهم وانا اخذ لي لوموزين واجي لمه على رسم الخدمه ثم ياحاسب راعي اللوموزين وش تبون بعد اكثر من تسذا ؟ ( يالعنبو الحب اللي يذل راعيته
اوصاف ام السباحين الجذابه هي
1- العمر عمري من عرفت نفسي ومن خمسين سنه وانا ام خمس وعشرين سنه مازدت ولانيب زايده
2- الشعر جديلتين حمراوين اللون ما اذكر اني دزد فليت او نقضت شعري لافي حياتي العاديه ولا في عمري الفني
3- يوجد لدي حدبه ولكنها وللأمانه لاتعيقني في حياتي العمليه فأنا ولله الحمد والمنه متأقلمة معها حيث انني انام على احد جنبي او على بطني اذا استلزم الامر ذلك
بل وهذه الحدبه تعتبر ميزة من ميزاتي الكثيره والتي لسنا بصدد ذكرها الآن فالحدبه لاتكون الا في النياق الطيبه
4- الحمدلله ان سنيناتي وش ملحهن وباقي فيهن يوم العلم خمسة سنون,, وللأمانه اثنين منهن يرقلن لاتقولون ماعلمتينا يا ام السباحين ترى كلش ولا الامانه
لكن تقول لي حصيصه مرت ولد خالتي سعيدان انها موحية طرف علم ان سوريا عندهم علاج للسنون وش زينه ويخلونهن احسن من منول وعلشان تسذا ماعندي مانع اني اتنازل عن روحتي لماليزيا في شهر عسلي واحولها الى سوريا وماليزيا مهيب طايره لاحدزين عليها السنه الجايه
5- انا تراني طامنه والله يطامني باسمه مالي حس ولا رس ومالي لسان ابد ,, واذا قمت اسولف مايوحوني الا اللي في الشفا بس,, والا اللي في السويدي والله ثم والله انهم مايوحوني
شوفوني حلفت لكم بالله ولانيب ان شاالله حالفة على تسذب[/center]
6-مشهور عني اني اقول للواحدابحط اذاني واذانك ثلاث فأنا مااوحي الا بأذن وحده اما الثانيه صقها
بس تراني اوحي اللي يعطس في الخرج وتراني اروح مهوب يجي الواحد مخرب ابوها وياكل بصل ويدزابل خشتي
7- ابد مهنا طلبات ولا ودي اكلف عليكم ابي ثويب (سفرة سعود ) ونعال تليك وديرمانه وحنا ومريتو مهوب علشان اتسوي الهدوم عاد مهوب كلشن اشرحه لكم
اما مواصفات المتقدم للزواج مني فهي عاديه ولا فيها اي معوقات وهي على النحو التالي
1- ان يكون رجل ويتحمل المسؤليه ومثالي بمعنى الكلمه ,, ويقدر المرأه و يتحمل الزوجه الى هاشت عليه ويرحمها وينسيها مرمطة الدنيا وغثاها
2- ان يكون الرجل دابة سليمه ومهوب راعي عزايم ولهوب نزر
4- ان يرتدي في رقبته دزليده علشان اقدر اقوده بها بسهوله ويسر للمتسان اللي ابيه يوديني لمه
5- ان يكون لديه خبره في تغسيل المواعين والطبخ والنفخ
وانتسانه مايعرف نروحه ياخذ دوره في مطبخ الرومانسي هاللي توه فاتح عندنا في الشفا او في الناضج علشان يطلع رجال تام
ولاترا مطاريس هالمطاعم الثانيه ترا ماتقبلها تسبيدتي ,, لحد يقول لي همبقرع ولا تشكن بودر
وتراني مانيب اكل الدجاج ,,لابلدي ولا مخنق ولانيب راعية اكل من هاللحم المكفن اللي ماندري وين يجيبونه منه ولاندري وشهم موكلينهن الله يرزقنا شكر النعمه بس
اما القواطي فانا منيب مخالفة على بعضهن بصره يجيب لي قشيطة فراوله ويازينها وهي توها مظهرة من الثلاجه
او يجيب لي من جبن الكرافت ماودي ,, عاد اتعب رجيلي بسم الله عليه وارهقه بالطبخ والتغسيل
ويبتل اربع وعشرين ساعه في المطيبخ ماغير مدزابل الفرن والمجلى فالله مازين ساعة وساعه
نبي نخلي شوي للرومانسيه
تكفون لاتدعون الفرصه تفوتكم تراني متنازلة عن اشياء واجد كله علشان ماتقولون إن ام السباحين حاطه حجر عثره دون الزواج
ماهوب خافيني رجال الشجاعه
_______ ودي بهم مير المناعيـــر صلفيــن
شفي شويوي بوسط الجماعــه
_______ يرعى غنمهم والبهـــم والبعارين
إن قلت له سو العشا قال طاعه
_______ وجاب البوادي والقدر والمواعين
ولو اضربه مشتدة في كراعــه
_______ ماهوب شاكيني ولا الناس دارين
تكفون متى تردون علي فأنا بصراحه مليت من اكل هالمطاعم واحس ان هالقواطي حفرت تسبيدتي
خاصة جبن هالكرفت اللي اجرع فيه بدون خبزه
وان تسان الدعوه مهنا عرس ومكتوب علي اني موت بلا رجل الله لايقوله فال الله ولا فالكم ,
فتكفون ثم تكفون افتحو لي باب الجهاد فوحدة من ثنتين لاثالث لهما
يا إني احرر فلسطين الله واكبر ياققي
ولا فخلوني اموت شهيده
فانا تسني موحية الشيخ ابن ابراهيم ذيك السنه الله يغفر له ويرحمه يقول : ان الملائكه هي اللي تغسل الشهداء
24-08-2006, 11:12 PM
العرض العادي
