يــامــل عيـــــنٍ في محاجيـــرهـا شـــوك ...

[الضاوي]

أحيي الجميـــع .. مع اول مشـاركة لي في منتدى الشعــر ..

واهديكم هذي القصيدة المشهورة لسليمان إبن شريم

يـامــل عيـنٍ في محاجيرهـا شـــوك && والصدر به عن لذة النـــوم .. دكــاك

لا دك في قلبي من الهــم داكــوك && جـاوبت طربات الحمايم على الــراك

عـــزّي لحـــالك ياعــزّيــز وانا ابوك && كـان الزمان اللي وطاني توطاك

تراك ماينفعــك خـــالك ... ولا اخــوك&& لاصــار ماتقضي لزومك بيمنـــاك

وربعك إلى بان الخلل فيـك عـافـوك && واقرب قريــبٍ لك من الناس يشناك

إن كثر مالك صدقوا لك وطــاعــــوك && وإن قـل مابيديــك .. شانت حلاياك

لو تطلب الما عندهم منــه مااسقــوك && أبعد مزارك عـن وطنهم ومــرباك

إن طاب حظك قربوا لـك وحبــــوك && وإن بـار بك محدٍ يبـــــي غير فرقـــاك

هــراجة المجلس إلـــى جيـت وزوك && منــازلٍ تطرب نظيرك بدنيـــاك

وإذا قضـــوا منك اللوازم وخلــــوك && تفرقــوا ... وأنت أحتمـل كـل ماجاك

كنك ســراج البيت .. للنـور شبوك && وإذا إنقضـى اللازم .. حدا الربـع طفـاك

وإذا جـفوك أهل الوطـن وإستخفوك && قــلّـــع غريسك منه .. واهدم ركاياك

تـراك لـو تـرجـع على الرجل صعلوك && أحســن من اللي تلتجي لــه .. وياطاك

وإحذر عن العيلة ..ترى الحق مدروك && مثـل القضـا يدركك .. مامنه فكــاك

وأحلم على الجاهل ترى الحلم مبروك && وقم للضعيف اللي من الظلــم ينخـاك

وقــم للضيوف اللي سعوا لك وضافوك && وأغلى كرامتهم حجاجــك وبشــراك

وإعـــرف ترى مالك من الضيـف مفكـوك && لــولاه يطلب حاجتـه منك .. ماجـاك


وسلامتــكم
سليمـــــان بن شريم ( رحمه الله )