الا ياعيون اللي خذى بالسما روج=حرن ليا شفته تذكرت عينك
خليت قلبي من عنا الحب مزعوج=وبيحت سدي بيح الله كنينك
خصن ليا منك تهنفلت بغنوج=تقول قلبي تنتله في يدينك
خليتني ياهافي الخصر مرجوج=ياللي ثمان وتسع عدت سنينك
عليك ردف وعين والساق مدموج=وكن البروق السامره في جبينك
والعود زملوقن من الوسم مدلوج=ياللي على الخفرات تفرق بزينك
مير البلا من دونك الباب مزلوج=تكفى طلبتك لاتعذب سجينك
لاتستمعبي يالقضي قول وهروج=والعلم معطيكيه انا في يمينك
وتراي ياهاف الحشا مقبل العوج=طالبك روف بحال منهو حزينك
مالي جدى الا لاتذكرتك الاوج=واقول يازين التواصيف وينك
في ساعتن ماخاطري منك مبهوج=ضايق واحسب البعد بيني وبينك
وخليتني دواج لو كنت مادوج=وانا دخيلك في وجه والدينك
وتدري براع الحب مفلوج مفلوج=وحنا حريصينن عن اللي يهينك
محمد زايد المويس المطيري
18-02-2008, 12:31 AM
العرض الشجري