كبده لها حول سبع سنين مندبله !!

[تـــاج المراجـــل]

يامل قلب هوى الغربي كشف مابه=داخل حناياه عبد في يده طبله

ماجابت الورق من زين اللحن جابه=واكبر عذابه ليا طق الحياة وبله

من ازرق الريش عاف الصيد مخلابه=كبده لها حول سبع سنين مندبله

على وليفٍ شربت السم بعذابه=وكنه على القلب در اللي رعت ربله

كن الولي بد عن خلقه توصى به=من عود ازرق وغيره من حصا عبله

ماقد رفعت اليدين الا على بابه=طفلٍ يحرم على روحي واوجب له

لو شافه اللي تهجد وسط محرابه=صلى ام الاربع ثلاث وضيع القبله

ولو شافه اللي بني عبسٍ تعزوى به=والله فلا عاد يسأل عن هوى عبله

عليه راعي المعم يشقق ثيابه=وشلون اجل من ىعمر عشرين يلعب له

مجدلٍ ياحياة الشر ياخضابه=ينقض قرونه على زندي واطبطب له

وعينٍ لا سلهم بها عن الف دبابه=تلعب بالارواح لعب الظبي والشبله

والجفن يالعنبوكم كيف ماهابه=من ذل سلم وحياة الروح تكتب له

والرمش لاغضى تشوف الموت باهدابه=مدري لو الموت ابن عمٍ يقارب له

رمشٍ على طغوة السلطان يدعى به=عليه قلب المعنى طايرٍ شبله

لو في شجاعة هدب رمشه معي لابه=الموت في ذمتي ذمه ماحسب له

وان احكم الارض من صيدا الى طابه=واطهر القدس من نذلٍ قضب حبله

والخشم سيفٍ يلوح الغي بنصابه=لا سله اللي طعامه مايجي هبله

وثغرٍ ولا طاوله ثغرٍ ولا شابه=ياقبلة الله يامحلاه من قبله

مدري من الخمر والا الخمر بلعابه= والا من الكوثر المعسول يسكب له

من ذاق معسوله الخمري ودلى به= من سكرته مانلومه لو يموت ابله

كن حدري الشفه اليا عض به نابه=شفة صغيرٍ بماي التوت منعبله

ولسان الى من حكى والجابه الجابه=يرتب الهرج مابه من يرتب له

صوته ولا صوت عودٍ عند لعابه=لا دقه اللي علوم الفن تنسب له

والخد ماغط نوره لون جلبابه=والله ماشفت انا بعده ولا قبله

وده بذبحة حضر نجدٍ مع اعرابه=واشوى بريقعه عيا لا يوجب له

والكف حاله وحال سهيل متشابه=مدري نسابه او ان سهيل ناسب له

بإيده ملك موت هلابه وحيابه= قوسٍ تمزع معاليق الحشا نبله

وخصره مسافه مابين اصبع وسبابه=احيان يخطون فيه ويلبس الدبله

وردفٍ ليا اقبل تقل مقفي وإلى اقفى به=تقول مقبل عسى الله لايسبب له

لا سار واهتزت الشطوه حدر كابه=تشبه شجاعٍ سمع غاليه يندب له

والساق كنه لسان الداب لاومى به=او كف طفله ترد الفرد وتحبله

واقدام لو فوق قبر الميت توطى به=شفته يصوت قبل يضحى الضحى لابله

بعض الاوادم هبال الحسن ماعابه=واليا انهبلت اكثر العربان منهبله

زينٍ بزينه نموت ونوب نحيا به=مابيده الا الشقا ونحب نتعب له

غلطان عمه يخالد يوم وصى به=سوات هذا جميع الناس تقرب له

يازين انا وانت سلك عقال وعصابه=تومٍ عسى من عقب للتوم يعقب له

يازين كانك وحش ريمٍ فأنا غابه=غدت ضلوعي على شانك زهر ربله

بيني وبينك مابين الكم واجيابه=وعليه ابعد مدى ممن ورى القبله

يازين قلبي عليكم يدرج الدابه=بين الحصاتين حذف الناس عرقب له

مانيب من قال يابه آه يايابه=وهمه بقلبه كبر راس القلم ذبله

يازين مودعك قلبي وانته ادرى به=ياطلبته ليه بين الناس تطلب له

اما اسعف القلب يازين وتهنى به=والا فأنا الخبل يوم اطرد ورى خبله

؛
.
للشاعر ؛. ناصر الفراعنه

.
؛
تحياتي