لبيّك وفديتك ، لـ مدغم أبو شيبه

[محمد أبو زيد]

السلام عليكم ورحمة الله وبركاته

قصيده مختاره لـ مدغم أبو شيبه ، عساها ترضيكم

لايغرّك حجب دمعـي عـن ظهـوره = لاتقـول أنّـي سليتـك !! ماسليتـك

دايم أستر دمع عينـي ستـر عـوره = والاّ أنـا يامـا تضايقـت وبكيـتـك

أوّلـه يـوم الغـلا فأربـع شهـوره = وآخره فـي يـوم جيـت ولا لقيتـك

أعتبر مسيـاري لجـارك.. ضـروره = لجـل أوقّـف موتـري قـدام بيتـك

وأنتظر لي ربع ساعة.. عنـد سـوره = ماخبرت أني دخلتـه.. مـا أحتريتـك

وأنت تأخذني علـى عميـا مشـوره = مسرفٍ بـي لارحـم حيّـك وميتـك

تحسـب أنّـي ناسـيٍ حـبـك ودوره = لونسيـت ابـوي وامـي مانسيـتـك

الله اللي حطّ لك فـي العيـن صـوره = و الله أن يمحـا نظرهـا مامحيـتـك

تلمحـك روضٍ يقلـدنـي زهــوره = ناعـمٍ لـو أنّـك بتـوكـل كليـتـك

موج حبك في الحشا صفقـه وفـوره = والظنـون تسـد نفسـي لأشتهيتـك

وش تـعللها عليـه مـن الخطـوره = يامـعللها عـلـى ليـتـك وليـتـك

واحدٍ من طـاري أسمـك طـق زوره = وش يقول أن سمع ( لبيك وفديتـك )

عـذره بمخبـاة لـو يفقـد شعـوره = وأنـت عـذرك لارمـاك الله رميتـك

لاتهـز الغصـن وتطـيّـر طـيـوره = أتـق الله وأحتـرم مجـدك وصيتـك

وأن حداك مسايـر النفـس الغيـوره = مرحبـا مـن واحــدك لكمبليـتـك

أرمني فالنـار مـن عميـا مشـوره = وأسرف أسرف لارحم حيّـك وميتـك