ان مارجعتيلي انا اموووووت يانووووووف

[الحنش الاسود]

ياللي جرحت القلب بيدك وانا أشوف
حرام قلبك ليه مابه مرافه
ارحم جريح طاح وبحالته روف
اللي حياته لاجل فرقاك عافه
تركتني في ظلمة الخوف مكسوف
والبستني ثوب الشقاء والكسافه
يابو جديل فوق الأمتان منسوف
تلحق على روس الشطايا ضفافه
وجسمٍ حسين الطول والخصر منحوف
عليه من تفصيخ ثوبه كلافـه
والورك..والفخذين..والساق ملفوف
والوجه ناعم ماشتكى من جفافه
أدعج..غنج.. بالملح والزين موصوف
من ينهبه يملك عذر لأختطافه
في حب ذاك الزين مغرم ومشغوف
اللي جمع بين الجمال وعفافه
تبدأ حياتي ليل لي كان مزفوف
ونهايتي ليله لغيري زفافه
واوجد حالي وجد من جيب مكتوف
وحطوه في سجنه وشدو كتافه
مطلوب دم ولحظة الجرم مشيوف
وأخو القتيل اللي له الثار شافه
ومن جيب للتحقيق بادوه بكفوف
وسجل بتقرير السجون أعترافه
عليك ياللي لأجلك الدمع مذروف
دمعي على فرقاك زاد أنذرافه
أنا على لقياك يانوف ملهوف
والقلب هم الود والبعد لافه
بالقلب من فرقاك هاجس ولافوف
يزود مع زايد جفاك التفافه
صارن دقاته لهن رجف ورجوف
زود الجفاء والصد زاد أرتجافه
ارجيك رجوى اللي مع الموج مجروف
والموج حطم مركبه بأنجرافه
في ليل مظلم واعتلى فوقه الطوف
وأطلق عنان الموت باخر مطافه
سوي ولو مره بدنياك معروف
تماكني قلباٌ بدابه تلافه
أجاوب النايح ليا ناح برفوف
واقلب كما ذيبٍ عنا الجوع حافه
روفي بحال اللي طعنتيه بالجوف
اللي على شانك حلا النوم عافه
أعفي عن اللي بين اياديك موقوف
فكي قياده وأسمحي بأنصرافه
وردي علي وبددي ظلمة الخوف
لاتتركيني في هوان ومخافه
وأن مارجعتيلي انا أموت يانوف
ولا على دنياي بعدك حسافه

منصوربن سعدي بن رجاءالرمالي الشمري.