حق الضيف !!ارجوا من الكل المرور

[بن حظيبه]

بسم الله الرحمن الرحيم

في سنه من سنين القحط الارض يبست والمرعى نفد وكان من لا بد منه أن يرحل صاحب الحلال الى مكان يلقى فيه الما والعشب وكان صياح المرتعد من الناس اللي شدوا الرحال يدور على المرعى وفي الطريق نزلو على ربع وتفرقوا بينهم علشان يقدر راعي كل بيت يكرم ضيوفه بالميسور وكان صياح المرتعد ومن معه قصدوا أحد البيوت وكان راعي البيت غايب وقامت المره رحبت بهم واشعلت النار وشربت الدلال بس ما كان في البيت أي شي تقدمه لهم حتى التمره وكان راعي البيت معه ثلاث من الغنم خارج البيت وما رجع بذيك الليله وتأخرت المره ما قدمت شي للضيوف قام صياح وشافها قاعده تعض ابهامها من الفشيله لأنها ما قدمت لهم شي .
نشدها صياح وين صاحب الدار قالت له ماهو بموجود ووالله ما عندي شي اقدمه لكم حتى التمره ,تبسم صياح وقال ما عليش لا ينشغل بالش قالت و شلون ما اهتم وانا ما قدمت شي للضيف تركته جايع؟
قال صياح طيب ما عندش ماعون وعكة سمن قديمه؟ قالت عندي لكنها يابسه قال عطيني اياها وقام حماها على النار وعصرها وطلع منها مقدار نص فنجال من السمن وقال للربع كل واحد منكم يحط اصبعه في هالفنجال ويدهن ايديه وعصاه ومحزمه من ها السمن وسووا اللي قال لهم ثم قال صياح اذا سألكم أحد عن شي قولوا اسألوا صياح علشانه كان عارف ان جماعته بيسألونه عن اللي قدموا لهم مثل ما قال الشاعر الرمالي .

اب يا قفه وراحوا على خير= وناشدوا من شاف شي وحكى به

ونشد صياح المره عن اسم صاحب الدار قالت هذا لمطير الحمزي ونشدت المره عن اسمه قال انا صياح المرتعد .
ويوم اطلعوا من عندها قال صياح لربعه اكربوا محازمكم عن الجوع وبعد ما قابلوا ربعهم كلٍ قام يعد اللي كلوه عند مضيفهم الا ربع صياح ما تكلموا انشدوهم ربعهم ليش ما تتكلمون قالوا انشدوا صياح ويوم اسألوه قال لهم شموا الدسم وانتوا تعرفون قالوا انتوا محظوظين شبعتوا واحنا ما كلنا الا تمن احمر واللي يقول عصيده واللي يقول ما كلنا الا مريسه ,انت محظوظ يا صياح وبها الطريقه والحيله قدر صياح يستر على مطير الحمزي وكنه قدم كل شي لهم .
وبعد ما رجع مطير لبيته ودرى بالقصه من زوجته جاب وحدةٍ من الغنم وقال لجماعته هذي ذبيحة صياح وبتركها عندي ما اذبحها حتى يجي صياح واشوفه ومرت الايام والسنين وصارت ذبيحة صياح قطيع من الغنم حتى جا ذاك اليوم وارسل مطير لصياح يعزمه وصياح ناسي القصه وما يدري وش يبي مطير لكنه لبى الدعوه وتوجه له ويوم وصل أكرمه مطير ثم خذه للغنم اللي عزلها قبل ما يجي وقال مطير لصياح:

يالمرتعد واجبك حقٍ وصايب=حقٍ من اللي يفهمون المواجيب
وسميته بحضور كل القرايب=ذبيحتك يا منبع الجود والطيب
لو ما بغينا ما علينا غصايب=لا شك ضيف البيت له حق ومصيب
وغمرتنا يا شوق ضاف الثوايب=في منسب المعروف الستر والطيب
ويعداك يا منهو ضاريٍ للسبايب=يا مد علق بالمحزب شواذيب

يوم سمع صياح المرتعد قصيدة مطير قال هالقصيده ردٍ عليه:

الطيب بحجاج المشبب وهايب=وجه الفتى من ربك مواجيب
ثلثٍ لنا وثلثٍ لبيتك حلايب=مقسوم بين الضيف هو والمعازيب
ومعزبتنا يا فتى وانت غايب=نشميةٍ تسوى كثير الرعابيب
نشميةٍ تسوى كثير الحبايب
يا غبت ما يدخلك شكٍ ولا ريب=ومن جرب الدنيا وشاف النوايب
واللي يسب بشبعة البطن خايب=وساس القرا زين النبا والتراحيب

وبعدها قام صياح وقسم الغنم ثلاث اثلاث ثلث له وثلث لصاحب البيت وثلث لصاحبة البيت لأن الذبيحه أول من يقلط عليها الضيف ثم هل البيت ثم صاحبة البيت وهذه القصه تدل على حق الضيف.

وكما قال الرسول صلى الله عليه وسلم من كان يؤمن بالله واليوم الآخر فليكرم ضيفه.

تحياتي