ياوجودي وجد مجروح الفـوادي

[نـاصـر]

السلام عليكم

هذي قصيده عجبتني لشاعر ظلم أعلامياً ولكن قوة قصيده فرضته على الساحه الشعبيه فرض

وهو الشاعر الألمعي عبدالله بن زويبن الحربي

واتركم مع النص .

يا وجودي وجد مجروح الفـوادي=من هنوف ثوبهـا يجـرح نهدهـا

شافهـا بالملعبـة يـوم العيـادي=طشت الشيلة وماحت فـي جعدهـا

كنهـا بالملعبـة صفـرا تـرادي=بالحبـال اللـي ملـواتٍ عقـدهـا

سمعت أصوات العزاوي والهنـادي=من عياطير السطر يطفـر زبدهـا

تحتري شيـخٍ يقـود ولا يقـادي=منكـفٍ بطماعـةٍ لحقـوا طردهـا

لحقوا الفرسان بظهـور الجيـادي=وكل راعي مهـرةٍ ركـب ولكدهـا

لابةٍ تقلـط علـى جمـع المعـادي=مير ربي عاقهـا وأطفـى سعدهـا

خيلهم يم الخـلا عقـب الطـرادي=ما تبقي مـا يبقـى مـن جهدهـا

روحت مثل النعام امـع الحمـادي=يوم سمعت صوت خيـالٍ رهدهـا

بنت شيخٍ مـا ينافـس بالشـدادي=كلمتـه كـل القبيـلـة تعتمـدهـا

ما تلد بعينها في شخـص عـادي=ولا يسود الغابة إلا حكـم أسدهـا

أتفق معها علـى غيـر الفسـادي=ايتزوجهـا .. وياخذهـا .. بيدهـا

فوق خبرا جمعـت كـل البـوادي=كل من علـم بهـا شـد ووردهـا

سيلتها يـوم هـل قـران حـادي=مزنةٍ كبر القطـاة أصغـر بردهـا

وكل مدة قيضهم والوضـع هـادي=وأن حصل له فرصة جدد عهدهـا

لين قام الحـر ينقـص والبـرادي=يتزايد والمـزون أوحـم رعدهـا

ناحـرت لديارهـا قطـم التـوادي=أورحت ريح الحيـا يمـت بلدهـا

وأرسلوا عساس للعلـم الوكـادي=ثم جاهم فـي علـومٍ مـا بعدهـا

ما بعدها غير صوت اللـي ينـادي=وكل راعـي خيمـةٍ شلـع وتدهـا

وقربوا حمر الونيتـات الجـدادي=والبيوت السود طاروا في عمدهـا

أستخفـوا تقـل قافيهـم هجـادي=كل ما جو مصغـرٍ شالـوا ولدهـا

مالهم يـم الغنـم شـف ومـرادي=مـا شقـوا بنعيمهـا ولا نجدهـا

روحت قطعانهـم مثـل الجـرادي=تتعب الحساب ما يحصـي عددهـا

والهوى معروف شـيٍ لا إيـرادي=والنتيجة موسفة ما أحـدٍ حمدهـا

يتسرب مع حـلاه مـن المبـادي=سم حية والفـراق أمـر وأدهـى

لو صبر راع الهوى صبر المهادي=الجروح تبيـن لـو أنـه جحدهـا

أنطلق مع دربهـم حاديـه حـادي=وكل ما جاء نزلـةٍ مـر ونشدهـا

لين بـاد ولا لقـى علـمٍ وكـادي=باهت الأخبار عنهـم مـا وجدهـا

كنت غادي وأحسب المندّل غـادي=والنتيجة تنكشف لو طـال أمدهـا

كنت أغني مـع مغنـي يابـلادي=وأحسب أن اسمي مسجل في سندها

لين عُرِضت للمسـاوم والمـزادي=عكس ما جاء في كتاب اللي مهدها