~~~~~>( مُجَمَّعُ آلْرَّآشِدْ )>~~~~~

[( صبي قحطان )]

قال الوهَابـي والعلـل مخفيـة ××× لي غروةٍ تبكي لهـا الطرقيـة


لـي غـروةٍ مامثلهـا فالدنيـا ××× أنا أشهد إنها يا عرب حوريـة


من شفتها والقلب رايـح فيهـا ××× تزايـدت نبضـاتـه القلبـيـة


ماكنـي إلا واحــدٍ متشـائـم ××× تـحـدِّره وتسـنِّـده جنـيـة


من عقبها ماعاد صـرت أميـز ××× لا بـيـن دولارٍ ولا روبـيــة


ياشديد ابن جراب عجل وإفـزع ××× واقدم لنـا بالسيـف والجنبيـة


إلحق ترا حالـة رفيقـك حالـة ××× من قبل لا تطريه فـي مرثيـة


لاتحسـب إنـه مكثـر ويبالـغ ××× فيما جـرا فالحالـة الشخصيـة


هذا الصحيح وخـذ كـلامٍ بيـن ××× واسمع بعض ميزاتها الوصفيـة


بعطيك نبذة عن صفات الزينـة ××× بينـي وبينـك خلهـا سريـة


أم العيـون السـود ياعشاقـة ××× ماهي تحـط الكحـل بالكميـة


لا جات تنظر لك بعين معاتـب ××× ترتاح من نظراتهـا السحريـة


تسحرك وتخششك جـو كايـف ××× كنك شربـت القهـوة التركيـة


وخدودها حمرٍ على مـا تبغـي ××× تآخذ من ألوان الشفـق ماريـة


وأما الشفايف روجها بالـوردي ××× وأموت أنـا فالشفـة الورديـة


الخد ناعـم والشفايـف ذبلـة ××× ماباقـي إلا قبـلـةٍ روحـيـة


الصدر بارز والـردوف تلاعـب ××× لبى النهـود وماحـلا الخلفيـة


قابلتهـا ياصاحبـي فالـراشـد ××× اللي خـذا الشبـان فالشرقيـة


سوقٍ تجيه أهل الهوى سوامـة ××× هاذيك مبيوعـة وذي مشريـة


من يدخله في ذمتـي مايخـرج ××× إلا دروبــه كلـهـا ملـويـة


جيته وأنـا متحلـقٍ ومكشـخ ××× ثـوبٍ جديـد وغتـرةٍ مكويـة


وعقال مايل والكبـك والسبحـة ××× والخيـزران وساعـةٍ فضـيـة


واجهتها فاللفت تبغـى تظهـر ××× صوب المطاعم حقت الشاميـة


فاجأتها وأقـول كيفـك يابنـت ××× كيفك وكيف السوق فالصيفيـة


يامرحبا بك في ديـاري وأهـلاً ××× الظاهـر إن جنسيتـك سوريـة


قامت تناظر نظـرة المستغـرب ××× مبسوطـة لكنـهـا رسمـيـة


قالت عسـى ماشـر لاتستهبـل ××× بنت البلـد محشومـةٍ مغليـة


من المملكة والـدار هـذا داري ××× لانيـب سوريـة ولا مصريـة


قلت اسمحي لي والله إني أمزح ××× ماتدري إن موضوعـي بجديـة


ضحكت وقالت يالحبيِّب عـادي ××× ماضاق صدري وأنت طيب نيـة


اتصافقت الأقـدام مـن كلمتهـا ××× ماعاد قرتنـي علـى الأرضيـة


قلت اسلمي كم رقمك وجوالـك ××× وأعطينـي العنـوان والماريـة


وأعطيني اسمك كاملٍ والمهنـة ××× وهوايتـك والسيـرة الذاتـيـة


قالت سؤالك الأولـي تعذرنـي ××× خـل العلاقـة ياولـد سطحيـة


بعطيك اسمـي والهوايـة لكـن ××× حـذراك لايـدري بهـا راعيـة


اسمي ولا تنساه سجـل عنـدك ××× محسوبتك محبوبتـك وسميـة


أهوى الشباب اللي تحب السجة ××× وطلعة معاهم حـزة العصريـة


يازينهـا زينـاه كانـك منهـم ××× بتفلهـا وتصيـر لـك جاهيـة


أثر الخبيثة كـل يـوم تكـاذب ××× تستدرج اللي تايـهٍ فـي غيـه


تستنزفـه وتعلقـه برجـولـه ××× وتخرجه فالشمس عقب الفيـة


قالت عساك موظـف فالدولـة ××× وألا معـاك قصـور فالغربيـة


وألا فنادق كـل أبوهـا فخمـة ××× وسيـارةٍ مـن نوعهـا فرديـة


رديت وأقـول اسمعينـي جيـد ××× الله يجيـب المـال والـذريـة


ويش الفنادق والكلام الفاضـي ××× من يسمعك بيقـول مصلحجيـة


لا يالحبيبـة مـا لقينـا ذلـك ××× وأفكارك اللـي جاتنـي سلبيـة


شخصٍ بسيط وديرتي معروفـة ××× ومتواضـع وسيارتـي عاديـة


وطالب وهات كتاب وعطني دفتر ××× وفي كل صبـحٍ سـارح الكليـة


كليـة الآداب مــن يعرفـهـ ×××ا جـاه اكتئـاب وحالـةٍ نفسيـة


بين النحو والصرف هذا قسمـي ××× وهات الفعل و الجملة الأسميـة


أتعب وأذاكـر والمعـدل طايـح ××× والهـم خـلا حالتـي مبريـة


أبذل جهـودٍ مابذلهـا غيـري ××× وأشقى لأجـل دبـورة الأمنيـة


واللي يبا التعيين والْله إن يبطي ××× لازم يمـر بمـدرسـة أهلـيـة


يابنت هـاذي نبـذةٍ مختصـرة ××× وصاحبك ماتلقين شخصٍ زيـه


ردت وقالـت كلمتيـنٍ تجـرح ××× كنهـا بقلبـي طلقـةٍ نـاريـة


قالت وعبرات الغضب تخنقهـا ××× تسمع زفيـر جيوبهـا الأنفيـة


إن كان وضعك يالمنتف مـزري ××× خلك على السن توب والتمريـة


قلت اعقبي والله يسود وجهـك ××× واسترجعي كلماتـك السوقيـة


والله لـو ماتحفظيـن لسانـك ××× لأشنقلـك بثيـابـك العـاريـة


روحي مراح مقيـط وألا دلـوه ××× يانعن أبـا ذالوجـه ياللحجيـة


قفت وراحت والنظـر يلحقهـا ××× وعين المعـذب دايمـا مبليـة


وقفيت ممـا سـوت المآخـوذة ××× والدمع بـل أهدابـي الرمشيـة


شغلت ذاك الساع سلف الموتـر ××× والرأس فيه سطـور شيطانيـة


أسأل جميع الناس دربي وينـه ××× تكفون وينه خط أبـو حدريـة


أبغى الرياض ولابـروح لغيـره ××× حتى ولوِّ أمشي علـى رجليـة


ياحسرتي ذاك الجمـال الباهـر ××× من شافها يرفع لهـا الكوفيـة


الحب كلمـة والمعانـي واجـد ××× ماتكـفـي الأوزان والقافـيـة


مالوم أبو سياف يومـه يشكـي ××× ممـا جـرا فالقريـة الشعبيـة


أنا أشهد إنك صـادقٍ ياشديـد ××× قولك حكيـم ورايتـك مسميـة


الجامعـة مليـت مـن جيتهـا ××× ولا شفت لا هـاذي ولا هاذيـة


والله يعيـن الشاعـر الوهَّابـي ××× حيثه مريـض وعلتـه مخفيـة





سلامتكمُ