الجيره وسلومها عند العرب بين ( العتيبي والقحطاني )

[المزحمي]

هذه القصه جرت على فارس الدويخ من الروسان من عتيبه ، كان المذكور جاراً لمحمد بن حشيفان من روق من قحطان ، كان محمد عنده فرس مشهور في ذلك الوقت وكسبوها ناس من عتيبه في غزوهم على قحطان ويوم أخذت الفرس قال صاحبها ابن حشيفان يافارس قال : نعم ، قال فرسنا عند جماعتك عتيبه وانا وانت جيران من ثلاث سنوات واليوم تراي مثورك فيها ، قال فارس : أبشر فركب فارس وفهد ولد محمد ابن حشيفان على أثر الفرس يوم امساهم الليل أضافوا عند واحد من قحطان في طريقهم فاستقبلهم ورحب بهم وذبح لهم خروف وعمل لهم القهوه وعندما تقهوو قال معزبهم وين رايحين يا فهد قال فرس الوالد ماخوذه , ومثورين فيها قصيرنا فارس ، وكان فارس قصير القامه ناحل الجسم وأذا رأيته احتقرته من صغر بنيته قال المعزب اللي هذا ثويركم أبشر في قلها . يوم سمع فارس كلام المعزب زرمت نفسه من مشاهد هذا الشخص وعن عشاه , قال لخويه عطنا الذلول ومشو في سبيلهم . قال المعزب ذبيحتكم تطبخ تعشوا قال فارس الدويخ : ما نبي لك عشاء فواصلوا مسيرهم بإثر الفرس وبعد يومين وصلوا العرب الذين عندهم الفرس فعرفوا ان فارس الدويخ ثوير بالفرس قالوا يا فارس نبي نعطيكم أربع من الابل ثنتين لقحات وثنتين معاشير بدل عنوتكم تقديراً لك ولخويك ، قال فارس اللازم اللي جينا له ان شاء الله يبي يتم وقال لخويه القحطاني أركب الذلول ترى وعدك المحل الفلاني يوم جاء الليل وهو ياخذ سلاحه ويتم على الفرس ويلوذ بضهرها ويلحق بخويه ... جماعته يوم شأفوه جازم عطوه ماء وطعام قالوا مار لا تهلك انت وياها

وبهذه المناسبه قال فارس الدويخ أبياتاً طويله


منها يقول عندما سلم الفرس لقصيره القحطاني :

أبشر بها ما قلعن المسامير = وهذا مثار امدربين العيالي
حلفت انا ما اطلق رسنها ولا اسير = يقع حدانا للمقابر يشالي
والله ما اخذ في فرسك المخاسير = لو قلطوا لقح وخلف متالي