كــرسي الطفــوله //••طفــولــة عضـــو ••

[هادي العيسى]

1-هل كنت مشآآآآكس أوكنت على نياتك وهادئ؟؟

اساسا غلطوا يوم سموني هادي




2- كنت بزر قصدي طفل مميّز عند شخص ما؟؟ يعني كنت أغلا البزراآآن وإلا مصفوق على الرصيف؟

كنت اغلا البزارين عند عمي الكبير



3-موقف حصلّك وأنت صغير وللحين مأثر فيك؟؟

كثير المواقف اللي حصلت لي بس مو لدرجة انها تأثر فيني




4- أكبر عيديّة آخذتها ..كم كآنت .. ومنْ من ؟؟؟ وش كان شعورك وقتها؟؟

امممم على ايام قبل اكبر عيديه كانت من عمي فديت خشمه 20 و شعوري كان ان شريت فيها تشراخيات علشان اعبر عن فرحتي << ما تسوى علي دعاوي العجايز ذيك الحزه




5- من أقرب طفلـ/ـة من الجماعة كانـ/ـت أقربلك؟؟ يعني مايضربك آو تضربك ولا تهاآوشك ولآ يهآوشك؟؟

و الله كانت بنت جيران عماني كل ما شافتني ما اشوف الا غبرتها << تقول صوته يخلعني هههه

و انا و الله كانت تكسر خاطري علشان كذا ما اجيها و الا الباقيات منقف عيونهن ههههههه


6- كم فلقة اخذت على رآسك؟؟

واجد



7- وش كانت عياآآرتك؟؟ >>>> يوووووه وش هالسؤاآآل؟؟

ليه ناويه علي << ما صدقت العرب نسوها



8- وش اكثر حلاااوهـ كنت تحبهاا في طفوولتك الرائعه ؟؟

كراميل لوج



9- ماهو مستوى الرجه اللي كنت فيها " مرتفع / متوسط / منخفض " ؟

منخفض بس مدري ليه الناس كلها تقول مرتفع <<< بريء




10-وش ترتيبك بين اخوانك ؟ وهل هذآ الشئ اثر في مسيرتك الطفوليه ؟؟

الثاني لا بالله بل زادني اصرار على تكملة رجتي



11-وش اكثر مكان كنت تحب تروح له ؟؟ " ملاهي . حديقه ... الخ

مزرعة جدي اللي فالزغين << السعوديه



12-وش اكثر لعبه كنت تحب تلعب فيهاا ؟؟

عوذه

ما اداني الالعاب تقلب كبدي منها



13-هل كنت تضرب والا تنضرب أو لاتهش ولاتنش ؟؟

كنت اضرب اكثر من اني انضرب << سبحان من عقلنا



14-هل كنت تبكي كثير ؟؟

يوم كنت صغير ايه بس يوم كبرت شوي لا << امي تقول دموعك خلصتها يوم كنت بزر



15- وش اكثر فيلم كرتوون كنت تحب تشووفه ؟؟

النمر المقنع << كنت اجيب اخي الصغير و احطهه على كتفي يابلفيت و اخليه يسطر البنات و انا قاعد << ههههه كنت متوحش نوعا ما



16-من اكثر واحد من اخواانك كان قريب منك ؟؟ يعني اللي تحب تلعب معاه ؟؟

اخوي الكبير عبدالله


17-موقف صار لك ولحد الحين اذا ذكرته تضحك ؟؟

كثير و الله لا تذكرت منها بعدل ردي و اذكره


18-كنت تحب الحليب والا تشربه بالغصب ؟؟

لا كان مطلوب و بشده خصوصا حليب الابل << يمي يمي




19-كنت شاطر بالمدرسة ولا ؟؟

كنت شاطر بس كنت مشاغب و هذا اللي كان يخرب علي اذكر في مدرس كل ما دخل يقولي اوقف ورا << عنبوك سارق حلال ابيك

لين جبتله الشايب وسنعه




20- كيف كانت طفولتك بأيامـ رمضان ؟ كنت تصوم قدام اهلك ومن وراهم تفطر ؟؟

كنت اصوم خميس و جمعه اما فالمدرسه لا مريت من البراده ما اقدر اقاومها




21-استايلك وانت صغير.. كيف كآن؟

كنت البس بدل و اغلب شي دشداشه و شعري كل ما بغيت اطول جايب الشايب المكينه و حلقه و اذكر مره يوم طال و ما قعد احد الا بشرته جا الشايب و ان راقد و حلقه بالموس << و الله اني يوم قمت و شفت شعري متناثر احسبن صابني مرض



22-كلمه دآآيم على لسآنك!!

حررررررررررك



23-هل هناك شخص كنت دايم تتبلى عليه يعني تسوي المصيبة وهو ينضرب ؟؟

هههه خويي الله يذكره بالخير لاني ادري الشايب مهوب ظاربه فحط الصكه براسه



24-جريمة او مصيبة لـ هذا اليوم تذكرها و مستحيل تنساهاا ؟؟

مره يقال اني سنافي و بصلح ليت المدربان شقحت السلم و قعدت افر فالليت ساعه لين
انفكت الثريا بكبرها و نشلع وايرها و انطفى كهرب البيت قعدت احاول فيه ملعون الخير مني مناك و اذكر كان يوم الخميس فالليل الكهربجيه مصكرين و يوم الجمعه مصكرين قعدوا اهلي يومين بدون كهرب << و الداش و الطالع يسب فيني



25-ما هو اقوى عقاب في حياتك عوقبت به ؟؟

يوم كل عيال عمي سافروا للزغين و انا قعدني الشايب لاني خذيت سيارته ودعمت فيها



26-نشيد كنت تحبه أيام الطفوله ؟؟

ما به نشيد محدد



27-ماهي الموآقف اللي عرضت فيها اهلك للاحراج؟؟

مره و انا عمري 12 تقريبا كنت اصب شاهي للرياجيل عندنا فالمخيم و كان برررد فقمت خذيت الدله و ساعة صبيتها الا تقرطب و تنكسر و بما ان ردة فعلي سريعه لبى كبدي حذفتها بحضن الرجال << هههههه و الله انه قام يعطينا رقصات مميزه
فقام عمي الله يجزاه خير و عطاه دشداشه من عنده يوم لبسها طلعت واااااسعه




28-كيف كان اول يوم مدرسه لك بكيت ولا لا ..؟

اطلع الف حجه و حجه علشان ما اداوم ذاك اليوم << يا كراعين توجعني و الا منصرع المهم ما اداوم



29-ضعت في مكان؟ .. سوق او حديقه او كورنيش .. اذا ايه قول لنا السالفه ..؟...

اذكر مره ضعت فالعمره كنا قدام الكعبه و من السنه انا نصلي ركعتين فقام عمي و عيال عمي يصلون و انا احسبنا 4 ركعات الناس صلوا و مشوا و انا عادني ساجد يوم سلمت و الا وجه ولد عمي منقلب لوجه اندونيسي << ادورهم ادورهم بالخير رحت الفندق و نمت



30-وش هي اجمل هديهـ خذيتها في طفولتك...ومانسيتها ابد...؟!

اممممممم و الله ما فيه هديه معينه



31-بصراحهـ من كنت تحب بطفولتك اكثر امك ولا ابوكـ....؟!

و الله كلهم مافي تميز ناحية واحد منهم << جعل ربي يخليهم لي و يحفظهم



32-في انسان معين تحس انك كرهتهـ في طفولتك وذا ايه ليهـ...؟؟

بنت خالتي ذا البنت سكنيه مدلعه عند جدتي و الا مني ظربتها قاموا علي ايه عاد انا وشني مسوي << بريء



34-متى هي المرة من المرات اللي حقدت فيها على اهلك وانت صغير
يعني سوولك حركه قدام احد وانقهرت بقوة ؟؟

و الله ما يحظرني الحين شي


35-لحقت تتابع/ين سبيستون ؟؟ ولا بس ع القناه الاولي الصبح والعصر ؟

هههههه لا حنا جيل الكويت الاولى و الثانيه



36-هـل كنت تغلط في نطق الحروف ..؟

الحمدلله الفحوصات سليمه



37-موقف سويته ..والى الحين مااحد يدري عنه ؟

دعمت فسيارة اخوي دعمه خفيفه و رحت للمصلح صلحتها و عودت للبيت

<< و لا من شاف و لا من درى



38-مين اعز صديق طفولة و الى الان متواصل معه؟؟

فهد ولد عمتي جعل ربي يحفظه







و الله لا يهينش يا طبعي نفضتي الذاكره و سليتي الخاطر

<< بس لو تسوين خصم عالاسئله يكون ابرك