السلام عليكم اهدااء و مصافحه لكم (عجمان لا منه غدا بالزمن ميل ) و استفيد منكم

[محمد العزام]

واجهت انا الهوجاس في تالي الليل=سلم و عقبه قالي كيف الاحوال
جيتك امجنبلي ديار المهابيل=فيها الردى و شين الفعل صار نزال
ثم قلتله ارحب و خل التفاصيل=و من جا لابن عزام ما جاه غربال
ذي دلة الشاعر و دونه فناجيل=اقلط و خذلك من هوى الفكر فنجال
هاذي منازيلن و هاذي منازيل=و الحر ماله منزلن بين الانذال
يا كم شاف من الزمان الغرابيل=و لا انكسر و لا شكى نكسة الحال
و عقبه نشدني يا رفيع المنازيل=ويش انت منه كان لك سلم و افعال
ثم قلتله خذلك من القول تفصيل=و الضاعني افطن لقوله ليا قال
راسه من الشعر الجزل ما هو محيل=وارثه من جدن له الطيب مدهال
ربعي هم اللي دونهم يوقف السيل=هم عزوتي حل الرخا و حل الاهوال
منهم قوي الحيل ما عانه الحيل=كم واحدن في حال و اصبح على حال
في صدره الغبنه تجر المواويل=و منهو دنا منا يبشر بموال
عجمان لا منه غدا بالزمن ميل=انعدل اللي عن هوى سكته مال
صبيان يام و عزنا و التواكيل=بالخالق الوالي وله كل الاجلال
ميقافنا شامخ من الجيل للجيل=و عز الاسد تلقاه بعيون الاشبال
حريبنا حل اللقا كنه يخيل=موته ليا منه نظر ذيك الازوال
تاريخنا شلع مع الجدي و سهيل=خلى لنا ما بين الاجواد منزال
نتعب على قرب الرجال المشاكيل=طيب الرجال اللي تعنز لها رجال
و نقلط العاني على طيب الحيل=يبشر بعزه دونه الجاه و المال
و نجنب اللي بالردى له محاصيل=فرقاه عيد و زين فرقاه لا طال
هاذي عوايدنا و على العايل نعيل=و كل القبايل كفو ما حولها جدال
و تراك يا الهوجاس ممساك ذا الليل=عندي و لك حقن و لك طيبة الفال

......و اسمحولنا عالقصور