غزل (في بحتك شي)

[برق الشمال]

للشاعر محمد جارالله السهلي



[

يا وجد حالي وجود اللي هقاويه
.......................................خانته باغلى رفيق ولا لقى والي
ويا وجد حالي وجود اللي بناخيه
......................................عن عسر حاله وضيقه داله وسالي
في غيبة اللي تمادى بالانانيه
......................................وخلاني فوجه حزني واقف لحالي
يا موسع الضيق لا من مر طاريه
....................................كن الوسيعه تضيق ان مر في بالي
وين انت ياللي بعادك مثر فيه
..................................غايب واحسك معي واشوفك قبالي
طيفك ليا مر حاجه لا اراديه
.................................. اتبع سرابه واجيه اسابق ضــلالــي
ياللي من حروفك تغار الرومانسيه
.................................والله قبل لا فقدك فــاقدك جــوالي
في بحتك شي يشبه حزن مرثيه
.............................من غاب صوتك وانا اللي صدق يرثا لي
وعيونك السود اعجاز وخياليه
...............................نادر شبهها مثل مــا تـــندر خصالي
ونظرتك تهدم كياني بكل عفويه
.............................سلهم وشف كيف يبدي في زلــزالي
و عودك ليا مال يالمترف بحنيه
................................قمت اتعزوى واطوح لجله عـــقالي
وقلبي على ضمتك يسابق يديه
..............................ويردني طيب ابوي ومرجلة خـــالي
تكفون ياللي تمرونه علانيه
..............................قولوا له الموت لامن غــاب يبــرالي
وقولوله ان غيبته ماهيب عاديه
............................وخلوه يرجع يشوف بعيــنه احــوالي
وقولو له انه ذبحني لعنبو حيه
.............................مايرحم الشوق غالي ينــتظر غــالي
وقولو له ان صد والصده نهائيه
............................اشوالي اصد ..لاوالله وش اشوالي؟
حيل الله اقوى عساها روحه بجيه
............................وعساه ما يبطي ويرجع ويسعا لي
وقولو له الله حسيبه كان له نيه
...........................ماعاد يرجع لي وقــولوا له التــالي
حرام كلي ظما وايديه وسميه
..........................وحـــرام مالي امـــل مـدامه امــالي